A Tíu xiâm pơkuâ tơnêi têa cheăm Hòa Phú, kong pơlê Dak Lak, mâu hâi apoăng khế 7 hiăng ai hên kuăn pơlê pêi pro mâu mơ-éa tơnêi têa. Klêi pro hô sơ tơdrêng tung um tiô troăng hyôh măng ƀă tơdah phĭu hiăng klêi pro, pôa Nguyễn Thế Lâm, a thôn 9, cheăm Hòa Phú, tối, mơhé cho mâu hâi apoăng pêi cheăng tiô troăng nếo laga hiăng ai pơhlêh hên tung pro mơ-éa tơnêi têa.

‘’Ki lĕm tro má môi ƀă á hlo cho phá tâ hdrối nah, mê cho hdrối nah thế tơkôm, lêi mê tâi tâng mơ-éa pro hên troăng klêi mê pơtroh a kố, pơtroh a tíu tá laga nôkố cho xúa kŏng ngê̆ dế pêi pro tung tơdroăng cheăng, rêm tơdroăng cheăng rêm hâi dêi pin. Xúa kŏng ngê̆ tung pro mơ-éa châ pro rĕng tơtro ƀă châ tơƀrê hên’’.

Môi tiah mê, a Tíu xiâm pêi cheăng tơnêi têa bêng Ƀuôn Ma Thuột, kong pơlê Dak Lak, kuăn pơlê ối pơtâng vâ ƀok kơxô̆ pêi pro mâu tơdroăng pro mơ-éa tơnêi têa. Pôa Vũ Đức Hưởng, ối a bêng Ea Kao, kong pơlê Dak Lak tối ăm ‘nâi, mơhé ‘nâi hâi kố khu râ kăn pơkuâ 2 râ păng ‘nâng pêi cheăng, tŭm tâi tâng mơ-éa kô chiâng tơdrêng pro a bêng tíu pin rêh, laga xua tơdroăng ki hmâ xua mê pôa xuân troh tíu xiâm pêi cheăng tơnêi têa ton dêi pơlê kong kơdrâm Ƀuôn Ma Thuột hdrối nah vâ pêi pro mơ-éa. Pôa môi tuăn ‘nâng xua mâu mơ-éa pơrá pro xúa kŏng ngê̆ tâi tâng, ing khâu ƀok kơxô̆ ki hdrối mơ’nui troh drêng mơngế pêi cheăng tơdah hô sơ, mơdrếo tơdroăng ki hiăng klêi.

‘’Á to a kố vâ pơhlêh mơ-éa khêi chiâng mơ-éa tum. Xua tíu kố hiăng pêi hmâ klêi mê vâi pêi cho rĕng xua mê á troh a kố. Tối tơdjuôm chư gá pro tơ-ê iâ, tơdroăng cheăng gá xuân phá tơ-ê iâ laga chôa ‘lâng xuân hmâ. La ngiâ mơni kăn ƀô̆ hnê mơhno mê pin ‘nâi cho tíu ối a lâi pêi alâi mê kô tơ’lêi hlâu tâ. Ƀă nôkố nếo hâi apoăng mê á xuân troh tíu ton vâ pro mơ-éa tê’’.

Mâu hâi hiăng hluâ, tâi tâng kuăn pơlê troh mâu tíu xiâm tơnêi têa a mâu cheăm, bêng a Dak Lak vâ pro mâu mơ-éa tơnêi têa ki kal, môi tiah: mơ-éa khai sanh, mơ-éa mơnhên hiăng hlâ, ƀaoh hiêm khăm pơlata, kĭ mot hriâm, mơnhên tíu ối, pro mơ-éa kĭ tơnêi ƀă hía hé. Vâ tŏng gum kuăn pơlê, mâu kăn ƀô̆, nhân viên a tíu xiâm tơnêi têa xuân hiăng mơ-eăm châ achê, pro hmâ ƀă kŏng ngê̆ xúa tơdjuôm tung pơkuâ tơnêi têa 2 râ.

Pôa Nguyễn Đăng Huy, ngế pêi cheăng Tíu xiâm peie cheăng tơnêi têa cheăm Hòa Phú, kong pơlê Dak Lak tối, sap ing mơnúa pêi troăng pêi nếo, mâu kăn ƀô̆, nhân viên tíu xiâm ôh tá ai hâi pơtê. Tâi tâng pêi cheăng troh a kơmăng vâ tơdâng tơ’mô mâu ‘noăng chư chêh, xúa kŏng ngê̆ chiâng, tơxâng kal vâ dêi kuăn pơlê.

‘’Tâi tâng mâu nhân viên pêi cheăng a Tíu xiâm tơnêi têa cheăm Hòa Phú nếo troh ing hên kăn ƀô̆ xua mê tơdroăng câp nhâ̆t, ‘nâi, xúa kŏng ngê̆ mơnúa mê tơnaiwn laga drêng mot pêi sap ing kơxo má troh nôkố mê xuân ai mâu tơdroăng ki ‘noăng chư chêh tơdjâk troh kŏng ngê̆ pro mơ-éa ối nếo xua mê tơdroăng câp nhâ̆t, pro xuân trâm pá, laga nhŏng o xuân dế mơ-eăm tah lôi mâu tơdroăng pá puât mê’’.

A mâu cheăm, bêng a kong pơlê Dak Lak tung mâu hâi kố, mâu khu ki pêi cheăng ‘na phân mêm ƀă nhân viên kih thuât dêi Viê̆n thông Dak Lak (VNPT) troh gum tơdrêng kăn ƀô̆ viên chưk xúa kŏng ngê̆ pro mơ-éa tơnêi têa xuân môi tiah tŏng gum kuăn pơlê troh pêi pro mâu mơ-éa ki kal.

Tiô pôa Nguyễn Nam Quốc, Kăn pơkuâ Viễn thông Dak Lak, tíu pêi cheăng xuân châ tŏng gum xúa mâu ‘noăng chư chêh kum kuăn pơlê kô chiâng pêi pro mâu mơ-éa tơnêi têa tơdrêng tung troăng măng. Ƀă kong pơlê Dak Lak nếo, tơdroăng hnê pơtâp, hnê mơhno kăn ƀô̆, nhân viên mâu tíu pêi cheăng cheăm, bêng tung xúa kŏng ngê̆ tơdjuôm hiăng châ pêi pro sap ing hdrối, ki rơhêng vâ tối ƀă mâu cheăm, bêng ối tung kong pơlê Phú Yên hdrối nah, vâ drêng pơhlêh xúa kŏng ngê̆ xúa tơdjuôm nếo mê vâi kô chiâng pêi tơdrêng tíu pêi cheăng. Pôa Nguyễn Nam Quốc tối ăm ‘nâi:

‘’Môi tiah a kong pơlê Dak Lak, rêm tíu cheăm bêng mê pơrá châ xing xoăng ki vâ iâ 2 chuyên viên ‘na phân mêm ƀă môi nhân viên kih thuât vâ hbrâ tŏng gum, ôh tá ăm ai tơdroăng ki hía tơpui, hía tơdjêp kơmăi kơmok ki lâi a tíu tơdah kuăn pơlê. Pakĭng mê VNPT Dak Lka xuân dế mơjiâng mâu group tŏng gum tơdrêng ƀă mâu kơxô̆ phôn hotline vâ tâi tâng mâu tíu ki ai tơdroăng ki ôh tá tơniăn ki lâi ‘na tơdjêp hyôh măng, xuân môi tiah tơdroăng kum kuăn pơlê mê ai trâm pá mê kô châ tŏng gum teăm tơdrêng má môi’’.