Ti Dak Lak, bruă klei mrâo cách mạng hnưm dưi mkŏ mjinh lehanăn đĭ kyar mơ̆ng dŭm thŭn tal 30 mơ̆ng ênuk gưl êlâo. Hlăm Sang mnă Ƀuôn Ama Thuôt mâo dŭm pŏk hră “Yuăn-Êđê”, “Xiềng Xích”, “Xích Sắt”, mâo Phan Đăng Lưu, Hồ Tùng Mậu mjing tur knơ̆ng lehanăn diñu pô mtam čih… Dŭm hră klei mrâo čih 4 pŏk mđơr hŏng kngan čiăng ênưih djă ba dlăng ƀiădah ăt rơ̆ng kjăp klei hgăm, mjuăt bi hriăm ai tiê cách mạng kơ phung mnă.

Hruê 1/5/1975, Sang mđung asăp Dak Lak (anăn pia êlâo mơ̆ng Sang mđung asăp – mđung rup Dak Lak) mphŭn mđung hdră. Hruê 15/1/1976, Sang kđăm mkra Hră klei mrâo Dak Lak dưi mkŏ mjing, hưn mthâo kơ ƀĭng găp hră klei mrâo tal êlâo djŏ hlăm wưng Têt Bính Thìn.

Mbĭt hŏng klei đĭ kyar kluôm mơ̆ng ala čar, hdră klei mrâo Dak Lak mâo leh dŭm knhuang đĭ kyar hơĭt kjăp. Ară anei mâo 54 anôk bruă klei mrâo dôk ngă bruă ti alŭ wăl čar.

Ti anôk kƀĭn trông, phung bi ala trông chai leh kơ dŭm klei lông dlăng mâo hlăm wưng mrâo, ba mdah dŭm hdră msir mkŏ mjing êpul mă bruă klei mrâo mkăp djŏ hŏng klei čiăng đĭ kyar mrâo. Hluê si pô mă bruă klei mrâo Đàm Thuần, Kơiăng khua čih mkra Hră klei mrâo Dak Lak, klei čiăng ƀrư̆ hruê ƀrư̆ đĭ mơ̆ng hdă mlih mrô, pô mă bruă klei mrâo brei rơ̆ng kjăp knhuah cách mạng, knhuah mă bruă.

 “Ară anei AI có mâo lu hdră kdrăp, phần mềm kyua anăn êngao kơ bruă nao dlăng ti anôk dôk mâo sĭt snăn drei ăt dưi ba yua lu kdrăp mơ̆ng AI čiăng đru ksiêm bi mklă klei hâo hưn. Mbĭt hŏng dŭm klei mĭn, kiêng dlăng, klei thâo kơ bruă kđi čar mơ̆ng pô mă bruă klei mrâo, klei djŏ klă mơ̆n klei mrâo, boh nik ba yua bruă klam yuôm mơ̆ng pô mă bruă klei mrâo cách mạng. Ba yua hla pŏk web ala ƀuôn lehanăn mjing hla pŏk web jing kdrăp đru, jing sa hdră čiăng ba klei hâo hưn, mtô mblang kơ bruă klei mrâo”.

Phung bi ala ăt bi mklă, hŏng alŭ wăl msĕ si Dak Lak, bruă mkăp klei hưn djŏ klă, pral truh kơ mnuih ƀuôn sang, boh nik ti krĭng taih kbưi, krĭng mnuih djuê ƀiă, amâo djŏ knŏng jing bruă klam yuôm bhăn ƀiădah lŏ jing klei đua klam bruă kđi čar, knhuah mơ̆ng sa čô mă bruă klei mrâo. Hdră klei mrâo cách mạng hŏng bruă klam jing kdrông mkŏ plah wah Đảng, Knŭk kna lehanăn mnuih ƀuôn sang, brei mđĭ lar bruă klam ngă bruă, lar bra hdră êlan mtrŭn mơ̆ng Đảng truh hŏng jih jang mnuih hlăm ala ƀuôn, đru mguôp rơ̆ng klei dưi dưn klei hâo hưn mơ̆ng mnuih ƀuôn sang, bi hrŏ klei bi kpleh hlăm bruă tŭ mă klei hâo hưn, mđĭ klei thâo săng mnuih ƀuôn sang, rơ̆ng kjăp klei hgŭm mguôp jih jang djuê ana.

Trần Hồng Tiến, Khua knơ̆ng bruă Dhar kreh, mjuăt ktang asei mlei lehanăn hiu čhưn ênguê Dak Lak brei thâo, dŭm klei kah mbha ti anôk bi kƀĭn trông srăng đru mguôp mkŏ mjing êpul knuă druh bruă klei mrâo mkăp djŏ hŏng klei čiăng hlăm boh klei mrâo.

 “Dŭm klei blŭ djŏ guôp, djŏ hŏng klei mâo ti alŭ wăl. Dŭm anôk bruă kriê dlăng knŭk kna, dŭm gưl, dŭm dhar bruă leh hmuĕ klei blŭ, klei akâo, klei ba mdah anăn srăng mâo dŭm hdră êlan, hdră mtrŭn, klei đru kčĕ čiăng mjing dŭm boh kdrŭt đru kơ dŭm anôk bruă klei mrâo, êpul čih klei mrâo ngă brŭ jăk hĭn, mkăp kơ bruă klam kđi čar ti alŭ wăl.