Mprăp kơ Klei bi lông, Dak Lak mprăp leh ênŭm mơ̆ng anôk bruă nah gŭ, bruă nah tluôn, rơ̆ng hgăm akŏ klei bi lông ba truh ti krĭng dleh dlan. Dôk hlăm wưng lŏ mkŏ dăp anôk bruă knŭk kna jing 2 gưl, hdră mprăp kơ klei bi lông ăt mâo dŭm êpul êya bruă mđing dlăng.

Klei bi lông hriăm jih gưl 3 thŭn anei, čar Dak Lak mâo êbeh 22.600 čô hđeh bi lông, hŏng 949 adŭ bi lông dưi mkŏ dăp ti 33 anôk bi lông. Knơ̆ng bruă Sang hră mơar mtô bi hriăm bi hgŭm leh hŏng alŭ wăl ba nao êbeh 3.000 čô nai mtô, knuă druh, mnuih mă bruă, êpul răng mgang klei êđăp ênang… nao hgŭm hlăm hdră mkŏ mjing klei bi lông. Dŭm anôk bi lông dưi ksiêm dlăng kjăp anôk bruă nah gŭ, mkŏ dưm camera ksiêm dlăng, rơ̆ng klei mngač, dhiăr pưh êđăp, jhưng mdhô̆ lehanăn adŭ mkăp. Knơ̆ng bruă ăt pŏk ngă kjăp hdră kđăm mkra lehanăn dŭ mdiăng akŏ klei bi lông, boh nik thŭn anei mâo 2 mta bi lông ba yua hŏng 2 hdră mtô bi hriăm mdê./.