Hâk veăng tâp kơhnhon rơtế ƀă mâu dêi pú a Hngêi mơhno túa lĕm tro droh rơtăm, phô̆m vâ xông kân, vâi hdrêng Dak Lak, o Nguyễn Thục Quyên, 13 hơnăm a bêng Ea Tam, pơlê kong kơdrâm Ƀuôn Ma Thuột ăm ‘nâi, drêng tâi hơnăm hriâm, o hiăng chiâng tơmiât pêi mâu tơdroăng vâ mâu hâi pơtê hriâm kố châ hơniâp ro ƀă ai pơxúa. Nôkố, Quyên hiăng hriâm tơ’nôm 2 lâm năng khiếu nếo a hngêi mơhno túa lĕm tro:

“Tung pơla khế ki kố á kô xah peăng xâk í ƀă hriâm mâu tơdroăng ki hriâm akố, ƀă 2 khế kơ’nâi ah á kô hriâm tơ’nôm a rơnó pơtê, hriâm Toán ƀă nâl Ănglê. Troh khế 8 á kô lăm Gia Lai xah hêi. Hơnăm kố á châ nôu á chêh inâi lăm prôk 5 hâi 4 măng a chuô Liên Trì a Gia Lai, vâ ăm á kơdroh iâ ki hơkăng tung tuăn mơno klêi kơ’nâi môi hơnăm hriâm”.

Và mâu vâi kuăn ‘nĕng ai môi rôh pơtê hriâm ai pơxúa, hên mâu nôu pâ xuân tí tăng ‘nâi plĕng ƀă chêh inâi ăm dêi kuăn veăng ai mâ tung mâu tơdroăng ki xah hêi. Tơdroăng ki xah hêi a rơnó pơtê hriâm a Dak Lak ôh ti xê pro ăm vâi o hơniâp, ro, hriâm pât kih năng mê ối tơmiât ăm vâi gum vâi kơdroh iâ ngăn mâu tơvi, phôn râng kŏng ƀă hbrâ ví ing mâu tơdroăng tro rong râ. Nâ H Duyệt Niê, a bêng Tân Lập, pơlê kong kơdrâm Ƀuôn Ma Thuột, kong pơlê Dak Lak ăm ‘nâi:

“Pơtê hriâm xuân rơhêng vâ pro tơ’lêi hlâu ăm muăn châ xah hêi, hơniâp ro, khên tơnôu tâ, ai hên mâu vâi pú ƀă hriâm ƀối châ hên tơdroăng. Kuăn á nôkố dế hriâm lâm Dance-kids, hriâm kơhnhon sap ing hơnăm nah troh nôkố, muăn hâk vâ kơhnhon mê á xuân ăm gá hriâm”.

A Hngêi mơhno túa lĕm tro Droh rơtăm mâu phô̆m vâ xông kân Dak Lak, ai lối 2.000 ngế mâu phô̆m vâ xông kân dế veăng hriâm a mâu lâm hriâm năng khiếu môi tiah kơxoăng, kơchuâ um, MC, pơtâp ivá, tơchok ƀă hên ki ê. Malối, tơdroăng “Học kỳ trong quân đội” hiăng pro lối hrĭng ngế hdrêng ing 8 troh 15 hơnăm ai rôh vâ châ mơnúa ngăn tung tơdroăng ki hriâm tâp kơtăng, ôh ti ai tơvi, ôh ti ai phôn. Nâ Nguyễn Thị Thúy Hiền, phŏ kăn pơkuâ Hngêi mơhno túa lĕm tro Droh rơtăm mâu phô̆m vâ xông kân Dak Lak tối:

“Rôh pơtê cho rơnó ki hngêi mơhno túa lĕm tro tơkŭm po hên mâu tơdroăng ki ai pơxúa. Lối 30 túa lâm hriâm po sap ing 5h30 troh 21chôu, tro ƀă hên ngế hok tro sap ing 2 hơnăm ngi klêng. Hơnăm kố, pakĭng ối rak mâu môn ki hriâm tiah hmâ môi tiah hdrối nah ‘na kơvâ túa lĕm tro, ngê̆ thuât, tơ’noăng ivá, tơdroăng ki rêh kâ ối mê ngin ối tơtrŏng troh tơdroăng ki hriâm tê kơtê, mâu tơdroăng ki xah hêi rơkê plĕng, pêi mơnúa ‘na tuăn mơno, tơtrŏng hbrâ mơdât klâk têa ƀă trâm mâu tơdroăng xâu xía rong râ ăm mâu vâi o”.

