Tơnơ̆ mờ rơlao dùl poh mùl màl lơh jăt broă lơh gơnoar atbồ ƀòn lơgar bàr kấp tàm ală mpồl lơh broă sră pơ-àr gơnoar atbồ pa, mho òr (08/07), Củ tịc Anih duh broă Làng bol càr Dăk Lăk ồng Tạ Anh Tuấn sền broă lơh gơnoar atbồ kấp sàh tàm sàh Krông Năng mờ sơnah ƀòn Buôn Hồ.

Củ tịc Anih duh broă Làng bol càr Dăk Lăk ồng Tạ Anh Tuấn đơs niam broă lơh ngan bơh kấp ủy, gơnoar atbồ sàh Krông Năng bal mờ sơnah ƀòn Buôn Hồ neh tơnguh uă cồng nha atbồ dà lơgar, drơng làng bol in niam rơlao. Bơh broă lòt sền, Củ tịc Anih duh broă Làng bol càr Dăk Lăk kung dờp geh ờ uă bơta kal ke, gơkòl tàm anih lơh broă bè: broă tam pà kes priă lơyài lơh gơrềng ờ niam tus mờ broă tơm priă jăt broă dong kờl; phầm mềm lơh broă sră nggal geh tŭ gơtìp tìs tàm broă tơrbŏ bal; gùng dà broă bơto sồr ngui priă jền-cau lơh broă gah priă jền ai kấp sàh, sơnah ƀòn in ờ hềt loh làng. Ồng Tạ Anh Tuấn pơlam mpồl kwang bàng  lơh broă tàm sàh Krông Năng mờ Buôn Hờ tơnguh nùs nhơm tam klăc bal, sơrlèt mờ ală jal ke, lơh niam ală gơnoar broă, kơnòl broă neh geh tam pà kấp, tam pà gơnoar atbồ.