Ai tiô púi vâ ăm rôh tơ’noăng, Dak Lak hiăng hbrâ tơdrêng hên tơdroăng, ing hngêi trung, kơƀăng tăng, ‘na pơchên kế kâ, kring vế pơkí ko ƀai tơ’noăng troh tơdroăng kơjo kum hok tro kơpong xơpá. Dế tung pơla pơ’lêh nếo túa pêi cheăng dêi mau kăn kong pơlê péa râ, tơdroăng cheăng hbrâ tơkŭm po rôh tơ’noăng xuân châ mâu kăn ai tơdjâk troh  kal tơmâng. Mơgêi tơ’noăng hriâm râ má pái phôh thong hơnăm kố, kong pơlê Dak Lak ai lối 22.000 ngế hok tro chêh inâi tơ’noăng, ƀă 949 veăng tơ’noăng châ mơhno tơ’noăng a 33 to hngêi trung.

Khu xiâm ngăn hnê hriâm ƀă hnê mơjiâng tuăn ngoa rơkê tơrŭm ƀă mâu kong pơlê mơhnhôk tăng lối 3.000 ngế kăn ƀô̆, thái cô, mơngế cheăng ngăn pơkeăng, mâu lêng kring tơniăn... veăng tơkŭm po ngăn tơ’noăng. Mâu tíu tơ’noăng hiăng séa ngăn tíu pêi cheăng, krâ ‘măn camera séa ngăn, tơniăn mâu tơdroăng ‘na eăng bâ, ki pê ăm rơngiâp, kơ ƀăng tăng ƀă veăng hbrâ tơ’noăng. Khu ngăn xuân hbrâ tung tơdroăng tơbleăng in sao chơ pơtroh ko ƀai tơ’noăng, malối tung pơla nôkố ai péa túng ko ƀai tơnoăng  xúa ăm 2 tơdroăng hnê hriâm ki pơrá phá.