Pơtối mê, 231 kăn ƀô̆ hiăng châ khu pơkuâ tơdroăng cheăng Đảng kong pơlê pơkâ tung mâu hnoăng cheăng ki xiâm, mê cho: Kăn pơkuâ hnê ngăn cheăng Đảng, Phŏ hnê ngăn tơdroăng cheăng Đảng ƀă Kăn hnê ngăn Vi ƀan râ cheăm hneăng hơnăm 2025 – 2030, ƀă hneăng cheăng khu râ kăn pơkuâ 2021 – 2026.

Tơtrŏng má môi, ai 2 ngế tung Khu pơkuâ hnê ngăn Đảng ủy châ pơkâ rah pro hnoăng kăn pơkuâ hnê ngăn cheăng Đảng cheăm, bêng. Mê cho pôa Nguyễn Xuân Phước, Tỉnh ủy  viên, kăn Pơkuâ hnê ngăn cheăng Đảng Thị uỷ An Khê châ xing xoăng hnoăng cheăng Kăn pơkuâ hnê ngăn Đảng ủy Pleiku; pôa Lưu Trung Nghĩa, Tỉnh ủy viên, Kăn pơkuâ Khu pơkuâ ‘na pêi chiâk deăng ƀă Kong prâi châ xing xoăng hnoăng cheăng pro Kăn pơkuâ hnê ngăn cheăng Đảng ủy bêng An Phú.

299 kăn ƀô̆ ki ê cho kăn pơkuâ mâu tơring, pơlê kong krâm, pơlê kong kơdrâm (kô pơtê cheăng) ƀă mâu khu cheăng, kơvâ cheăng a kong pơlê. A hneăng hôp, Kăn pơkuâ hnê ngăn cheăng Đảng kong pơlê Gia Lai mơnhên: râ cheăm nếo cho tíu tơdrêng pêi pro troăng pơkâ, troăng hơlâ dêi Đảng ƀă Tơnêi têa, tơleăng vâ chê 80% kơxô̆ tơdroăng cheăng pơkuâ tơnêi têa dêi kong pơlê. Xua mê, tơdroăng ki dâi lĕm, hiâm mơno hnoăng cheăng dêi khu kăn ƀô̆ ki xiâm rak hnoăng pơkâ.