Tiô tơdroăng hmâ loi dêi hdroâng Jarai, klêi kơ’nâi hiăng hlâ, mơhúa mơngế ki hlâ mê xuân ối prôk mot tung hngêi trăng, a plông hngêi trối ga ối rêh nah, pơla mơngế hlâ ƀă mơngế rêh xuân u ối ai tơdroăng ki hmâ achê dêi pó. Xua ti mê, rêm hâi mơngế rêh xuân ối lo lăm pôu ngăn a tơnâp kiâ dêi mơngế tung rơpŏng hngêi, kơpuih văng krúa lĕm ƀă chiân hmê kơchâi, têa ôu ăm mơngế ki hiăng hlâ. Klêi kơ’nâi to lâi chât hơnăm, tơdroăng mê kô mơgêi klêi kơ’nâi po tĭng lôi tơnâp kiâ, ối tối cho Mơdĭng Pơthi. Vâ rơnuâ dêi châ tơná chiâng kiâ trâp tung mơdĭng lôi tơnâp kiâ, môi tiah mâu mơhúa kiâ, vâi hmâ ti tăng rah mâu trâp, tơnêi ki poh, rơbĕn, lĕm ƀă hnối bliu dêi lâp tơnêi. Rơnuâ dêi tơná rế ‘mêi, rế xâu xía, rế môi tiah kiâ mê ga rế lĕm.

Tung Tĭng lôi tơnâp kiâ mê pơklât thế ai Kiâ Trâp. Nâ Siu Thỏi, hdroâng mơngế Jarai a cheăm Ia Mơ Nông, tơring Chư Păh, kong pơlê Gia Lai, tối ăm ‘nâi:

“Tiô khôi túa dêi mơngế Jarai drêng pro Tĭng lôi tơnâp kiâ mê athế ai kiâ trâp. Xo trâp mê bliu dêi ngiâ chiâng Kiâ Trâp. Mơngế Jarai tối tiah kố, mâu Bram cho mâu mơhúa kiâ ki têm rơpiât, kring vế ăm mơngế hlâ mê châ hluăn ing mâu kiâ ‘mêi rơtôh ‘nêk mơ’nêa, lơ bro dêi châ chiâng mơngế ki hlâ chiâng mơngế ối rêh, rơtế hơniâp ro ƀă pơlê cheăm tâ tá a kơpong tơnâp kiâ”.

Nâ Rơ Chăm H’Xuyết, hdroâng Jarai rêh ối a cheăm Ia Mơ Nông, tơring Chư Păh, kong pơlê Gia Lai, tối ăm ‘nâi:

“Vâi pơxêh pro dêi châ chiâng kiâ trâp tung pơla po Tĭng lôi tơnâp kiâ. Drêng pro Kiâ Trâp vâi athế kơtoâ dêi ngiâ, kơtôa dêi inâi. Ngiâ méa rơnuâ pro chiâng kiâ trâp mê, vâi bliu dêi trâp a ngiâ lơ truâ kế hvo ki pro ƀă plông priât vâ kơtôa ngiâ dêi mơngế ki pro Kiâ Trâp. Kiâ trâp cho vâ mơhno tối ‘na mơngế ki hiăng hlâ vâ trâm, tơpui tơno ƀă mơngế ki ối rêh. Ngế ki châ rah pro Bram mê cho mâu ngế ki ai ivá mo rơdêi, châ kuăn pơlê loi tơngah. Tơdroăng ki bliu trâp athế rơkê, pro ti lâi vâ ăm mâu ngế ki ê ôh tá ‘nâi kơnó dêi tơná, tâng châ vâi kơnó ah xuân tơkéa vâ tối, mâu Bram ki mê ôh tá pêi pro klêi dêi hnoăng cheăng ƀă kô tro kiâ rup”.

Nâ Rơ Chăm Hà, hdroâng kuăn ngo Jarai, kuăn pơlê a cheăm Ia Mơ Nông, tơring Chư Păh, kong pơlê Gia Lai tối ăm’nâi:

 “Kiâ Trâp hmâ hlo ai a hâi Tĭng lôi tơnâp kiâ, hâi ki tiah hmâ ki ê ôh tá ai. Bu ai vâi kơnốu xo ki pro kiâ trâp, mâu vâi kơdrâi ôh tá pro kiâ trâp. Hmâ hlo ai mơngế ki hiăng kân ƀă vâi hdrêng ki pro kiâ trâp, ngăn tiô kơ tơdroăng pơkâ thế, xua tơdroăng ki rah xo dêi mơngế kăn ki pơkuâ a hâi tĭng lôi tơnâp kiâ mê. Hdrối nah, mơngế ki pro kiâ trâp vâi hmâ tĭng hên tơdroăng. Mơngế ki pro kiâ trâp ki hmâ hlo cho mơngế ki hiăng ai kơdrâi la kơdrâi hiăng hlâ, lơ mơngế hdrốu, ôh tá hâi ai on veăng”.

Mâu Bram đi đo châ koh mơnê nhuô̆m, athế ai khu tôu chêng koăng koh tơdah ing tíu ki vâi rơnuâ pro kiâ trâp troh a tơnâp kiâ. Klêi kơ’nâi pro kiâ trâp a tơnâp, mâu Bram pơtối vêh rêh ối, pêi cheăng tiah hmâ. Mâu ngế ki pro Bram rơtế ƀă vâi krâ-nhŏng o tung pơlê ôu kâ, kơhnhon xuăng, tơpui tơno hơniâp ro.

Nâ H’Uyên Niê, Phŏ Kăn hnê ngăn Khu vâi kơdrâi a cheăm Ia Mơ Nông tối ăm ‘nâi:

“Tơdroăng ki pro Kiâ trâp, ối tối cho Bram mê âi, hmâ ai tung tĭng lôi tơnâp kiâ, hâi ki xo xo ôh tá ai. Bram cho vâ mơhno tối mơhúa mâu ngê ki hiăng hlâ, vâi troh tơkŭm ôu kâ, hơniâp ro a hâi tĭng ki má mơ’nui. Tơkéa vâ tối hâi kơ’nâi mê, kuăn pơlê ôh tá chiâng djâ hmê kơchâi troh a tơnâp kiâ xếo. Bram cho mâu ngế ki păng ‘nâng la pơhlêh pro dêi tơná chiâng mơhúa, chiâng kiâ. Kiâ Trâp cho vâ mơhno tối tơdroăng ki trâm, tơpui tơno, prôk tâ tá tơnâp kiâ vâ tơpui tơno ƀă vâi krâ-nhŏng o hdroâng hdrê, rơpŏng hngêi roh má mơ’nui, vâ mơhúa vâi lăm rêh ối a kong ki ê”.

Mơngế Jarai tối dêi tiah kố, mơngế ki hiăng hlâ ƀă mâu ngế ki ối rêh xuân u ối tơdroăng ki tơrŭm tơpui tơno dêi pó. Rơnuâ pro dêi tơná chiâng Kiâ Trâp tung roh tĭng lôi tơnâp kiâ, mơhno tối hiâm mơno khíu pâ, hơ-ui mơjo, koh nhuô̆m dêi mơngế ki ối rêh ƀă mơngế ki hiăng hlâ. Vâi pói rơhêng vâ mơhúa dêi mơngế ki hiăng hlâ mê pơtối pring vế, rak ngăn, tŏng gum ăm mơngế ki ối rêh ai ivá mo rơdêi, pơlê pơla, cheăm bêng ai todroăng rêh ối phâi tơtô, hơniâp niân, ro rih.