Tung toăng hngêi nếo kân lĕm rơdâ, pôa Y Tơn, hdroâng kuăn ngo M’Nông, ối a ƀon Dak Sak, cheăm Dak Sak phiu ro xua tơdroăng rêh ối rơpŏng hiăng pơhlêh. Pôa Y Tơn tối ăm ‘nâi, kố cho tơdroăng châ tơƀrê dêi troăng vâ hluăn ing kơtiê krá tơniăn ƀă tơdroăng tŏng gum dêi khu râ kăn pơkuâ pơlê, ki rơhêng vâ tối cho tơdroăng tŏng gum tá hiâm mơno dêi mâu đảng viên tung chi ƀô̆ pơlê. To lâi hơnăm ahdrối, lối 2ha chiâk deăng ki hên pêt pôm loăng, ôh tá kâi păn rơpŏng hngêi bu to lâi ngế. Laga nôkố, xuân 2 hectar kố, rơpŏng pêt kơphế, plâi sầu riêng, plâi mít, xua mê rơpŏng pêi lo liăn tơniăn.

‘’Châ Tơnêi têa tơmâng tŏng gum, châ Chi ƀô̆ pơlê hnê mơhno ƀă châ mung liăn ngân hngêi arak liăn kum rêh ối pơlê pơla xua mê rơpŏng ai liăn vâ mơnhông pêi kâ. Nôkố hiăng pêt kơphế ƀă hên loăng plâi kâ, mâu troăng pêi lo liăn tơniăn, tơdroăng rêh ối xuân chía hôm tâ, ai liăn vâ xông mơ-eăm’’.

Rơtế ƀă tơdroăng pêi, tơdroăng xăm kơklêa, kơdroh kơtiê, mâu kơxô̆ liăn kum rêh ối pơlê pơla, tơdroăng mâu khu râ kăn pơkuâ hnê ngăn Đảng ƀă tá khu cheăng kal kí tung roh kum mâu rơpŏng kơtiê ƀă mâu troăng pêi, troăng pêi ki pơxúa hiăng kum tơdroăng kơdroh kơtiê châ tơƀrê. Cho đảng viên, mô đô̆i hneăng hdrối nah ki loi tơngah, mê cho hâi ki lâi krâ pơlê Y Bleng, hdroâng kuăn ngo M’Nông, ối a ƀon 9, cheăm Krông Nô, xuân rơtế khu pơkuâ troh lăm pôu mâu rơpŏng kơtiê tung pơlê, tơpui tơno túa ki rơkê tơtro tơdroăng rêh ối ƀă pêt mơjiâng tơmeăm.

Pôa Y Bleng, Krâ pơlê  tối ăm ‘nâi, tung 5 đảng viên, 5 rơpŏng ki kro mơdrŏng kô kum môi rơpŏng kơtiê. Mâu rơpŏng kơtiê châ râng kŏng hnê cheăng pêi, rế ai ivá mơhnhôk ‘na kế tơmeăm khoăng, rế châ mơhnhôk ‘na hiâm mơno vâ kơdo mơ-eăm.

‘’Nhŏng o thế mơhnhôk dêi pó, mơhnhôk kuăn pơlê tơrŭm môi tuăn, mơnhông cheăng kâ. Ôh tá xê bu to mô đô̆i hneăng hdrối nah tê ôh, mê mô đô̆i hneăng hdrối nah thế mơhnhôk kuăn pơlê, xuân thế lăm ngăn rơpŏng kơtiê, đi đo môi tiah mê. Hngêi ki lâi ai kơbố pá puât mê xuân thế tơkŭm mơhnhôk dêi pó, nhŏng o kro mơdrŏng ai tơmeăm mê rơtế veăng kum rơpŏng ki pá puât’’.

Troăng pêi mâu đảng viên kum dêi pó rơpŏng kơtiê mơ-eăm hiăng châ po rơdâ a hên pơlê, thôn kơtâu dêi kong pơlê Dak Nông ton, kong pơlê Lâm Đồng nếo. Hrĭng rơpŏng kơtiê dế châ mâu khu pú hên đảng viên a mâu tíu pêi cheăng, mâu chi ƀô̆, mâu đảng viên a thôn, pơlê tŏng gum vâ rĕng hluăn ing kơtiê. Jâ Vương Thị Hiền, cho Phŏ Kăn hnê ngăn Vi ƀan Măt trâ̆n Tơnêi têa cheăm Dak Ndrung, tơring Dak Song hdrối nah tối ăm ngin‘nâi, ƀă tơdroăng ki veăng dêi mâu đảng viên a hên râ, ing thôn troh cheăm, tơring, rơtế ƀă tơdroăng ki veăng dêi mâu khu tê mơdró, khu ngế tŏng gum, xua mê mơngế pêi cheăng ăm rêm rơpŏng kơtiê cho ki xiâm.

