“Leh tơbâ 100 hơnăm Hâi hlá tơbeăng Kăch măng Việt Nam ƀă tơpui tơno ‘na troăng pơkâ pêi, troăng hơlâ, kơxô̆ liăn ăm tơdroăng pêi cheăng chêh hlá tơbeăng, mơjiâng khu mâu ngế chêh hlá tơbeăng tơxâng pơkâ mơnhông tung hneăng nếo’’ cho tơdroăng pơxá hôp tơpui tơno xua Khu pơkuâ Khôi túa lĕm, Tơ’noăng ivá ƀă Ôm hyô Dak Lak, Khu chêh hlá tơbeăng kong pơlê, Khu pơtâng tối tơdroăng kal ƀă Mơhnhôk kuăn pơlê dêi Khu pơkuâ hnê ngăn Đảng ủy Dak Lak tơrŭm tơkŭm po kơxê lơ 17/6.

A hôp tơpui tơno, mâu kăn teăng mâ rơtế tơpui tơno ‘na mâu pơloăng mơnúa pơkâ tung hneăng nếo, pơkâ mâu troăng mơjiâng khu mơngế chêh hlá tơbeăng tơxâng pơkâ mơnhông mơdêk. Tiô ngế chêh hlá tơbeăng Đàm Thuần, Phŏ Kăn rah chêh hlá tơbeăng Dak Lak, pơkâ rế hía rế hên ‘na pơhlêh xúa kŏng ngê̆ ƀă ki tro khâp tơdroăng nếo ai, mơngế chêh hlá tơbeăng kal rak hiâm mơno kăch măng, hiâm mơno pêi cheăng.

Tơdrêng amê, thế rơkê tâ, ‘nâi nhên tíu tơná pơkuâ, thế cho mâu kuăn pơlê chiâng xúa kŏng ngê̆, hlá tơbeăng xúa kŏng ngê̆. Kăn teăng mâ xuân môi tuăn, ƀă tíu ki phá tơ-ê môi tiah Dak Lak, tơdroăng tơbleăng tơdroăng tơtro, teăm tơdrêng, kal khât troh kuăn pơlê, ki rơhêng vâ tối cho kuăn pơlê a kơpong hơngế, hơhngo, kơpong hdroâng kuăn ngo, ôh tá xê to hnoăng cheăng ki kal mê ối cho hnoăng kal kí, hiâm mơno dêi mơngế chêh hlá tơbeăng.