A mâu pơlê cheăm, mâu vâi o phô̆m vâ xông kân Dak Lak dế pơxiâm mot tung rơnó pơtê hriâm ki hơniâp ro. O H’Juliê Ƀyă, 9 hơnăm, a cheăm Ea Tul, tơring Čư̆ Mgar tối, rôh pơtê hriâm kố cho rôh vâ o châ hriâm tung mâu tơdroăng ki o hâk vâ. Ôh ti êa lăm hriâm a hngêi trung mê o ai chôu vâ hriâm tơ’nôm mâu môn ki xah hêi hơniâp ro.

“Tung pơla pơtê hriâm, á hriâm nâl Ănglê, Toán, hriâm MC, hriâm chêh, hriâm tiê Piano. Mê cho mâu môn ki á hâk vâ. Pakĭng mê, mâu rôh ki doh chôu, á pơchuât hơ’muăn mâu mơ-éa ƀă xah hêi ƀă mâu pú tung tíu ki á ối”.

Mot tung rơnó pơtê xuân cho rôh tơkŭm po Khế tŏng gum vâi hdrêng, xua mê, mâu tơdroăng rak vế, rak ngăn ivá châ chăn ƀă hnê hriâm vâi hdrêng rế hía rế châ tơtrŏng tơmâng. Hơnăm kố ƀă inâi “Kơjo liăn ngân vâ pro klêi mâu tơdroăng pơkâ pêi xua vâi hdrêng”, sap ing tơdế khế 5, Vi ƀan hnê ngăn kong pơlê Dak Lak hiăng pơkâ tơbleăng Khế pêi pro xua gum vâi hdrêng. Tung khế 6, Dak Lak tơbleăng “rơnó pơtê hriâm xua vâi hdrêng” ƀă mâu tơdroăng ki hnê tối hnê hriâm hnê klê têa, hbrâ mơdât tro klâk têa ăm hok tro tung lâp kong pơlê.

A mâu tíu kuăn pơlê ối, Đoân droh rơtăm xuân po mâu rôh trâm mâ rơnó pơtê hriâm ăm mâu vâi o phô̆m vâ xông kân a tíu vâi ối tơkŭm po hên tơdroăng xah hêi, ki hơniâp ro. Nâ Phan Thị Trinh, Phŏ Kăn pơkuâ hnê ngăn Đoân kong pơlê Dak Lak, ăm ‘nâi:

“Thăm tơrŭm ƀă mâu kơvâ cheăng vâ tơbleăng pêi pro ƀă tŏng gum mâu tơdroăng ki ai tơdjâk troh vâi hdrêng. Thăm mơnhông hnoăng cheăng hbrâ mơdât a mâu pơlê cheăm tíu vâi ối vâ mâu vâi o châ xah hêi pêi pro mâu tơdroăng ki hơniâp ro tung rơnó pơtê hriâm châ rak vế tơniăn lĕm. Pơtối tơbleăng pêi rôh mơhnhôk, xua mâu vâi o hâk nhuô̆m, tơkŭm tung mâu tơdroăng ‘na diâp liăn hriâm rơkê lơ pơkâ thế pro ƀă ‘mâi rơnêu mâu kế tơmeăm ki xah hêi ăm mâu vâi o, malối cho a mâu kơpong hngế hngo ƀă mâu tíu ki xơpá”.

Ƀă tơdroăng ki tơdjuôm ivá dêi rêm râ, mâu kơvâ cheăng, ƀă ing tơdroăng ki hbrâ rơnáu dêi mâu nôu pâ, mâu vâi o phô̆m vâ xông kân Dak Lak dế ai môi rơnó pơtê hriâm hơniâp ro khât, tơniăn ƀă pơxúa. Rêm tơdroăng ki xah hêi, rêm tơdroăng ki xah hêi ôh ti xê cho tơdroăng ki ro, mê ối cho tơdroăng ki djâ vế vâ mâu vâi o khên tơnôu, hlê plĕng tâ klêi tơkâ luâ mâu rơnó pơtê hriâm.