Roh hôp Khu râ kăn xiâm BRICS 2025 pơxiâm po kơxo lơ 6/7 (tiô chôu a kong têa vâi), a pơlê kong kân Rio de Janeiro, Brazil.

Kố cho roh apoăng Việt Nam veăng ƀă cho Tơnêi têa tơrŭm a Roh hôp khu râ kăn xiâm BRICS, môi troăng tơrŭm hên pâ pơla mâu kong têa cheăng kâ nếo ô eăng ƀă rế ai tơdjâk kân tá ‘na cheăng kâ ƀă kal kí.

Hneăng hôp khu râ kăn xiâm BRICS 2025 dó inâi ‘’Thăm tơrŭm peăng Hdroh vâ mơdêk pơkuâ tâi tâng ƀă krá tơniăn tâ’’, cho môi tung mâu tơdroăng ki kal hên pâ kal khât, ai tơdroăng ki veăng dêi 20 khu râ kăn pơkuâ râ xiâm mâu kong têa, kăn xiâm chêh tôm xo rơkong Khu lâp kong têa ƀă khu râ kăn pơkuâ hên khu tơrŭm lâp plâi tơnêi.

Pôa Phạm Minh Chính, Ngế pro xiâm hnê ngăn tơnêi têa veăng ƀă xông tơpui a Roh tơpui tơno râ kăn xiâm ‘na dó inâi: Thăm pêi pro troăng prôk hên pâ, mâu tơdroăng cheăng kâ, liăn ngân ƀă tuăn ngôa rơkê; Kong prâi, COP30 ƀă khăm pơlât lâp plâi tơnêi; ƀă veăng Tơbleăng pơtâng tối Khung dêi mâu khu râ Kăn pơkuâ ‘na kong prâi ƀă Pơxiâm pêi pro khu tơrŭm BRICS ‘na Mơdât pơreăng pơlê pơla.

Tung péa hâi tơkŭm po roh hôp, mâu kong têa ối tung khu tơrŭm dêi BRICS tơkŭm a mâu tơdroăng pơxá vâ thăm tơrŭm tung mâu kơvâ môi tiah: khăm pơlât, tuăn ngôa rơkê ƀă kong prâi hơ’lêh.