Di TPHCM, meng dah page aval, dom pasak ngak bruk di karja  di dom phuong, xa di TPHCM rilo mikva urang mai meyao meyit, ngak harak gal. Akok UBND TPHCM Nguyễn Văn Được mai pasang iek bruk taduan raok bhap bini di Pasak karja  phuong Dĩ An, lac phuong hu rilo bhap bini abih di Ban raya. Ong Nguyễn Văn Được caong khin karja ngak bruk ba lagaih ka bhap bini hu taduan jitvu, dil sumu.

Yaok rituh urang jakar Binh Phuoc (klak) ramik nao blaoh saong daok panduan ba mai Dong Nai ngak bruk meng harei 1 bilan 7. Yaom lac gaok rilo kan kandah min thei jeng halan hatian ngak bruk. Tui yaok kuhria, labaih 1.800 urang jakar di Binh Phuoc panduan ba nao ngak bruk di jabat birau di Dong Nai. Tukvak camereip pagam tinh, piah jao ba bruk nhak hu mbuan lagaih, jaik 600 rajakar di Binh Phuoc klak daok veik ngak bruk di labik ini.

Xã Trà Côn, tỉnh Vĩnh Long lac xã hu rilo bol bhap urang bangsa Khmer diukrai. Piah bhap bini hu thau cambaic laic ka bruk dak ramik jabat hanh chinh, meng dom bilan dahlau, xã  peih bruk pathau khan ka bhap bini. Urak ini, langiu bruk ngak yaok harei, Dang bo xã Trà Côn daok ramik caga ka nyaom roya Dang bo xa anak tal. Yau nan ye bruk ngak hu pagap yau “gam nduac gam dak tui talei” xã Trà Côn peih ngak catang piah karja xã ngak bruk samar  hu tani tanat.

Meng haei 1 bilan 7, Mentri Kong an peih ngak dalam negar bruk brei tai khoan angan je dien tu pakat 2 ka urang negar langiu daok di Viet Nam. Bruk brei ngak tai khoan angan je dien tu daong ka urang negar langiu  peih ngak du dom sarak hanh chinh online, takik abih tukvak ngak harak gal jeng yau hu mbaok di labik, gam hu njauk bruk saong khik hu kein laba tui hukum karja dalam tuk daok saong ngak bruk di Viet Nam. Urang ngak harak gal lac negar langiu hu brei pakat the labik daok, pakat the daok hu tukvak di Viet Nam.

UBND TPHCM birau alin brei Yai thuong Sahaneng Hadah krah mbang ka 4 ka dom jabat, don vi, doanh nghiep, urang Viet Nam saong urang Viet Nam daok negar langiu, hu danak dak roh duah, jalan lanyah, pandap jitvu hadah krah rik daong tame ngak brei cakrok patagok di Ban raya. Njauk hatai, Adat ngak yang kraong ia di So Yulit TPHCM mek hu yai Nhat  di Yai thuong Sahaneng Hadah krah thun 2025 gah cakrok patagok kinh te; Bruk ilamo kaya mbang “ harei phở” kayua harak mbao Tuoi tre peih ngak mek hu yai Nhat.

 Toa an Hukum Thai Lan patabiak adat brei padeih bruk di Thu tuong Paetongtarn Shinawatra hadei tuk hu harak yak kayua 36 Thượng nghị sĩ payua mai, caong khin brei pasang iek bruk ngak suan Hukum di muk Paetongtarn dalam tavak sap panuac mblo tabiak gah langiu ngak kamelah gauk haong Akok Thuong vien Campuchia Hun Sen. Dom panuac ndem hu tavak veik pambak tal dom bruk ngak di bol lin atau pambak tame bruk ngak di drei piah ba dom jalan ngak karei bruk sron mbon taneh ia, nan lac dom bruk ndem puac meda jeng “ngak suan trak dom jalan diuk rai siam gheih”.

Hukum Khik caga bruk Pachot pagat hu ba tame pandar meng harei 1 bilan 7, canh sat Singapore brei tabiak sarak adat pacang dom gilang pariak, piah pacang dom bruk meyao meyit tapa tai khoan di urang medil lac gaok bleik saleik. Hukum nan brei khik daong ka urang hu siam jang tapa bruk pacang urang payua jien tame ka kol bleik. Kuhria dalam thun 2024, Singapore hu labiah 51.500 mbang pagat, yaok 10 minit hu sa mbang gaok pagat rah tabiak. Kuhria jien khat lahik tagok tal 1 ti 100 trieu dola My.

Sa kapol nyaom kol bleik pagat buh jien tame ngak mbang online di Tay Ban Nha hadei tuk dom urang rao jien tagok tal 540 trieu USD (labaih 14.000 ti dong). Jabat canh sat chau Au Europol khan brei thau, kapol nyaom nan hu pandar dom urang pambuak bruk daok di dunya piah jak ba phun jien tapa mek jien mbaok, payua jien di gilang pariak saong payua jien ndien tu. Dom urang pasang iek duah thau  medil lac hu labik ngak bruk di Hong Kong ( Trung Quoc), pandar dom blah web payua jien saong tai khoan di rilo urang piah mek jien, khik piah saong payua jien suan hukum.