Jat Anih duh broă làng bol càr Gia Lai, tàm 6 nhai bồ nam 2025, kờp jơh phan lơh gơs tàm càr (GRDP) lơh geh khà gơguh mờr 7,5%. Do là khà pal pơn jờng ngan, ngan là tŭ càr pa lòt gan tŭ tơngai tơrgùm dùl ù tiah, pal geh tŭ tơngai nàng gàr kơ̆ mpồl lơh broă sră pơ àr gơnoar atbồ mờ gùng dà atbồ. Bè kes priă, kờp jơh lùp dồs priă dia dà lơgar geh rlau 13 rbô 600 tơmàn đong, gơguh pràn pơndrờm dùl tŭ bal mờ nam lài. Pal đơs là bơnah tă pơgồp bơh càr Bình Định geh rlau 100 rbô tơmàn đong, tàm tŭ càr Gia Lai yau geh 3 rbô 600 tơmàn đong. Priă lơh geh bơh tac phan hờ lơgar ndai gùt càr geh mờr 1 tơmàn 700 tơlak dolar Mỹ, gơguh pràn ngan. Mìng is càr Gia Lai (lài do), priă lơh geh bơh tac phan hờ lơgar ndai gơguh rlau 2 dơ̆, uă ngan là kơnờm kơphe, lơh gơlik bơta gơn kơnờm dờng ngan ai gah broă lơh sa suơn sre in.

Bulah bè hơ̆, jat ồng Hồ Quốc Dũng, Ƀí thư Tỉñ ủy càr Gia Lai đơs, càr tơnơ̆ tŭ tơmut bal kung gơtìp uă bơta lòng, bơta ờ niam. Pơn rơ ngan tàm hơ̆ là phan bơna gùng lòt, bơtơt rbòng dà, lơh sơnơm mờ bơto bơsram kung ờ hềt ring bal. Bơta krơi is bè gùng dà atbồ đah 2 càr yau digơlan lơh gơ rềng tus cồng nha đơng lam bơh càr Gia Lai (pa) dê. Nàng bơsong ală bơta ờ niam do, càr Gia Lai neh yal ală jơnau pal jat lơh broă pa, ai jơnau đơs “Loh làng cau – loh làng broă – loh làng phan lơh gơs – loh làng tŭ tơngai hơ pơrgon – Loh làng kơnòl broă- loh làng gơnăp gơnoar” lơh tờm. Jat hơ̆ broă jàu bơtàu tơnguh lơh sa – mpồl bơtiàn geh jàu mùl màl tus tơl sàh, sơnah ƀòn in, ai lơh lài ală tiah kal ke in. Ồng Hồ Quốc Dũng đơs sùm: “Lơh ngan, pơn đơl pràn là nam do pal gơguh lơh sa geh 8%. Kờp sền jơh ală kal ke, kòl yan, ală bơta ƀuơn nàng tă bơsong. Pal  tam gơl pràn bồ tơngoh, bơta chài ai lơh broă Mpồl lơh broă sră pơ àr gơnoar atồ bơh bồ tơngoh kơlôi sơnơng atbồ gơ gơs gơnoar atbồ bơt bơtàu, drơng làng bol in, jơh ală broă bơh làng bol mờ mpồl lơh sa kă bro dê là pal bơsong mơ bơh kâp sàh, sơnah ƀòn. Ai cồng nha lơh broă mờ bơta niam nùs làng bol dê lơh bơta đo was ai cồng nha he dê in”.

Anih duh broă làng bol càr Gia Lai neh ai tơlik ală broă lơh ngan ngồn nàng tơnguh pràn jak atbồ mờ đơng lam. Bơta tờm tàm hơ̆ là lơh pràn tam gơl sồ mờ ngui điện tử tàm ală mpồl atbồ. Ală tơngume atbồ mờ broă jàu lơh sa – mpồl bơtiàn geh tam gơl sồ rơp dong ală sàh, sơnah ƀòn ƀuơn jòi git mờ lam lơh broă ngan ngồn. Ồng Phạm Anh Tuấn, Củ tịc Anih duh broă làng bol càr Gia Lai đơs loh: “Ală sờh, gah broă lơh gàr kơ̆ kơljap, sồr lơh kơnòl broă mờ jàu broă mùl màl tàm tơl gah ai tơl tiah in. Ngan là cau lam bồ, phó lam bồ ală sờh, gah broă lơh pal kong kơnòl bè cồng nha dut ndơl bơh gah broă lơh he dê jat broă neh geh jàu, bơto bơtê mờ pơlam ƀòn lơgar broă lam lơh, geh bơsong broă làng bol in mờ bơtàu tơnguh lơh sa mpồl bơtiàn. Ală tơngume do pal geh lơh tàm điện tử, geh tam gơl sồ nàng ală sàh, sơnah ƀòn in jat tàm tơl gah broă, sền tàm hơ̆ nàng git gùng dà bơsong broă”.