Čiăng lông bi êran ngă bruă, sa mlan êgao, Êpul sa ƀăng bhă mâo 5 čô mơ̆ng Khua Bruă sang čư̆ êa ƀuôn hgŭm Nghĩa Phú, ƀuôn prŏng Gia Nghĩa, čar Dak Nông klam bruă, gĭr jih ai tiê pô čiăng mă bruă čiăng mgaih msir hră mơar adôk, mbha hră mơar, tĭng mkă ngăn dŏ… mprăp ba jao êlâo kơ mŭt mbĭt. Trần Thị Thu Hiền, sa čô hgŭm hlăm Êpul brei thâo, khădah mâo lu klei hriăm mă bruă ti anôk bruă Knŭk Kna ti ƀuôn prŏng Hồ Chí Minh leh anăn Dak Nông, amai ăt bi kngar ti dŭm klei mlih prŏng anei. Ƀiădah, leh gưl bi hriăm hlăm hruê 13 -14/6 mrâo êgao, ñu thâo klă kluôm ênoh bruă dưi jao ti anok mă bruă mrâo.

 “Bruă knuă ti anôk bruă hđăp amâodah mrâo ăt msĕ msĕ, kyuadah jing tŭ mă sơăi, ba wĭt boh tŭ bruă Knŭk Kna leh anăn hluê ngă hdră êlan mrô 06 kơ klei lih mrô. Anăp anei bruă klam srăng đĭ hĭn êjai, ƀiădah kyua pô mưng leh anăn mâo leh klei hơĭt ti ƀuôn hgŭm hđăp, kâo mĭn pô srăng dưi klam ngă. Khădah wăt kơ dưi lu hĭn, amâodah bruă mrâo hĭn, ƀiadah gĭr ƀiă ƀiă srăng dưi bi leh bruă klam dưi jao.”

Hluê si hdră êlan mkŏ dăp bruă Knŭk Kna čar Dak Nông, dŭm ƀuôn hgŭm Nghĩa Phú, Nghĩa Tân leh anăn să Dak R’Moan srăng dưi bi mŭt mbĭt jing ƀuôn hgŭm Dhŭng Gia Nghĩa, hŏng anôk bruă ti mrô 2 Võ Văn Tần, ƀuôn hgŭm Nghĩa Tân, jing anôk bruă mơ̆ng Bruă sang čư̆ êa ƀuôn prŏng Gia Nghĩa êlâo kơ bi kruh. Vũ Minh Nghĩa, Khua bruă Đảng ƀuôn hgŭm Nghĩa Phú brei thâo, mnuih mă bruă Bruă sang čư̆ êa ƀuôn hgŭm Dhŭng Gia Nghĩa dưi mkŏ mjing mơ̆ng ênoh prăk knuă druh mơ̆ng Bruă Đảng čar, bruă Đảng ƀuôn prŏng leh anăn ƀuôn hgŭm să hđăp:

 “Hdră bi êran hluê si klei bi hmô mrâo, lông bi êran phung khua bruă Đảng, khua Bruă sang čư̆ êa ƀuôn hgŭm, khua Êpul hgŭm bruă ƀuôn sang leh anăn Khua dhar bruă măt trân čar kwar ƀuôn hgŭm srăng nao hgŭm hluê si grăp bruă klam klă anăp. Êngao kơnăn, grăp bruă srăng mâo dŭm anôk bruă đru kčĕ đru bruă hluê si bruă klam dưi jao. Hdră bi êran tơdah tuôm hŏng klei kpăk gun, ka ngă jăk srăng bi kƀĭn čiăng mă klei hrăm.”

Hoàng Công Hội- Khua dlăng bruă Đảng ƀuôn hgŭm Nghĩa Tân, ƀuôn prŏng Gia Nghĩa brei thâo, alŭ wăl ksiêm dlăng jih jang mnơ̆ng yua truh kơ mnuih mă bruă čiăng ngă klei ba jao, mkŏ dăp leh bi mŭt mbĭt. Mâo hlăm brô 200 čô knuă druh, phung mă bruă mă bruă ti ƀuôn hgŭm Dhŭng Gia Nghĩa leh bi mŭt mbĭt. Bruă lông bi êran klei bi hmô ƀuôn hgŭm mrâo djŏ hŏng klei mtô mơ̆ng Phŭn bruă kiă kriê bruă knuă leh anăn Knŭk Kna.

 “Hlue si hdră êlan mơ̆ng ƀuôn prŏng mkŏ mjing ăt msĕ mơh dŭm klei čuăn, hră mtô mơ̆ng Phŭn bruă kiă kriê bruă knuă leh anăn hdră mtrŭn mơ̆ng Knŭk Kna, hŏng ƀuôn hgŭm Dhŭng Gia Nghĩa srăng mkŏ mjng dŭm anôk bruă mâo: Adŭ bruă, adŭ bruă duh mkra – bruă mkŏ  mkra wăl krah, Adŭ bruă dhar kreh – yang ƀuôn leh anăn anôk bruă ngă hră mơar Knŭk Kna. Dŭm anôk bruă mkăp brei bruă Knŭk Kna ăt srăng pral dưi mkŏ mjing ti grăp ƀuôn hgŭm čiăng đru kơ mnuih ƀuôn sang hŏng sa hdră tŭ dưn, klă hŏng klei čiăng hlăm boh sĭt ti alŭ wăl.”

Hluê si hdră êlan mơ̆ng Gưl lông, mơ̆ng hruê 1/7 kơ anăp, čar Dak Nông srăng bi hrŏ mơ̆ng 71 adôk 28 anôk bruă Knŭk Kna gưl să, ƀuôn hgŭm leh anăn bi mŭt mbĭt hlăm čar Lâm Đồng mrâo. Dŭm klei gĭr ti grăp să leh anăn grăp čô knuă druh dôk ƀrư̆ ƀrư̆ bi sĭt bruă Knŭk Kna khuăt, tŭ dưn. Bruă lông bi êran leh anăn bi kluôm hdră êlan, srăng đru kơ Bruă sang čư̆ êa gưl să mrâo mâo klei khuăt čiăng êdi êjai mŭt ngă bruă klă klơ̆ng./.