Tame meng di harei ini (1/7/2025) karja bhum palei dalam negar yam tapa jaman bahrau – salih meng karja palei 3 pakat hu ngak bruk dalam 80 thun meng tuk padang taneh ia tapa karja palei 2 pakat. Dahlau nan, harei 30/6, di 34 tinh, ban dalam negar ba tabiak brei thau dom Sarak di Trung uong saong bhum palei ka bruk pagam jabat karja, padang kapul ndang, brei bruk ka pakat uy, HĐ Bhap bini, UB Bhap bini, Mat tran Negar tinh, ban, xa, dac khu.

Phaok Akaok Quoc hoi Lê Minh Hoan, gam haong kapul ngak bruk di Trung uong mai rivang co so vat chat di Phuong Tân Thành saong xa Phước Long, tinh Ca Mau dalam harei akaok meti ngak karja pakat xa bahrau. Phaok akaok Quoc hoi, padar kapul urang jakar, cong chuc di labik langyah harak gar karja brei caik hatai sangka tal yaok bruk ngak, bruk duh rahra. Brei salih jalan sahaneng, salih tapa bruk karja lagaih piah duh rahra; hagait rahra caong ye brei hu daong abih prein.

Phuong Binh Duong bahrau hu padang meng bruk pagam dom phuong Hòa Phú, Phú Mỹ, Phú Tân daok dalam Ban Thủ Dầu Một saong phuong Phú Chánh daok dalam ban Tân Uyên, tinh Binh Duong (klak). Phường Bình Dương hu 182 urang jakar cong chuc. Piah oh klaih klaoh harak gar karja ka rahra, urang jakar phuong phuong brei kham merat ngak siam bruk langyah dom harak gar. Hu taneh praong labaih 58km² saong hu rahra jaik 108.000 urang, “phuong praong” ini hu caong takre lac jeng sa ban ngak dahlau, kieu mau ka ban naih gheih di Ban raya Ho Chi Minh dalam harei hadei.

Dom phuong, xa dalam tinh Dong Nai (bahrau) hu srap gap ngak tui jalan bahrau meng harei ini 1/7. Ong Hồ Văn Nam – Bi thu Ndang uy phuong Trấn Biên, tinh Đồng Nai pandar urang jakar, cong chuc samar drah tani tanat, ngak bruk siam lagaih. Gam haong nan, pasang iek, jhul khang dom tukvak ngak danak dak hu makna dalam phuong daok ngak klaih klaoh. Dak harei dak paglaong asar siam raidiuk rahra njauk lac sa dalam phuong ba drei ngak dahlau bruk patagok kinh te – xa hoi di tinh Dong Nai.

Meng harei 7 ini cong chuc, vien chuc di Ban raya Ho Chi Minh brei hu pajeng raok oh mek jien meng pasak Binh Duong (klak) saong Ba Ria – Vung Tau (klak) mai tal labik ngak bruk. Dalam tukvak akaok, yaok harei bre hu 6 mbang pajeng, dalam nan hu 3 mbang nao saong 3 mbang mai, hu rabha jeng 2 tukvak. Sarak ini daong patrun bruk kateik geik jalan mbak saong brei kein lagaih, patakik jien nao mai ka kapul urang jakar, cong chuc ngak bruk di Ban raya Ho Chi Minh.

Labaih 2.100 ndap nda di Japon brei tagok yaom dalam bilan 7 ini. Kayua yaom pandap tamo nyu tagok rilo, gam haong jien pah urang urang ngak, urang daong bruk saong jien jitvu karei glaong jang. Dom janih gia vi yau tapunh kari saong ia suop dalam dalam dom ndap nda tagok yaom rilo abih, tagok tal 1.445 ndap nda. Dom ndap nda ahar keo, dalam nan hu chocolate saong keo sigum, dom janih ndap nda piah ngak pandap kaya yau ndap nda meng brah saong ia sot pasta jeng tagok yaom.

Hadei rilo mbang duah mek dom labik pachot pagat di gah Pur Myanmar, labaih 200 urang negar langiu hu daong ba tabiak min jeng daok gar gilac di tapen negar Thai Lan, dalam tuk cang caong gilac bhum palei. Tui Lien hop quoc, yaok rituh ribau urang hu jauk kateik geik ngak bruk dalam dom bruk chot pagat online yau ye buh jien tame ja, anit ranam ja atau me-in mbie suan hukum…Dom urang njauk chot pakat tapa nao ngak bruk, dom urang nan daok dalam bruk kan kandah kanjah jhak, gham, ndaoh ndien, taong paoh…meyah oh ngak tui panuac pandar di kol bleik.

Danak dak Pandap mbang Dunya di Lien hop quoc kakei ka bruk diukrai di yaok pluh trieu urang Sudan ti nan daok dalam negar saong daok di dom negar taphia, daok biak kan kandah. Kuhria meng hadei tuk mesuh metak rah tabiak di bilan 4/2023 hu labaih 14 trieu urang Sudan klak sang danaok nao dauk kalin…Lien hop quoc hu ngak rilo kham merat piah daong urang ti nan di dalam negar saong langiu negar. Min, jalan ngak daong siam gheih di Lien hop quoc bahrau tok mek hu 14% lac gah daong jien padai ndap nda njauk hu.