‘’Châ khât păng ‘nâng tơdroăng rêh ối kuăn pơlê ối hên pá puât, vâi tá hâi tŭm hên tơdroăng xua mê túa ki rơkê tơtro cho ôh tá kơtâu kơxô̆ mê tơkŭm a ki dâi lĕm. Xua môi rơpŏng kơtiê mê thế tŏng gum hên tơmeăm, ôh tá xê bu tŏng gum kơxô̆ liăn cho vâi hluăn ing kơtiê ôh. Vâ ví tơdroăng vêh kơtiê mê pơlê hiăng kum tâi tâng, kum hên tơdroăng vâ vâi păng ‘nâng châ hluăn ing kơtiê’’.

Pêi pro tơdroăng xiâm tơnêi têa ‘na kơdroh kơtiê, khế 12/2021 Tĭnh ủy Dak Nông ton tơbleăng Pơkâ kơxô̆ 13 ‘na tơdroăng kơdroh kơtiê hneăng hơnăm 2021 – 2025, mơnhên troăng prôk troh hơnăm 2030. Pơkâ kơdroh ki vâ iâ 3% rơpŏng kơtiê rêm hơnăm, ƀă kơpong hdroâng kuăn ngo cho 5% rêm hơnăm, hên tâ châ péa xôh pơkâ dêi tơdroăng xiâm tơnêi têa. Mơnhông hnoăng dêi mâu khu râ kăn pơkuâ hnê ngăn cheăng Đảng, mâu khu pêi cheăng Đảng a pơlê, mâu chi ƀô̆, mâu đảng viên châ kong pơlê tơmâng hên.

Kơnôm ti mê, 5 hơnăm hiăng hluâ, kong pơlê Dak Nông ton đi đo châ ƀă hluâ pơkâ pêi kơdroh kơtiê, cho kong pơlê rĕng má môi kơpong Tây Nguyên ƀă cho môi tung mâu kong pơlê kơdroh kơtiê rĕng má môi lâp tơnêi têa. Pôa Ngô Thanh Danh, kăn pơkuâ hnê ngăn hceăng Đảng kong pơlê Dak Nông ton tối ăm ‘nâi.

‘’Pêi pro mâu kơxô̆ liăn, pêi pro tro mâu troăng hơlâ kum hdroâng kuăn ngo, troăng hơlâ kơdroh kơtiê krá tơniăn, mơjiâng thôn pơlê, tiô troăng mơnhông krá tơniăn. Pêi pro tro mâu tơdroăng xiâm tơnêi têa ‘na mơnhông cheăng kâ – rêh ối pơlê pơla kơpong hdroâng kuăn ngo ƀă kong ngo, kơjo tơkŭm kơxô̆ liăn ăm mơ’no liăn hceăng mơnhông ƀă kêi đeăng hngêi trăng troăng klông, hngêi ối, tơnêi ối, tơnêi pêt mơjiâng tơmeăm’’.

Pơkâ kơxô̆ 05 hơnăm 2021 dêi Khu pơkuâ tơdroăng cheăng Đảng mơnhên, tơdroăng kơdroh kơtiê krá tơniăn cho troăng hơlâ kân, ki kal, môi tuăn sap apoăng troh tá tui lui, pêi đi đo tung tơdroăng pêi pro roh pơhlêh nếo, mơjiâng ƀă mơnhông tơnêi têa. Tơdroăng pêi pro a Dak Nông pơla kố nah ăm hlo, tơdroăng ki kơtăng ing Pơkâ dêi Tĭnh ủy troh mâu tơdroăng pêi pro nôkố a tíu pêi cheăng, a pơlê hiăng kum tơdroăng kơdroh kơtiê châ tơƀrê. Tơdroăng pơhlêh nếo ing hnoăng cheăng dêi khu râ kăn pơkuâ khu pêi cheăng Đảng hiăng troh mâu đảng viên ƀă djâ châ tơƀrê păng ‘nâng tung tơdroăng kơdroh kơtiê.