Ngai òr (22/06), tàm Hìu lơh broă Cíñ phủ, Thủ tướng Cíñ phủ ồng Phạm Minh Chính đơng lam dar pơrjum dơ̆ 5 Mpồl Sồr lơh Dà lơgar lam lơh tơn jơh hìu lơh ing, hìu ồm sèt nhăt dà mìu tàm làm gùt lơgar; Dar pơrjum dơ̆ 18 Mpồl Sồr lơh Dà lơgar ală broă lơh bơt bơtàu, rơndăp broă lơh kwơ màng Dà lơgar, tờm ngan bơh gah Gùng lòt jun pơndiang mờ Pơrjum dơ̆ 2 sơlơ tơnguh ai priă bơcri Dà lơgar nam 2025.

Gơrềng tus lam lơh “Tơn jơh hìu lơh ing, hìu ồm sèt nhăt dà mìu” tàm làm gùt lơgar: Thủ tướng pà gĭt, broă rơndăp lơh bơh sơn rờp kờp dŭ tơngai lơh sir tus nam 2030, mơya, ngan ngồn lam lơh, ală Ƀộ, gah broă, ală tiah geh nùs nhơm lơh ngan uă, lơh jat niam ngan, ngan là tàm tơngai wèt tus Tơngkah kir sơnrai 80 nam tơnggơs lơgar Kộng hoà sàh hội củ nghĩa Việt Nam, den tàng pal kràñ cê jơh nùs lơh ngan tơn lơyah tơngai lơh sir broă lơh. Jờng rơ uă ngan ală Ƀộ, gah broă, ală tiah, ală mpồl lơh sa kă bro lam lơh jơh nùs srơh “Tơn jơh hìu lơh ing, hìu ồm sèt nhăt dà mìu” tàm làm gùt lơgar, Thủ tướng sồr ring bal tơn lơyah tơngai lơh broă lơh “Tơn jơh hìu lơh ing, hìu ồm sèt nhăt dà mìu” tàm làm gùt lơgar  tàm ngai 31/10/2025.  Mìng is gơwèt mờ “Tơn jơh hìu lơh ing, hìu ồm sèt nhăt dà mìu” ai cau geh màng mờ Dà lơgar mờ Kăc màng, pơn đơl pràn lơh ngan tus ngai 27/07 nam do rơ̆p lơh jơh hìu lơh ing, hìu ồm sèt nhăt dà mìu gơwèt mờ cau geh màng mờ Dà lơgar mờ Kăc màng, hìu bơnhă cau ling sồt să, cau ling chơ̆t màng.