Harei ini Kuk Kuhria kapul padang bruk pasang iek bhum palei, gah ngak nong 2025 dalam negar, dui atah dalam 30 harei. Mbang pasang iek taong abih palei pala, gah ngak nong mbang ini pamaong tal 3 jalan ngak, nan lac padang jalan ngak, jalan patagok bhum palei, labik ngak nong, ngak kayau glai, kaya dalam ia saong pasiam raidiuk rahra bhum palei dalam negar; Duh bruk roh duah taong yaom, bruk ngak mbang di bhum palei saong bruk ngak nong, ngak kayau glai, kaya dalam ia, duh bruk roh duah dalam, pabak dom caong khin kuhria karei…

Page ini harei 1 bilan 7, TPHCM peih bruk parang iek thaot binguk ngan haong kadha “Ong Nguyễn Văn Linh – Urang pan kaok ba jalan khang kajap saong hadah krah dalam bruk ngak cach mang Viet Nam”,  pahadar 110 thun harei menek di Tong Bi thu Nguyễn Văn Linh (1/7/1915 - 1/7/2025). Ngan haong 100 blah thaot binguk, harak tapuk hu makna, parang iek brei mboh bruk diukrai, bruk ngak cach mang  jeng yau dom bruk daong taneh ia di ong Nguyễn Văn Linh piah taneh ia hu salih birau siam mekre. Prang iek daok brei mboh dom bruk ngak biak siam di ong Nguyễn Văn Linh tuk dahlau diah daok ngak Bi thu Thanh uy TPHCM saong ngak Tong Bi thu BCH T.Ư Dang Cong san Viet Nam.

Gam haong grauk dalam negar, harei ini, di taong abih 102 xa xa, phuong saong dom jabat, dom mban, dom gah di tinh Dong Thap (bahrau) jeng ba tangin tame ngak bruk. Mbang biai akaok meti di Kapul Rahra pakat xa, phuong hu padang piah brei tapa bruk ramik urang jakar ngak bruk, brei panduac ndom ka rilo asal kadha hu makna piah karja ngak njauk tui bruk di drei. Dalam tinh hu 103 Pasak Duh bruk Karja pakar xa hu ba tame ngak iek dahlau nan piah ka bruk jao brei salih harak gar online, pambuak saong klah rabha khao tin, du lieu rah tabiak lagaih, oh klaih klaoh.

124 jabat karja pakat xa di tinh Lam Dong nan lac tinh hu taneh praong bih dalam negar hu tame ngak bruk duh ka bhap bini. Dalam harei ngak bruk kaok meti, rilo bhap bini mai tame dom Pasak langyah harak gal  hu rilo, min dil sumu. Dom harak gal hu dom urang jakar kong chuc pak ini ngak samar, lagaih. Hu tuk phan mem pambuak bruk gak gar tavak, min dom bruk hu pasiam drah samar, oh ngak klaik klaoh ralo.

Meng harei 1 bilan 7, bhap bini atau kapol nyaom khin tut angan lek taka so ka radaih oto, moto, radaih patuh meda mai mbaoh harak di Jabat canh sa jalan mbak atau jabat Kong an  pakat xã  halei jeng hu dalam tinh, ban bo drei daok atau jaik labik drei ngak bruk. Bruk atah klak bhum tut ngan lek taka so radaih lac bruk ngak salih birau, ba mbuan lagaih  ka bhap bini, kapol nyaom. Ini lac jitvu di karja akok meti di Mentri Kong an hu ba tame ngak meng harei 1 bilan 7 gam haong bruk dak ramik veik jabat karja dom pakat.

Tong thong My Donald Trump mbaoh harak brei atah lak taong abih dom adat hukum taong phạt di taneh ia ini ngan haong Syri, hu ba tame pandar meng thun 1979. Ini lac bruk praong pamong tal bruk ba ngak siam veik My saong taneh ia Trung Dong hu rilo thun ngak tayak tayaic kayua mesruh metak. Sarak hu ndem cambaic laic, njauk ngak hasa jalan saong sron mbon salamat dalam negar haong dom taneh ia jaik taphia.

Patui veik hajan praong dui atah dreih yau rilo taneh ia gah Barak baoh taneh, Trung Quoc jaik hu sa mbang langik pandiak catang tagok tal labaih 40 do C. Anak bruk nan, taneh ia ini tapa hu 6 bilan langik pandiak glong abih di bilan ini meng dom thun dahlau lavik. Anak bruk bruk langik pandiak jaik mai tal, dom urang ilamo kakei bhap bini juai tabiak jalan mon 10 tuk page tal 4 tuk biar harei, brei menyum ginup ia saong pacang caga mebuh pandiak.

Apui khuah glai daok rah tabiak pambak praong di ralo labik di Tho Nhi Ky, abih di nyu nan lac bruk praong di tinh Izmir, gah Pei negar. Urak ini, dom glai apui daok mbang pambak praong tabiak tuk hangin khang tagok tal 40 - 50 km sa mon ba tal 42.000 bhap bini brei panduan ba nao labik karei. Dalam dom thun jaik ini, dom bhum tapen tasik di Tho Nhi Ky palai pajua kayua apui khuah glai tuk bilan he pandiak jeng, thu lagu jang kayua langik salih karei./.