Tơ̆ siêu thị Co.opMart Pleiku, dêh char Gia Lai, tơdrong tĕch răt iơ iơ̆r iơ iăr. Dôm hơdrơ̆r tơmam drăm tĕch mơdro đei hơmet ăn ‘lơ̆ng, rơgoh hăm tôm tĕch tơmam drăm đơ̆ng tơmam drăm sa, tơmam drăm yoa truh rim tơmam drăm kăl anai. Dôm tơmam drăm đei dăr lăng hơlen hơdrol vă pơdă tĕch mơdro, sơđơ̆ng băt hơdăh hơnih pơm tơlĕch. Yă Châu Hoàng Thy, Kơ iĕng Kơdră chĕp pơgơ̆r siêu thị Co.opMart Pleiku, tơbăt:  “Tơ̆ siêu thị tơmam drăm tôch kơ lơ, dôm tơmam drăm đơ̆ng rim hơnih pơm tơlĕch ‘lơ̆ng liĕm đei hla bơar tơchơ̆t ‘lơ̆ng ISO 9000, dôm tơmam drăm ‘lơ̆ng hơ iă hloh. Nhôn hơnơ̆ng lăng kơjăp ăn bơngai răt yoa, găh vei lăng tơdrong ‘lơ̆ng tơmam drăm đơ̆ng răt tơmơ̆t truh tơ̆ tơdrong chă pơdă, tĕch mơdro jĭ tôch ‘lơ̆ng hơ iă, ưh kơ lê̆ tơmam drăm chă kơ ƀyĭp, kơbrơ̆p, kĭ pơkăp răt iŏk hăm hơnih tĕch đei hla bơar pơkăp kơ yuơ hơnih bơ̆ jang Teh đak ƀơk ăn”.

Ưh khan lăp hơdrô̆ tơ̆ rim hơnih siêu thĭ, tơdrong sơđơ̆ng tơm a la chă tơmam drăm jei đei rim hơnih tĕch mơdro lơ̆m tơring lăng kơjăp. Mŏ Trần Kim Huế, tơ-‘ngla hơnih tĕch mơdro tơmam drăm Sơn Huế tơ̆ thĭ trân Chư̆ Ty, apŭng Đức Kơ, pơma tơbăt jơhngơ̆m đon hơpơi ‘meh vă khul bơ̆ jang kăl dăr lăng kơjăp hloh dơ̆ng tơdrong đe chă tĕch mơdro tơmam drăm online păng tơmam drăm đơ̆ng teh đak đe vă vei lăng năng tông ‘lơ̆ng ăn bơngai mơdro sa. “Ĭnh tĕch mơdro dôm tơmam drăm Kŏng ty ba ăn, đei hla bơar tơchơ̆t rơgoh ‘lơ̆ng tơmam drăm ‘noh ba mă răt tơmơ̆t. Tơmam drăm ưh kơ băt hơnih pơm tơlĕch ‘noh ba ưh kơ răt tơmơ̆t ôh kơ yuơ hrei ou kon pơlei chă răt tơmam drăm jei hlôh vao kơtang, tơdăh ba răt tơmơ̆t dôm tơmam drăm ưh kơ băt hơnih pơm tơlĕch lei đe ưh kơ ‘meh răt ôh."

