Vế rơxế tuh tuh kơtâu drô troăng hiăng toh kơxu tơdrăng lĕm, chơ lối 2.000 xiâm  hdrê loăng kơphế ƀă 300 xiâm hdrê loăng mắc ca lo ing kơdrum ki mơdâ djâ lăm pêt dêi a chiâk ki loăng plâi hôt oh tá ai plâi hên xếo, pôa Điểu Đi, Bon Bu Păng 2, cheăm tơkăng kong Quảng Trực, kong pơlê Lâm Đồng hâk phiu ro. Kơnôm  Tơnêi têa ‘no liăn mơjiâng pro mê chiâng ai troăng lĕm phuâng, tơ’lêi hlâu prôk lăm. Mâu tơmeăm khoăng hiăng pro klêi, mâu tơdroăng tơkêa pro kơjo pêi cheăng châ kâ tơbleăng, rơpŏng pôa Điểu Đi ƀă kuăn pơlê tung cheăm xuân ing mê châ  xông tơƀrê tung cheăng kâ rêh ối.

“Mơnê Đảng, mơnê Tơnêi têa hiăng kum kuăn pơlê ngin ai hmê kâ, ai ếo xâp ƀă mơjiâng pro hngêi lĕm. Tơdroăng rêh ối hiăng tơniăn, nôkố bú tơmâng to mơnhông cheăng kâ, kuăn pơlê đi đo pêi pro tiô troăng hơlâ dêi Đảng ƀă luât tơnêi têa tê”.

Pôa Nguyến Văn Anh, Kăn hnê ngăn Vi ƀan kuăn pơlê cheăm Quảng Trực, ăm ‘nâi, tơrŭm ƀă tơbleăng mâu tơdroăng, tơdroăng tơkêa bro, kong pơlê hiăng tơkŭm hnê kuăn pơlê pơ’lêh hdrê pêt, mơnăn păn tơtro ƀă tơnêi tíu, hyôh kong prâi. Ing kơxô̆ liăn no pêi cheăng dêi Tơnêi têa, ƀă mâu túa pêi cheăng tơtro tơdrêng ƀă mơ-eăm dêi kuăn pơlê a tíu tơkăng kong mê hiăng kơdroh hên kơxô̆ rơpŏng kơtiê.

“Pơlê cheăm pơtối hnê trâu rơdâ tơdroăng Pơkâ hneăng hôp Đảng rêm râ, ing mê tơbleăng tơdrêng mâu tơdroăng, pơkâ hdró, tơdroăng tơkêa bro ‘no liăn cheăng ƀă pơtối hnê, mơhnhôk kuăn pơlê kơhnâ pêi cheăng, kơdroh kơklêa xăm kơtiê.  Mơ-eăm mơjiâng chiâng tíu ki mơnhông, hlŭn kơtiê tung hơnăm 2025”.

‘Na tơdroăng pêi tơƀrê tung plâ lối 20 hơnăm mơjiâng kong pơlê Dak Nông (ton), pôa K’Khet Atô, kăn hnê ngăn Kuăn ngo ƀă loi tĭng tiô khôp ăm ‘nâi, pơla hơnăm 2004 troh khế 6/2025, Dak Nông châ Tơnêi têa ’no dâng 2.800 rơtal liăn ăm 3 tơdroăng pơkâ dêi tơnêi têa. Tơdrêng ƀă kơxô̆ liăn lối 820 rơtal liăn, mâu kơxô̆ liăn ‘no pêi cheăng  châ pêi tro tơdroăng,  hiăng kum tơdroăng xăm kơtiê ai pơxuá tơƀrê

“Châ tơmâng khât dêi Đảng, Tơnêi têa ƀă Kuô̆k hô̆i  hiăng tơbleăng pơkâ pêi 3  tơdroăng pơkâ dêi tơnêi têa tung kơpong kuăn ngo, kong ngo. Kuăn pơlê mâu hdroâng kuăn ngo hiăng ‘no ivá tơ’noăng pêi cheăng, pêi chiâk deăng pê lo tơmeăm, kơdroh xơpá , hrâ mơnguâ, vâ dêi pơlê cheăm hlŭn ing kong pơlê kơtiê xơpá''.

Pơla hơnăm 2021 troh nôkố, rêm hơnăm kơpong tơkăng kong dêi kong pơlê Lâm Đồng (Dak Nông hdrối nah (kơdroh lối 3%. tơdroăng đi đo pơkuâ  kơpong Tây Nguyên ƀă cho tung khu apoăng dêi Tây Nguyên cho tung khu apơoăng dêi tơnêi têa ‘na kơdroh kơtiê, hiăng ăm hlo ki mơ-eăm ƀă mâu tơdroăng pêi ai pơxúa  dêi kong pơlê tung tơbleăng mâu pơkâ dêi tơnêi têa, mơnhông krá kơpong kuăn ngo ƀă kong ngo./.