Hâi lơ 22/6 a Tíu pêi cheăng xiâm Chin phuh, pôa Phạm Minh Chính, Ngế pro xiâm hnê ngăn Chin phuh pơkuâ hôp má 5 Khu hnê mơhno cheăng Xiâm Tơnêi êa tơbleăng tah hngêi pơtân hngêi xi kơchoh, tung lâp tơnêi têa; Hôp roh má 18 Khu kăn hnê ngăn Tơnêi ƀă mâu tơmeăm khoăng, tơdroăng tơkêa bro ki kal dêi tơnêi têa, ki xiâm dêi kơvâ ngăn troăng prôk ƀă Hneăng hôp rôh má 2 mơdêk xo liăn ngân kơxô̆ liăn ‘no mơjiâng tơmeăm khoăng hơnăm 2025.

Tơdjâk troh tơbleăng ‘’Xut tah hngêi pơtân, hngêi xi kơchoh’’ tung lâp tơnêi têa: Ngế pro xiâm hnê ngăn tơnêi têa ăm ‘nâi, pơkâ rôh apoăng tiô tối hdrối pê klêi troh hơnăm 2030, laga, ki khât vâ tơbleăng, kăn ƀô̆, kơvâ cheăng,  kong pơlê hlê plĕng pêi tro, malối tung tơdroăng cheăng pêi vâ troh tơbâ 80 hơnăm hâi mơjiâng tơnêi têa Kŏng hoa xah hô̆i chuh ngiah Việt Nam, xua mê thế mơ-eăm pro iâ hâi vâ pê klêi tơdroăng.  

Khĕn kơdeăn mâu khu xiâm, kơvâ cheăng, kong pơlê, mâu khu mơdró tơbleăng pêi kơhnâ khât tơdroăng “Xut tah hngêi pơtân, hngêi xi kơchoh’’ tung lâp tơnêi têa, Ngế pro xiâm hnê ngăn tơnêi têa pơkâ thế môi tuăn  pro iâ hâi pê klêi  tơdroăng “Xut tah hngêi pơtân, hngêi xi kơchoh’’  tung lâp tơnêi têa a hâi lơ 31/10/2025.

Krê ƀă tơdroăng ‘’Xut tah hngêi pơtân, hngêi xi kơchoh’’ ăm mâu ngế ai hnoăng ƀă kăch măng, mơ-eăm troh hâi lơ 27/7 hơnăm kố kô xut tah tâi hngêi pơtân, hngêi xi kơchoh ƀă mâu ai hnoăng kăch măng, rơpŏng rong râ ai hnoăng  tro rong, hlâ ai hnoăng.