Bi thu Tinh uy An Giang Nguyễn Tiến Hải hu nao pasang iek bruk ngak karja barau di Pasak Duh bruk karja di dom xa, phuong, dac khu di dalam tinh. Ong Nguyễn Tiến Hải pandar brei ramik caga urang tacei ba tui yaok gah piah mikva mai ngak harak karja samar drah jang. Bi thu Tinh uy An Giang ndom cambaih laih lac: Bruk halei lagaih ka rahra ye brei ngak drah samar. Bruk pagam tinh brei taoh talaih abih, oh luai srau kadau sarak dua tinh karei gauk…

HĐND tinh Ca Mau birau njauk gauk brei tapa sarak ka bruk buh jien tame daong ka urang jakar, kong chuc, vien chuc saong urang ngak bruk meng Bac Lieu mai Ca Mau ngak bruk kayua pagam tinh. Tui nan, jien daong pah sang 1,2 trieu dong sa urang sa bilan; daong jien radaih nao mai lac 520 ribau dong sa urang sa bilan; daong jien cai pandar  500 ribau  dong sa urang sa bilan, kuhria abih tih jien daong ka sa urang sa bilan lac 2 trieu 220 ribau dong. Tukvak daong dalam dua thun. Kuhria abih tih urang brei daong jien lac 1.730 urang, jien daong yaok thun labaih 27,7 ti dong.

Taong Kongti Buu ndien Viet Nam hu padang Mban pato tacei ngak bruk daong, tacei ba rahra ngak bruk karja online; taduan mek harak gar, bayar gilac harak gar di xa, phuong bahrau piah brei kein lagaih ka rahra, gah ngak mbang pablei salih. Dalam harei akaok meti peih ngak, Taong Kongti hu daong labaih 700 xa, samu 25% dom xadalam negar piah khik kajap bruk duh rahra hu siam. Taong Kongti hu ramik caga 8.000 urang jakar, urang kong chuc, vien chuc hu mbaok tame daong bruk taduan harak gar, bayar harak gar hu langyah blaoh di UB Bhap bini pakat xa, phuong, dac khu.

Pho Thu tuong Mai Văn Chính birau mbaoh Sarak ka Bruk padang Quy hoach khik iek, ramik pasiam Inem krung pakat negar dac biet bimon My Son, Ban Da Nang. Labik roh duah  padang quy hoach, taneh praong labaih 30.875 ha, dalam nan hu labik Inem krung dac biet Labik bimon My Son saong taneh pacang caga khik iek dom bimon di labik nan yau: Trà Kiệu, Bằng An, di kraong Thu Bồn, dom labik roh duah saong bimon tayak daok veik di Champa. Inem ilamo pakat negar bimon My Son lac bhum taneh yulit rivang iek ilamo, sinh thai danei angan di bhum palei, di Viet Nam saong dunya.

Jabat Canh sat jalan mbak, Kong an tinh Lam Dong brei thau, jabat hu daong sa urang kamei menek hu salamat di jalan nao daong samar chip. Biar harei kabroi, Kapul ngak bruk daok ngak dom bruk pasang iek angaok jalan Ho Chi Minh ye taduan hu khau tin sa-ai kamei Lý Thị Song (umo 25 thun, daok di Tuy Đức) daok metian saong hu mboh bruk si menek brei hu ba nao tal sang iek ruak samar chip. Dom bol lin hu ba diuk pasang tagok radaih, peih kadait likau jalan, nduac tapak tal Sang iek ruak huyen Đắk R’Lấp. Tuk radaih bahrau tal pabah mbang sang iek ruak, dom bac si samar chip daong menek di angaok radaih di Canh sat Jalan mbak.

Phao bingu lac thaot binguk oh kurang hu dalam dom bruk peih ngak pahadar  Harei Negar 4/7 di Mỹ - daok gaok kan kandah kayua bruk meriak gauk dalam pablei salih di karja Tong thong Donald Trump saong Trung Quoc. Yau nan min, thun ini, bruk blei ndap nda meng dom negar langiu tame gaok sraw kadau kayua jien je  glong  ngan haong ndap nda Trung Quoc. Ginum biai “ padeih mesruh metak” di bilan 5 hu daong trun jien je daok 30%, min  padeih bruk pabak ndap nda ngak kan kandah tal harei roya pahadar dalam thun.

Gah ahaok par praong abih Australia lac Qantas bahrau njauk bruk taong tame tapa mang xa hoi, klaik mek khau tin di labaih 6 trieu tuai damuai di gah ini. Urang klaik khau tin taong tame piah mek khau tin di labaih 6 trieu tuai damuai dalam nan hu angan, harei menek, lek taka phone, lek taka tuai damuai, angan email. Min biak patuah jamo lac khau tin ka passport saong the bayar jien oh hu khik piah angaok he thong nan oh njauk lahik.

Jabat Khi tuong Nhat Ban khan lac, taneh ia ini daok dalam langik pandiak catang bilan 7  ini. Pandiak  di bilan ini tagok tal 2,34 do C dut saong bhian harei. Jabat chuc nang Nhat Ban kakei lac, taong abih bhap bini brei ngak tui dom jalan pacang pandiak, yau peih mac ngak la-ar ka lagaih, bhian menyum pabak ia oh cang mehu ia meng menyum, menyum ia pabak sara saong padeih padei  tuk ngak bruk di langiu langik./.