Vâ mơnúa ăm pêi cheăng, plâ khế hiăng hluâ, Tôh môi tíu pêi cheăng ai 5 ngế xua Kăn hnê ngăn Vi ƀan bêng Nghĩa Phú, pơlê kong kơdrâm Gia Nghĩa, kong pơlê Dak Nông pơkuâ, thế đi đo ‘’mơ-eăm tâi ivá’’ pêi cheăng tơ’nôm chô vâ pro hô sơ ki u ối, klâ xoăng mơ-éa, riân ngăn tâi tâng tơmeăm... hbrâ pơcháu ahdrối tơmot chiâng môi.

Nâ Trần Thị Thu Hiền, môi ngế ối tung Tôh tối ăm ‘nâi, mơhé ai hên hơnăm túa ki rơkê pêi cheăng a tíu pêi cheăng tơnêi têa a Pơlê kong kân Hồ Chí Minh ƀă Dak Nông, nâ xuân hil hdrối mâu tơdroăng pơhlêh kân kố. Laga, klêi kơ’nâi roh hnê mơhno a hâi lơ 13 – 14/6 pơla kố nah, nâ hiăng ‘nâi tâi tâng tơdroăng cheăng châ pơcháu a tíu pêi cheăng nếo.

‘’Tơdroăng cheăng a tíu pêi cheăng ton lơ nếo klêi tơmot chiâng môi xuân môi tiah dêi pó, xua pơrá cho tơdah, mơdrếo hlá mơ-éa ki hiăng klêi pro ƀă pêi pro Tơdroăng tơkêa bro 06 ‘na pơhlêh xúa kŏng ngê̆. Laga hnoăng cheăng kô tâk, laga xua hiăng pêi hmâ ƀă tơniăn a bêng ton xua mê á tơmiât kô pôu râng hnoăng. Mơhé tơdroăng cheăng hên tâ, lơ kơvâ nếo tâ, laga mơ-eăm môi iâ mê kô kêi đeăng hnoăng cheăng châ pơcháu’’.

Tiô tơdroăng tơkêa bro rah xo bro lế lĕm tro khu pêi cheăng tơnêi têa kong pơlê Dak Nông, mâu bêng Nghĩa Phú, Nghĩa Tân ƀă cheăm Dak Rmoan kô châ tơmot chiâng môi bêng Nam Gia Nghĩa, ƀă tíu pêi cheăng a kơxô̆ 2 Võ Văn Tần, bêng Nghĩa Tân, cho tíu pêi cheăng dêi Vi ƀan pơlê kong kơdrâm Gia Nghĩa pơtê lôi. Pôa Vũ Minh Nghĩa, Kăn pơkuâ hnê ngăn cheăng Đảng bêng Nghĩa Phú tối ăm ‘nâi, mơngế pêi cheăng kơ koan tơnêi têa bêng Nam Gia Nghĩa châ mơjiâng ing kơxô̆ kăn ƀô̆ dêi Tỉnh ủy, Thành ủy ƀă 3 bêng cheăm ki xiâm rêi amê:

‘’Troăng pêi cheăng mê tiô troăng pêi cheăng nếo, mơnúa pêi cheăng mâu khu kăn pơkuâ Đảng ủy, Kăn hnê ngăn Vi ƀan bêng, Kăn hnê ngăn Hô̆i đong kuăn pơlê ƀă Kăn hnê ngăn Vi ƀan Măt trâ̆n Tơnêi têa Việt Nam bêng kô veăng tiô rêm hnoăng tơdrêng. Pakĭng mê, rêm tíu pơrá ai mâu khu tơbleăng kum cheăng tŏng gim pêi cheăng tiô hnoăng châ xing xoăng. Tơdroăng pêi cheăng tâng trâm pâ, tá hâi hlế bâ mê kô hôp vâ tơkŭm po xo vế túa ki rơkê tơtro’’.

Pôa Hoàng Công Hội - Kăn pơkuâ hnê ngăn Đảng ủy bêng Nghĩa Tân, pơlê kong kơdrâm Gia Nghĩa tối ăm ‘nâi, bêng hiăng séa ngăn tâi tâng ing kế tơmeăm khoăng troh mơngế pêi cheăng vâ pêi pro pơcháu, xing xoăng klêi kơ’nâi tơmot chiâng môi. Ai dâng 200 kăn ƀô̆, kŏng chưk pêi cheăng a bêng Nam Gia Nghĩa klêi kơ’nâi tơmot chiâng môi. Tơdroăng ăm mơnúa pêi cheăng bêng nếo tiô tro hnê mơhno dêi Khu xiâm pơkuâ kăn ƀô̆ ƀă Chin phuh.

‘’Tiô tơdroăng tơkêa bro dêi pơlê kong kơdrâm mơjiâng xuân môi tiah mâu pơkâ, thông tư hnê mơhno dêi Khu xiâm pơkuâ kăn ƀô̆ ƀă Tơdroăng Pơkâ dêi Chin phuh, ƀă bêng Nam Gia Nghĩa kô mơjiâng mâu tíu cheăng mê cho: Ƀơrô; Kơbong Cheăng kâ – Hngêi trăng troăng klông; Ƀơrô Khôi túa lĕm tro – Rêh ối pơlê pơla; ƀă Tíu xiâm pơkuâ tơnêi têa. Mâu tíu pêi cheăng tơnêi têa pơtroh tơdroăng cheăng pro mơ-éa tơnêi têa xuân châ mơjiâng a rêm cheăm vâ kum kuăn pơlê pro mơ-éa châ tơƀrê, tro tiô tơdroăng kal vâ nôkố tung cheăm’’.

Tiô tơdroăng tơkêa bro dêi Tơnêi têa, sap ing hâi lơ 1/7 la ngiâ, kong pơlê Dak Nông kô kơdroh sap ing 71 chu u ối 28 tíu pêi cheăng râ cheăm, bêng ƀă tơmot chiâng môi tung kong pơlê Lâm Đồng nếo. Mâu tơdroăng mơ-eăm a rêm cheăm ƀă rêm kăn ƀô̆ dế chôa ‘lâng pơhlêh rah xo bro lế lĕm tro, pêi cheăng châ tơƀrê, xêt khât. Tơdroăng mơnúa ăm pêi cheăng ƀă kêi đeăng troăng pêi, kô kum khu râ kăn pơkuâ râ cheăm nếo châ tơdroăng ki rĕng kal khât mot pêi cheăng păng ‘nâng.