Rềp tềng sơnĕ pe gùng lồi ƀòn Trum, sàh Tâm Thắng, kơnhoàl Cư̆ Jút là hìu pa lơh dờng 90 thơ̆k vuông bơh ồng Y Tem Kpơr dê. Tàm suơn gùt dar hìu, ală sèng tờm kơphe gam hòn gơs niam mờ geh uă ngan plai. Ồng Y Tem Kpơr yal, hìu nhă ồng neh geh tŭ gơwèt tàm mpồl kal ke ngan tàm ƀòn, mờ 7 nă cau, priă geh mìng kơnờm tàm 2, 3 sào ù tam kơphe bal mờ lòt lơh broă ơpah. Kơnờm bơh broă lơh Jơnau kờñ dà lơgar bè tơrmù rơƀah, priă geh bal mờ rài kis hìu nhă ồng neh tam gơl pah ngai.

Bơh bồ nam 2022 tus tŭ do, hìu nhă ồng neh geh jào kơnrồ ròng, dong kờl tam wơl kơphe, mờ pa do ngan là lơh hìu ơm. Jơh ală broă neh gơs bơta pràn nàng hìu nhă ồng Y Tem Kpơr brồ guh: “Lài mờ tŭ geh broă dong kờl bơh dà lơgar, rài kis hìu nhă añ kal ke ngan, hìu ơm kung mìng ơm tàm hìu mpàn sèt. Tŭ do neh lik klàs rơƀah, hìu añ geh dong kờl 1 nơm kơnrồ kờp priă 20 tơlăk đong mờ 70 tơlăk đong priă lơh hìu ơm, tŭ do ờ gam ngòt mìu càl pràn tai, rài kis neh lơngăp lơngai. Tŭ do añ ròng kơrnồ nàng deh kòn mờ sơnka sền gàr suơn kơphe, tŭ do hìu nhă añ neh lik klàs rơƀah. Añ dan ưn ngài Đảng mờ Dà lơgar uă ngan”.

Rềp tềng gah ƀòn Trum , ƀòn Ea Pô kung gam tam gơl pah ngai sơl tài kơnờm bơh ală broă dong kờl tơrmù rơƀah. Mò H’ Buan Kbuôr, kòn cau Rơđê bơh dùl hìu rơƀah ngan tàm ƀòn, kơnờm mờ broă dong kờl kơnrồ ròng mơ 70 tơlăk đong priă lơh hìu, bal mờ broă lơh ngan bơh ală cau tàm hìu dê, mò neh geh hìu ơm niam kơl jăp, rài kis broă lơh sa niam.

Hìu ơm pa lơh gơs, kơnrồ kung gam geh bun, mờ broă tơrmù rơƀah geh sơn đờm bơh broă dong kờl mùl màl bơh Đảng, Dà lơgar dê. Mò H’ Buan chờ hờp pà git: “Hìu añ geh 4 sào ù mờ lơh ơpah tai 2 sào ù là 6 sào ù, tài cồng nha lơh sa geh ờ uă, den tàng añ mìng geh 40 tơlăk đong. Lài do den hìu nhă añ kal ke mơya tài geh Dà lơgar dong kờl lơh hìu ơm, tŭ do rài kis neh lơngăp lơngai. Añ ưn ngài uă ngan”.Tâm Thắng là sàh mìng lơh broă sa suơn sre, ngài mờ tiah tàm gùl càr Dăk Nông di pơgăp 110 kơi sồ, geh 15 thôn, ƀòn mờ 1 bơnah 3 khà kờp làng bol là jơi bơtiàn ờ gal cau. Ồng Trần Thế Quang, Ƀí thư Đảng ủy sàh pà git, tơngai bơh nam 2021 tus 2025, sàh geh tam pà mờr 3 tơmàn đong bơh broă tơrmù rơƀah nàng dong kờl di cau bè lơh hìu ơm, sơntìl phan tam, phan ròng, phan lơh broă. Kơnờm mờ hơ̆, khà hìu rơƀah gơmù bơh 5,3% gam 1,9%, pơgồp bal tàm broă dong kờl sàh lơh geh cồng nha broă bơ̆t bơtàu ƀòn lơgar pa tàm nam 2024 mờ gơs tiah lam lài tơrmù rơƀah tiah ngài càr dê.

