Jơnŭm pơtrŭt hŏk pơhrăm Việt Nam đei pơjing khei 10/1996. Truh dang ei, Jơnŭm đei vă jê̆ 27 triu ‘nu bơngai jang, pơjing khul jang tơ̆ jơ̆p tơring, tơgŭm ăn tơdrong pơtrŭt hŏk pơhrăm, pơjing tơpôl hŏk pơhrăm roi đunh roi tŏk pran. Tơ̆ jơ tơƀâp, tang măt ăn kơdră chĕp kơ̆l Đảng, Teh đak, Kơdră teh đak Lương Cường pôk pơ ư, tơchĕng ‘lơ̆ng dôm tơdrong tơgop tôch đei yoa đơ̆ng đe kăn ƀô̆ pơtrŭt hŏk pơhrăm.

Kơdră teh đak pơma hơdăh, đơ̆ng đei pơjing truh dang ei, Đảng, Teh đak păng Ƀok Hô ‘mêm kơ ang hơnơ̆ng tơrek truh tơdrong pơm hơtŏk đon hlôh vao ăn kon pơlei, pơtho pơhrăm khul bơngai jang, pơtho ming bơngai rơgei. Năng tơdrong pơtho pơhrăm jĭ “Trong jang gĭt kăl tơm kơ teh đak”, jĭ trong jang ưh đei tơplih păng hơnơ̆ng lơ̆m tơdrong pơjing păng atŏk tơiung teh đak. Tơdrong pơjing Việt Nam jing teh đak hŏk pơhrăm, lơ̆m noh rim kon pơlei đei tơdrong ‘lơ̆ng vă hŏk pơhrăm ngăl ưh lăp tơdrong tôch ‘lơ̆ng đĕch mă oei jing nơ̆r athei tôch gĭt kăl vă hơtŏk kơsư̆k pơjei ăn teh đak, tưk tơiung bơngai rơgei păng hơmet kơjăp jơhngâm pran hơdrĕch hơdrung vă yak mât lơ̆m chăl ‘nao.