Tlam mbrue 22/06, ti Anôk bruă knŭk kna, Khua knŭk kna Phạm Minh Chính, Khua kiă kriê bruă ala čar kñăm; Khua êpul gơ̆ng klei bi ktưn pah mni, gưl dlông kiă kriê leh klei bi kƀĭn kluôm ala ksiêm wĭt bruă mkŏ mkra krĭng ƀuôn sang mrâo, hdră ala čar kñăm bi hrŏ ƀun hŏng klei kjăp lehanăn klei bi ktưn “Kluôm ala sa ai tiê mkŏ mkra krĭng ƀuôn sang mrâo”, klei bi ktưn “Kyua mnuih ƀun – amâo mâo lui sa čô kơ tluôn ôh” wưng thŭn 2021-2025.

Blŭ hrăm ti anôk bi kƀĭn, Khua knŭk kna lač, Gưl kdriêk bi ruĕ leh jăk bruă pô, hdră ala čar kñăm mkŏ mkra krĭng ƀuôn sang mrâo mâo tŭ yap leh êbeh 50% kdriêk djăp ênoh čuăn krĭng ƀuôn sang mrâo. Kyuanăn brei mâo klei mpŭ mni bruă klam mơ̆ng gưl kdriêk hlăm klei mđĭ kyar bruă lŏ hma, krĭng ƀuôn sang lehanăn phung ngă lŏ hma, djŏ bruă klam hŏng hƀuê ênuk. Khua knŭk kna kčĕ hlăm wưng thŭn 2026-2035, bi klin jih jang bruă ala čar kñăm mjing sa hdră đăm nao hlăm klei mđĭ mđăl ôh kơ klei kiă kriê, lehanăn jao bruă čuăn. Khua knŭk kna mñă hdră ala čar kñăm mkŏ mkra krĭng ƀuôn sang mrâo brei lŏ mđĭ kơ ênoh čuăn krĭng ƀuôn sang mrâo ti hnơ̆ng prŏng hĭn, hlăm knua prŏng hĭn, hŏng lu mnuih hĭn, mđĭ kyar mnơ̆ng mâo OCOP.