Mentri Pato megru brei thau taong abih dom kadha langyah pakacah tamat THPT thun 2025 tui Danak dak Pato megru pho thong 2006 saong 2018. Tui bruk ba tabiak, kapol nyaom pakacah di dom tinh, ban meda brei kuhria iek veik taong abih bruk pasang iek langyah kadha pakacah saong payua du lieu mai ka Mentri Pato megru suai abih lac 17h harei 13/7. Hadei di nan, dom kapol nyaom pakacah  meda brei thau tunut pakacah tuk mon 8 harei 16/7. Suai abih lac harei 18/7, dom So Pato megru saong dom sang bac pho thong brei ngak salah taong abih bruk taduan tamat THPT.

Kuhria tal akok bilan 6, kuhria abih phun jien mesre ngak sang daok ka rahra dalam tinh Dong Nai hu jaik 109 ti dong. Tui ong Nguyễn Đức Lệnh, Pho Yam ndoc Gilang pariak  Karja dhar ka 2, dalam thun ini, Dong Nai brei padang 13 danak dak sang daok ka rahra kuhria abih tih jaik 13.000 baoh sang. Ini lac bruk bui sambai ngan haong rahra, urang kong chuc, dalam tuk dak ramik don vi karja, hu rilo salih karei labik ngak bruk saong labik daok.

Akok UBND tinh Dong Thap birau caong khin dom so, UBND dom xa, phuong brei ngak bruk harei sanecar  yaok adit piah taduan harak ho so, langyah harak gal di bhap bini. Tui nan, dom gah, harak gal karja brei palih ruah ngak lac kayua kan kandah, njauk brei ngak chip lagaih haong bruk rah tabiak dalam raidiuk bhap bini, urang ngak mbang pablei salih. Hadei pagam tinh Dong Thap (birau) hu 102 xa, phuong daok rah tui meng tasik Gò Công tal bhum taphia negar.

Dang akaok bruk ginum biai haong dom so, dom gah saong tapa online haong 103 xa, phuong piah duah thau hatai sahaneng hadei pagam tinh, ban Akok UBND ban Can Tho Trần Văn Lâu caong khin, tukvak anak tal, dom so, dom gah biai haong UBND ban brei langyah sumu dom cuang kandah, tavak tavaiy piah tacei pato xa, phuong ngak bruk. Ngan haong dom xa, phuong brei ngak samar taong abih bruk, parabha bruk ka rajakar lagaih njauk bruk.         

Baha Hưng Long, xã An Thạnh Thủy, tinh Dong Thap birau alin brei 100 paok pandap ka dom baoh sang bhap bini sang kathaot dalam xã. Yaok paok pandap hu: 1 kuang padang ia praong 1.000 lit, 1 baoh tamot ndon me-om akaok peih radaih, 1 blah phui men, 10 kilo brah saong dom ndap nda karei, yaoak paok kuhria tui jien 2 trieu 600 ribau dong. Tui Đại đức Thích Thiện Quý, Akok baha Hưng Long, baha tui bruk jak ba dom urang ngak pahala piah rik daong  peih ngak siam dom sarak daong rahra tani tanat raidiuk, paglong pasiam xa padang palei pala birau.

Cuc Pasang iek Trung uong An Do ( CBI) mek hu sa bruk blaik saleik  sang mbang jien praong abih di gah sang bac y khoa taneh ia ini. 35 urang ba tabiak kaok tui  hukum, dom urang ini lac pambuak bruk jhak nan, ngak suan chung bruk pasang iek, ngak mblo tabiak langiu kadha khaw tin kanduak yau harei ngak bruk pasang iek saong angan je urang ngak bruk pasang iek piah dom urang nan ngak harak gak njauk yau bruk pasang iek. CBI  medil lac hu takik di nyu  labaih 40 sang bac y khoa hu pambak tal bruk nan saong daok peih praong bruk pasang iek ngan haong rilo urang jakar y te pakat glong.

Labaih 2.000 ha ngak padai di tinh Prey Veng saong tỉnh Kampong Cham di Campuchia metai kayua hajan praong dom harei tapa. Tui jabat khik iek langik di Campuchia, bilan hajan meng kreh bilan 5, gam hajan Tay Nam saong langik la-ar  bilan 6 ba tal ribuk, ia dauk dom tinh ba tal 5 jalan khut tayak, 2 tatua  glut jaleih  saong 2 urang metai.

Dom urang metai dalam ia ribuk trak di bang Texas, Mỹ di melam 5/7 meng blaoh ngak parilo tagok tal 67 urang, dalam nan hu 21 uranaih, jiak 900 urang  hu daong ba tabiak truh. Tong thong My khan brei thau bala praong di hạt Kerr di bang Texas, labik gaok ia ribuk  sua ba tal rilo urang metai. Mbang ribuk sua hu taong yaom lac bala kayua langik tasik trak abih di bang Texas dom pluh thun tapa./.