Tàm dơ̆ tìp mat mờ Ƀộ trưởng Ƀộ Cribơyai broă mờ lơgar ndai lơgar Lào ồng Thongsavanh Phomvihane, bàr gah ring bal pơn jat tai pơgồp bal jơh nùs, tàm dong kờl bal mờ gơp tàm ală anih cribơyai uă lơgar, ngan là tàm mpồl ASEAN mờ ală mpồl lơh broă bal tiah dềt Mekong; kờñ nùs nhơm bal bơh ASEAN dê bè ală broă kuơmàng tàm tiah do, tàm hơ̆ geh broă tàm dà lềng đah mat tơngai lik.

Tàm dơ̆ tìp mat mờ Ƀộ trưởng Ƀộ Cribơyai broă mờ lơgar ndai lơgar Thái Lan ồng Maris Sangiampongsa, Phó Thủ tướng, Ƀộ trưởng Ƀộ Cribơyai broă mờ lơgar ndai lơgar he ồng Bùi Thanh Sơn jơh nùs ring bal mờ đơs nền, kờñ ală jơnau bơceh lơh tàm tơrbŏ bal lòt nhơl tàm tiah ASEAN; lơh pràn tàm tơrbŏ bal tàm tơngume ACMECS, mờ kung sồr Thái Lan pơn jat tai lơh gơlik bơta ƀuơn ai mpồl bơtiàn cau Việt Nam tàm lơgar Thái Lan in.

Tàm dơ̆ tìp mat mờ Ƀộ trưởng Ƀộ Cribơyai broă mờ lơgar ndai mờ Lơh broă bal ală lơgar lơgar Campuchia ồng Prak Sokhonn, bàr gah ring bal pơn jat tai pơgồp bal jơh nùs, kung bè sồr ală ƀộ, gah broă lơh ndai lơh geh cồng nha ală mpồl lơh broă bal 2 gah gam geh tŭ do, lơh pràn lơh broă bal tơl làm tàm jơh ală gah broă, tàm hơ̆ sền gròi tus broă sơlơ tơnguh tai cribơyai mpồl mờ tìp mat kwang bàng kâp dờng, tàm tơrbŏ bal phan bơna, gùng lòt, mpồng nhàr lơgar, lơh pràn rlau tai lơh broă bal kă bro phan, sơlơ tìp mat lơh kwèng làng bol, rề ơnàng lơh broă bal lòt nhơl.