Mâo mă dua klei pah mni bruă klei mrâo čar Dak Lak leh anăn sa klei pah mni Klei mrâo Lăn Dap Kngư hlăm mlan 6, êlâo anăn jing 4 klei pah mni kơ bruă mkŏ mjing Đảng leh anăn qtui hriăm, hluê ngă gru mngač Awa Hồ dưi mđup brei hlăk akŏ thŭn, Amai H’Kim Phúc Êban, sa čô mniê čih klei mrâo djuê ana Êđê, dôk ngă bruă ti Hră klei mrâo Dak Lak lŏ dơ̆ng mâo lu grŭ kruăk hlăm bruă klei mrâo hŏng dŭm klei čih kơ dhar kreh.

H’Kim Phúc brei thâo, dhar kreh, yang ƀuôn leh anăn knhuah gru mnuih djuê ƀiă iêo jak ñu mơ̆ng dŭm hruê tal êlâo mŭt mă bruă. Êbeh 12 thŭn čih klei mrâo, klei găl kơ klei blŭ đru kơ ñu dưi nao jĕ leh anăn mă yua lu mta phŭn găl ênưih hĭn, mơ̆ng anăn mâo dŭm klei čih mrâo, đru kơ mnuih ƀuôn sang bi êdah ai tiê hlăm bruă kriê pioh leh anăn răng kriê dhar kreh.

“Jing sa čô čih klei mrâo mnuih djuê ƀiă, kâo ăt kreh nao ti dŭm ƀuôn sang. Thâo săng knhuah gru diñu kâo ênưih nao jĕ hĭn, blŭ hrăm ăt ênưih hĭn, hluê anăn mnuih ƀuôn sang ăt dưi bi êdah klei čiăng ăt msĕ mơh jing dhar kreh mơ̆ng diñu. Hŏng dŭm klei čih kâo čiăng mđĭ hĭn klei thâo săng kơ mnuih ƀuôn sang hlăm bruă kriê pioh dhar kreh, knhuah gru djuê ana pô, bi hmô nao êlâo hlăm klei mă bruă knuă, bruă ngă jăk hlăm yang ƀuôn, hrăm mbĭt mkŏ mjing klei hdĭp ƀuôn sang ƀrư̆ hruê ƀrư̆ đĭ kyar hĭn”.

Mbĭt hŏng H’Kim Phúc, ti Anôk bruă hră klei mrâo Dak Lak, amai Nguyễn Hương Quỳnh ăt jing sa čô thơ̆ng hiu čih kơ dhar kreh. Êbeh 8 thŭn êgao, mâo nao hgŭm čih mkra lu hdră dhar kreh dŭm djuê ana leh anăn mâo ba wĭt lu klei pah mni bruă klei mrâo. Ară anei, amai lŏ klam ngă bruă čih mkra 2 kdrêč kơ dhar kreh jing Knhuah siam klei hdĭp leh anăn ai hdĭp Lăn Dap Kngư, mđing grăp mlan sa mrô. Mâo klei găl thâo čih mkra leh anăn mđung hdră ti anăp anôk mdar rup, dŭm klei čihi mơ̆ng amai mâo klei mlih mrâo. Hluê si amai Quỳnh, kyua klei lu jơr hlăm dhar kreh mơ̆ng 49 djuê ana hdĭp mda ti čar Dak Lak mkŏ mjing leh ai iêo jak ktang phĭt, nao êlam hĭn amai ktang ƀuh jăk hĭn.

“Êjai nao ti nah gŭ, ñŭ kma mbĭt hŏng klei hdĭp mnuih ƀuôn sang dŭm djuê ana, kâo mâo lu klei hriăm, leh anăn lač jăk jing pô ruah djŏ bruă. Êjai ngă bruă kơ dŭm mta phŭn sơnăn mtrŭt mjhar pô lu hĭn leh anăn ƀuh dhar kreh jing jăk siam êdi, čiăng lŏ dơ̆ng hưn mdah, srăng hâo hưn čiăng kơ ênuk êlâo lŏ mtô kơ ênuk êdei kriê pioh leh anăn bi lar. Adôk dhar kreh jing adôk lăng čar, adôk phŭn agha”.

Dlăng hlăm boh sĭt jing hdră mâo amai Nguyễn Thảo, pô čih klei mrâo Hră klei mrâo Tiền Phong, adŭ bruă bi al ti Lăn Dap Kngư, bi mbŏ hlăm grăp klei čih kơ dhar kreh. Amai Yăl dliê, giăm 10 thŭn mă bruă, amai amâodưi yap ôh dŭm gưl đĭ êdeh, găn dŭm pluh, dŭm êtuh km čiăng  wĭt ti ƀuôn sang krĭng tlaih kbưi mơ̆ng čar Dak Lak leh anăn Dak Nông bi tuôm hŏng mnuih ƀuôn sang, pô thâo mbruă. Grăp gưl nao đru kơ amai dưi ƀuh dliê kmrơ̆ng, krĭng lăn leh anăn klei gĭr mơ̆ng ƀuôn sang. Diñu dôk bi myuôm, djă pioh dŭm mta knhuah gru ti krah klei hdĭp mrâo mrang, mkŏ mjing sa êpul êya mâo lu knhuah dhar kreh jăk siam.

“Djăp mta phŭn pô srăng nao truh kơ nah gŭ čiăng thâo kơ ai êwa klei hdĭp. Bi hŏng dhar kreh – jing mta phŭn, knŏng phung mâo klei khăp kơ dưi gĭr nao ksiêm duah, thâo ƀuh hŏng klei yăl dliê, ală mta amâodah hlăm ai tiê grăp pô, grăp klei yăl dliê. Srăng mâo klei khăp sĭt kơh dưi thâo ƀuh phung dôk kriê pioh leh anăn bi lar dhar kreh, mơ̆ng anăn dưi ba truh kơ pô mkăn”.

Amâo djŏ knŏng hâo hưn, phung čih klei mrâo kơ dhar kreh lŏ đru mguôp mkŏ mjing leh anăn mđĭ kyar dhar kreh êpul êya. Ti Dak Lak, anôk bi kƀĭn knhuah gru mơ̆ng 49 djuê ana, phung čih klei mrâo mda asei lŏ bi msiam kơ rup dhar kreh Lăn Dap Kngư. Hŏng klei khăp leh anăn klei thâo mă bruă, phung mniê čih klei mrâo dôk bi lar dŭm boh tŭ dưn jăk siam, đru bi râo klei mĭn kriê pioh dhar kreh djuê ana, djăp pioh dŭm boh tŭ yuôm hơĭt kjăp mơ̆ng yang ƀuôn.