Snăn, 231 čô knuă druh mâo leh bruă Đảng čar ruah mdưm jao bruă jing khua bruă Đảng, k’iăng khua bruă Đảng, lehanăn Khua knơ̆ng bruă sang čư̆ êa gưl ƀuôn hgŭm wưng thŭn 2025–2030, bi djŏ hŏng bruă čuăn sang čư̆ êa 2021–2026.

Năng mđing hĭn mâo 2 čô khua hlăn bruă Đảng čar mâo tiŏ nao păn ngă Khua bruă Đảng ƀuôn hgŭm anăn jing Nguyễn Xuân Phước, Khua hlăm bruă Đảng čar, khua bruă Đảng wăl krah An Khê êlâo dih, dưi tiŏ nao ngă khua bruă Đảng ƀuôn hgŭm Pleiku; Lưu Trung Nghĩa, Khua hlăm bruă Đảng čar, Khua knơ̆ng bruă lŏ hma lehanăn wăl hdĭp mda mâo jao ngă khua bruă Đảng ƀuôn hgŭm An Phú. 229 čô knuă druh mkăn jing phung khua kiă kriê dŭm boh kdriêk, wăl krah, ƀuôn leh bi kruh, lehanăn mơ̆ng dŭm knơ̆ng dhar bruă hlăm čar. Ti anôk bi kƀĭn, Bruă Đảng čar Gia Lai bi klă: Gưl ƀuôn hgŭm mrâo jing anôk ngă hră mơar lehanăn mă bruă kơ jih jang hdră êlan mơ̆ng Đảng lehanăn knŭk kna, tianăn mghaih msir jih truh 80% ênoh bruă ngă hră mơar hlăm alŭ wăl. Kyuanăn, hnơ̆ng kjăp, ai tiê đua klam mơ̆ng phung knuă druh knơ̆ng jing bruă klam bi sĭt kơ boh tŭ dưn bruă knuă./.