Lơ̆m jơ ‘năr iung jang kơtang đơ̆ng năr 15/5 truh năr 15/6, khul bơ̆ jang kơ dêh char Gia Lai hlôi ƀôh 90 ‘măng đe pơm glăi, xek tơlang phak kăp jên hloh 1 ti 700 triu hlak jên. Mă kăl, Kŏng ang dêh char hlôi ƀôh păng tơkêng rôp 2 ‘măng đe tĕch mơdro, pơm tơlĕch chehphe ya. Mĭnh ‘măng đei ƀơm truh phŏng păng tơmam drăm pơ yoa ăn choh jang sa jei tŏk bŏk hơnơ̆ng dăr lăng hơlen vă xek tơlang kơhret. Ƀok Lê Hồng Hà, Kơdră chĕp pơgơ̆r Hơnih Vei lăng tĕch mơdro dêh char Gia Lai, tơbăt:  “Lơ̆m nơ̆r pơrô̆ jang đơ̆ng Thủ tướng Teh đak găh tơdrong pơgơ̆r iung jang kơtang ‘măng mă ou, dôm tơdrong jang tơm đei ƀơm truh tơmam drăm kon pơlei răt yoa nhen tơmam drăm sa păng tơmam drăm bek ‘lơ̆ng, pơgang ya tŏk bŏk ƀôh đe tĕch mơdro lơ. Khul kơdră chĕp pơgơ̆r păng khul jang gĭt kăl kơ dêh char Gia Lai akŏm lơ̆m dôm tơdrong mă ou. ‘Ngoăih kơ ‘noh dêh char jei pơrô̆ akŏm hơlen kơjăp truh tơdrong đak xăng, đak dou, phŏng, tơmam drăm pơ yoa ăn choh jang sa vă sơđơ̆ng kĕ tang găn păng vei lăng ‘lơ̆ng ăn kon pơlei păng hơnih mơdro sa tĕch răt lơ̆m tơring.”

Ưh khan lăp pơdơ̆h bơ̆t tơdrong mơdro sa, hơnih jang pơgang dêh char Gia Lai jei iung jang kơtang dăr lăng, xek tơlang pơm glăi. Hơnih vei lăng jang Pơgang dêh char hlôi pơjing 2 khul bơ̆ jang dăr lăng tơdrong tĕch mơdro pơgang, phơ̆m păng sơđơ̆ng rơgoh tơmam drăm sa. Hloh đơ̆ng dăr lăng tơ̆ rim tơring nhen pơlei tơm Pleiku, apŭng Đư̆k Kơ, Ia Pa păng thĭ xah Ayun Pa, hlôi ƀôh 5 hơnih pơm glăi. Rim tơdrong pơm glăi găh lơ ưh kơ pơm kiơ̆ kơdih tơbăt tơmam drăm, vei lăng ưh kơ ƀlep hăm nơ̆r pơkă tơ̆ tơpu păng ưh kơ đei kơƀang tơbăt hơnih vei lăng. Yă Ksor Hiền, Kơ iĕng Kơdră chĕp pơgơ̆r Hơnih vei lăng jang pơgang dêh char Gia Lai tơbăt:  “Lơ̆m khei năr kơnh, Hơnih vei lăng jang pơgang dêh char gô iung jang hơnơ̆ng vă vei lăng ‘lơ̆ng tơdrong ‘lơ̆ng kơ pơgang, tơmam drăm phơ̆m ăn kon pơlei lơ̆m dêh char. Hăm iung jang kơtang ưh kơ đei hơnih lon, xek tơlang ƀlep tơdrong tơchơ̆t, khul bơ̆ jang dăr lăng đei hơnih jang dăr lăng, hơnih jang vei lăng tĕch răt, kŏng ang lơ̆m khul ‘noh pơtôch dăr lăng xek tơlang jei đei tơroi tơbăt ăn kơdră kơpal vă pơjing tơdrong tơchơ̆t xek tơlang tơtom.”

Dôm tơdrong hơdrin iung jang kơtang đơ̆ng rim hơnih bơ̆ jang tơ̆ dêh char Gia Lai hlôi tơgop kơtang ăn pơm hơtŏk jơhngơ̆m đon hlôh vao kơ kon pơlei, hơnih mơdro sa lơ̆m tơdrong pơm kiơ̆ tơdrong tơchơ̆t khôi luơ̆t, adoi pơjing đei tơdrong mơdro sa ‘lơ̆ng hơ iă, sơđơ̆ng păng tơpăt ‘lơ̆ng.