Birau ini, Mentri Quoc phong hu harak Thong tu birau ka bruk palih ruah saong iew tagok jalan ngak bol lin. Tui nan, urang palih ruah lac dom rahra hu prein yawa janih 1, janih 2 saong janih 3 tui bruk ba tabiak paka 5, paka 6 Thong tu ka 105 thun 2023 ka prein yawa rup pabhap, dut iek prein yawa ka dom urang kayua Mentri Quoc phong khik iek. Abih di nyu, Mentri Quoc phong meda oh iew tagok jalan ngak bol lin dom urang meta can thi tapa 1,5 diop, vien thi hanjol atau trak.

Thieu tuong Nguyễn Quốc Toản - Chanh Van phong, Urang brei panuac ka Mentri Kong an khan lac: Tui Sarak ka 190 di Quoc hoi, harak gal hu jabat karja, chuc danh hu tham quyen ba tabiak, brei dahlau tuk ramik pagam jabat karja bo oh ka abih tukvak ngak tui atau oh ka abih tukvak pandar ye brei pandar, pandar tui hukum karja tal abih tukvak…Oh iew kapol nyaom, urang ngak harak gal salih hu jabat karja hu tham quyen brei adat ngak dahlau tuk ramik pagam jabat karja tuk harak adat nan oh ka abih tukvak pandar langiu bruk karja ba tabiak kadha karei.

Kapol dam dara ngak dahlau, halan hatian tinh Dak Lak daong bruk ka karja dua pakat saong pato ngak jitvu online di taong abih 102 xa, phuong dalam tinh. Dalam 2 bilan hè, dom kapol nyaom nan daong ka rahra thau tame Blah web Jitvu karja saong bhum palei; khan brei thau, payua harak pathau khan yaok bilan, pandar taka so tui bruk ngak chuyen nganh…Pathau khan, tacei pato rahra pandar jitvu karja online.  

Urang jakar ngak praong di TPHCM ngak bruk haong dom so, dom gah, karja palei, piah lang talaih dom kan kandah saong jhul pasamar tukvak peih ngak danak dak pacang ia dauk di Binh Duong klak. Dalam nan, hu bruk peih mbaok taneh ka bruk kuac, ngak pakajap veik kraoh ia Cái kuhria tui jien 6.000 ti dong, piah khik brei salamat ka bhap bini.  Danak dak nan tal ini, hu 84 mbang hu mbaoh tangin sarak peih ngak min oh njauk hatai mek jien; 60 mbang taduan mek jien blaoh min oh bayar taneh.

Urang ngak nong di dom xã Tân Thuận Bình, Mỹ Tịnh An, Lương Hòa Lạc tỉnh Đồng Tháp daok paik baoh thanh long tui bilan di nyu. Yau nan min, thanh long tathak oh ralo bo yaom laik trun biar. Bilan dahlau, yaom thanh long hatai bhong jaik 10 ribau dong  sa kilo, urak ini trun ala 3 ribau dong sa kilo. Yaom nan, yaok kilo po bein lahik jaik 3 ribau dong.

Dom kapol duah daong urang gaok bala Texas, Mỹ daok kham duah dalam gluh baok rah tapen kraong saong brei kapal ahaok par tapa pasak bang ini tayak tayaic kayua ribuk  ia sua, hatai caong khin duah hu urang daok diuk dak tuk dak cadu trun. Tui khaw tin birau abih, bala ngak metai labaih 100 urang, dalam nan hu yaok pluh uranaih. Dom kapol nyaom daong urang daok kham duah dalam pambuk kayau patau sang danaok glut jaleih dalam gluh baok, mbuan gaok bala saong hajan saong hangin meda daok mai veik.

Bilan 6 meng blaoh hu jeng asar kadha njauk kakei dahlau dalam bruk sraw kadau langik tasik di dunya, tuk rilo taneh di klau chau luc di dunya  langik pandiak catang. Tui yaok kuhria mboh di danak dak Copernicus di chau Au khan lac hu tal 12 taneh ia yam tapa bilan ka 6 pandiak oh ka bhian mboh. Kuhria abih tih, hu labaih 790 trieu urang brei kham diuk haong langik pandiak yau dahlah apui, di akaok bilan He hu mboh di meta: langik salih karei dak harei dak kan kandah.

Bruk urang ti nan Afghanistan tabiak truh Iran mai taneh ia  biak sami samar. Meng akaok thun mbiah tal ini, jaik 1 trieu urang Afghanistan gilac veik mai tal negar di drei. Iran lac taneh ia hu rilo urang ti nan Afghanistan daok ralo abih di dunya. Urak ini, kuhria rah tapa yaok harei hu labaih 30.000 urang ti nan tabiak truh Iran mai veik palei negar di drei. Ralo lac dalam dom urang ti nan oh hu harak gal njauk hukum njauk gilac veik mai palei negar di drei./.