Ồng Trần Thế Quang yal bè ờ uă broă lơh mờng chài tàm broă lơh tŭ geh dờp priă tơrmù rơƀah bơh Dà lơgar ai sàh do in: “Tàm broă lơh, bol añ sùm tơnguh uă gơnoar bơh mpồl bơtiàn ƀòn lơgar bal mờ broă tus bal bơh làng bol geh dờp broă dong kờl. Tàm tơngu me hơ̆, tơnơ̆ mờ tŭ làng bol geh dờp priă dong kờl bơh Dà lơgar, ngui di jơnau kờñ, tơnguh geh cồng nha. Bơdìh hơ̆ tai, bol añ kung tơnguh gơnoar jăt sền bơh Mặt trận bal mờ mpồl lơh broă nàng broă lơh jăt broă jơnau kờñ dà lơgar dê ờ gơtìp hoàc huơr, pal ai geh cồng nha tơn”.

Broă lơh Jơnau kờñ dà lơgar bơtàu tơnguh lơh sa mpồl bơtiàn tiah làng bol jơi bơtiàn ờ gal cau mờ tiah kơh bơnơm tơngai bơh nam 2021 tus 2025 geh lơh tàm kơnhoàl Cư̆ Jút neh cèng geh uă tam gơl niam. Git nđờ rơhiang hìu làng bol geh dong kờl di tŭ bè ù lơh hìu ơm, ù lơh sa, dà ngui sa, hìu ơm, broă lơh broă sa… Mờ mờr 40 tơmàn đong priă bơcri, kơnhoàl Cư̆ Jút là kơnhoàl lơh geh cồng nha ngan, pơgồp bal tàm broă ai geh uă sàh lơh geh cồng nha broă bơ̆t bơtàu ƀòn lơgar pa.

Jăt ồng Trần Mai Việt, Phó Kwang lam bồ cơl dŭ lơh broă Jơi bơtiàn mờ Jăt yàng kơnhoàl Cư̆ Jút yal, Broă lơh Jơnau kờñ dà lơgar tơrmù rơƀah rơ̆p sơlơ tơnguh geh cồng nha rơlao tai tŭ gơnoar atbồ bàr kấp mùl màl lơh broă. Kấp sàh rơ̆p atbồ tơn, tam pà cau lơh broă, pleh mờ broă tam cah ngài, ờ tơrgùm bal: “Lài do geh tus 10 rơndăp broă, tam pà ai uă mpồl lơh broă nàng lơh, ƀuơn gơtìp ờ tơrgùm bal, kal ke jăt sền mờ ờ ndrờm bal. Tus do jào tus 1 anih atbồ den rơ̆p ƀuơn rơlao tàm broă lơh. Is ồn, pal jào tơn kấp sàh in lơh, nàng làng bol geh dờp tơn, pleh mờ broă gơtìp tàm bơrlŭ bal bè lài, ƀuơn dờp, mờ tơnguh uă cồng nha loh làng rơlao”.

Mùl màl pà gŏ, broă lơh Jơnau kờñ dà lơgar bơtàu tơnguh lơh sa mpồl bơtiàn tiah làng bol jơi bơtiàn mờ tiah kơh bơnơm tàm kơnhoàl Cư̆ Jút neh mờ gam cèng geh bơta kwơ màng ngan, lơh gơrềng uă ngan tus mờ làng bol jơi bơtiàn ờ gal cau gam uă kal ke. Do là gùng dà broă lơh mùl màl, di pal ngan, pơgồp bal kwơ màng tàm broă bơtàu tơnguh lơh sa mpồl bơtiàn mờ tơn jơh jơgloh tơrmù rơƀah tàm càr Dăk Nông dê. Tŭ mpồl lơh broă sră nggal bàr kấp geh lơh gơs, broă lơh jăt broă lơh do pal geh tơrgùm rơlao nàng lơh geh cồng nha mùl màl, di jăt jơnau kờñ bơh ƀòn lơgar dê.