Đơ̆ng rŏng hloh mơjĭt sơnăm tơlĕch jang kiơ̆, Tơdrong tơchơ̆t 42/2012 păng Tơdrong tơchơ̆t 64/2015 hlôi đei vă jê̆ 570.000 ‘nu bơngai jang ‘noh bơngai kon kông đei sơng iŏk kon jên tơgŭm djru akŏp hloh 1.270 ti hlak jên. Dôm trong jang tơgŭm ou tơgop pơjing đei tơdrong jang sơđơ̆ng, pơm hơtŏk bơngai jang hơgei păng pơtrŭt kơtang atŏk tơ iung mŭk drăm-tơpôl.

Mă lei, kiơ̆ yan ou tơlĕch jang kiơ̆ jei đei ƀôh tim mă gan ‘lơ̆ng hơ iă: tơdrong pơlăp jang kiơ̆ tim mă lơ lăp đei 13 lơ̆m 25 tơring jang kiơ̆ tơgŭm djru; kon jên tơgŭm ăn oei tŏ sĕt; jơ ‘năr kơđeh; pơm hla bơar mơmat tat pơm ăn hơnih mơdro sa tơnap mă sơng iŏk đei tơdrong tơgŭm djru ou; tơdrong jang tơgŭm djru tim mă lang să rim tơdrong jang nhen pơm tơlĕch tơmam drăm choh jang sa. Lơ̆m khei ‘năr bơngai năm jang đei tơplih kơtang, tơdrong hơmet ming ƀar tơdrong tơchơ̆t kơpal hlôi jing kăl hloh.

Tơ̆ hop akŏm, rim bơngai tang măt hlôi pơma tơgop tơpăt vă pơm pơkeh trong jang tơgŭm djru kiơ̆ trong tơpă păng jơnei hloh dơ̆ng.Yă Lương Thị Oanh, Kơdră chĕp pơgơ̆r Hơp tak xah Choh jang sa Ea Wy (apŭng Ea H’leo, dêh char Dak Lăk), tơbăt, Hơp tak xah ‘meh vă krao tơmơ̆t păng pơtho pơjing lơ bơngai jang ‘noh bơngai kon kông. Mă lei, kon jên tơgŭm djru dang ei oei tŏ sĕt, tơdrong pơih lăm pơtho pơjing tim mă trŏ lăp hăm tơdrong yan ou kơna bơngai jang ưh kơ ‘meh năm. Trong jang tơplih kăl lăng kơjăp hloh dơ̆ng truh tơdrong kăl kơ bơngai jang ‘noh bơngai kon kông. Yă Oanh akhan:“Mĭnh lăm đei hŏk pơhrăm tơgŭm ăn 5 truh 7 triu hlak jên, mă lei tơdăh pơdui đunh 3 khei lei gô pơm kơnê̆ truh tơdrong jang sa iŏk đei, tơdrong hơrih sa kơ bơngai jang-đe sư ‘noh jĭ bơngai jang tơm lơ̆m ŭnh hnam. Ĭnh apĭnh pơjing pơtho pơhrăm kơtă tơ̆ tơring hloi, tơjê̆ hơnih hơrih sa păng hơnih jang, vă bơngai jang chă hŏk răh, adoi gơ̆h chă năm jang hloi.”

Yă Huỳnh Thị Liên Hoa, Chĕp pơgơ̆r Hơnih Vat tơring-Hơnih tơm Pơprŏ Tơdrong jang păng Pơjing hơmet tơdrong choh jang sa găh Hơnih tơm vei lăng Choh jang sa păng Cham char tơbăt, trong bơ̆ jang tơgŭm djru hrei ou oei chă pơm hla bơar tôch kơ lơ, pơm ăn hơnih mơdro sa tơƀơ̆p tôch tơnap tap:“Athei tơƀôh hơdăh bơngai ‘noh bơngai kon kông jĭ tôch mơmat tat. Nơ̆r ou hrei ‘nou pă đei chih lơ̆m kăn kươk kon pơlei bơih, kơna hơnih mơdro sa măh pơm hla bơar tơbăt dơ̆ng păng chih tơmơ̆t dơ̆ng lơ hô sơ. Lơ̆m jơ ‘năr hơmet pơ ‘lơ̆ng tơdrong bơ̆ jang pơm hla bơar, trong jang tơgŭm djru kăl mă hiôk, jĭ lăp trŏ ƀlep hăm tơdrong tơchơ̆t vei lăng ‘lơ̆ng ‘noh hoei bơih. Hăm tơdrong tơplih kơsô̆ hrei ou, tơdăh hơnih bơ̆ jang vei lăng vang iung jang hơdoi hloi lei rŏ năng gơ̆h tơgŭm djru hơnih mơdro sa jang tĕnh koăng, ‘lơ̆ng hloh.”

Lơ bơngai tang măt athei pơih să dôm bơngai đei iŏk yoa sa hơpăh, pơtruh tơring tơgŭm djru truh tơ̆ tơring vă trŏ lăp hloh hăm tơdrong yan ou; adoi, trong jang tơgŭm djru kăl đei pơjing mă trŏ lăp hăm khôi luơ̆t păng tơdrong jang atŏk tơ iung tơring tơrang anai. Atŭm hăm ‘noh, kăl tơmơ̆t dơ̆ng tơdrong tơchơ̆t hơlen ‘lơ̆ng tơdrong tơmơ̆t bơngai jang đơ̆ng rŏng tơgŭm djru, pơtrŭt kơtang tơgoăt dih băl ƀar păh Hơnih mơdro sa-Hơp tak xah-Khul kơdră chĕp pơgơ̆r tơring, sơđơ̆ng kơjăp ‘lơ̆ng lơ̆m tơmơ̆t jên jang atŏk tơ iung tơring kon kông.

Hop akŏm đei lăng jĭ hơyak pơchoh trong kăl hloh, tơgop pơm pơkeh trong vă pơjing hơmet ming Tơdrong tơchơ̆t 42/2012 păng Tơdrong tơchơ̆t 64/2015 vă pơtruh ăn Thủ tướng Teh đak lăng hơlen lơ̆m khei năr kơnh. Trong jang tơm lăng truh ‘noh tơ iung pơjing trong bơ̆ jang trŏ lăp, ‘lơ̆ng, pơjing đei jơhngơ̆m pran đunh đai tai sơnăm ăn hơnih jang ŭnh hnam pơm tơm lơ̆m krao tơmơ̆t păng atŏk tơ iung khul jang lơ̆m tơring kon kông păng groi kông lơ̆m chăl hle. Ƀok Lê Đức Thịnh - Kơdră chĕp pơgơ̆r Hơnih bơ̆ jang vei lăng Mŭk drăm jang hơdoi păng Atŏk tơ iung tơring tơrang sơkơ̆t hơdăh:“Nhôn gô lăng hơlen kơjăp hloh dơ̆ng vă đei mĭnh tơnô̆ tơgŭm djru trŏ lăp, tơlĕch jang kiơ̆ trong jang mĭnh ‘măng, vă tơlĕch jang kiơ̆ ‘lơ̆ng tơdrong tơchơ̆t tơgŭm djru tơring kon pơlei kon kông pơjing rơvơn vă rim hơnih mơdro sa, hơnih jang mŭk drăm đei sơng iŏk rim tơnô̆ tơgŭm djru trŏ lăp hloh.”