Tukvak jaik ini, hu rilo bruk ngan haong urang pandar mang vien thong meng ndap nda papar riyak di dong (BTS) payua tin nhan hareik atau tin nhan chot pagat (yaih khan bruk ma-in mbia, mai dam, ataublah mek drap ar jien padai) tal dom lek taka so phone. Dom kol bleik ngak bruk sanak jak, pagam ndap nda angaok sang glaong rilo tal atau nao tapa tinh. Kayua nan, Kong an Ban raya Ho Chi Minh pachreih rahra truh oh peih dom jalan pambuak (link) oh krein, saong oh pabak khau tin di drei tame dom jalan link ini.

Ngak tui bruk ba tabiak salih pagam tinh, ban meng harei 1/7/2025, Buu dien Viet Nam brei peih ngak tui rilo jalan sumu gauk piah bruk ngak oh klaik klaoh, gar tavak, oh ngak kan bhap bini saong oh pabak jien pandar dom jitvu buu chinh. Yau nan ye, bhap bini brei khan veik, oh pabak khaw tin hagait  karei, oh lahik jien. Dom bruk ngak yau ye bayar jien daong rahra, BHXH, hanh chinh karja…hu siam lagaih yau bhian harei.

Di mbang nyaom biai HĐ Bhap bini tinh Dong Thap mbang ka X, tukvak 2021 – 2026 rah tabiak bahrau ini, Bi thu Tinh uy Dong Thap Lê Quốc Phong pandar dom urang roh duah bruk dui katut 30% - 50% tukvak langyah harak gar karja. Gam haong nan, maong iek padang dom sarak lagaih ka taneh riya, jien je; daong jien pato pakai urang ngak tui jalan cih tabiak di gah ngak mbang pablei salih…Gam haong nan caong khin, yaok urang jakar brei hu sa jalan sahaneng piah yam tame bruk daong prein ka sa Dong Thap cakrok patagok.

Piah khik hu tani tanat dalam raidiuk urang jakar meng tinh Binh Phuoc(klak) mai Dong Nai ngak bruk, UBND tinh Dong Nai hu sarak daong jien pah sang, jien mbang huak, tui nan brei  hu radaih pajeng raok labaih 1.400 urang jakar, kong chuc. Tukvak peih ngak 6 bilan kuhria meng harei 1 bilan 7. Jien daong kuhria labaih 99 ti dong meng phun jien di karja tinh Dong Nai harei pagam tinh.

Dalam bilan 7, Ban raya Ho Chi Minh brei hu hajan rah tabiak di rilo labik, hu labik hajan rilo saong hajan praong, rilo meng lac rah tabiak di kreh pandiak jala saong biar harei mesup, dui atah di rilo harei. Taong abih hajan bilan 7 hu kuhria lac jaik atau labaih tanut kuhria rah tapa di rilo thun, abih di nyu nan lac pataom di adit kreh bilan saong puac bilan. Rahra brei caga bruk dom bhum mbuan hajan ini khang tagok ngak jeng hajan atau ngak rabuk. Angin bilan Pei – Meraong di dalam bhum yuk meng gap mbiah tal yuk khang.

Tong thong My Donald Trump birau khan lac ginum biai hu siam lagaih bruk pablei salih haong Viet Nam. Tui bruk ginum biai nan, Viet Nam bayar jien je 10% ngan haong pandap pablei tame Mỹ saong jien je 40% ndap nda negar karei tapa. Salih ka bruk nan, Viet Nam brei adat ka My pablei ndap nda tame abih dom darak pasar negar drei. Ndem veik, Viet Nam peih pabah mbang darak pasar ka My tame saong bruk nan hu makna My meda pablei ndap nda tame Viet Nam oh mek jien je.

Campuchia mek hu labaih 26 trieu USD (labaih 687 ty dong) meng jien harak ve rah rivang Angkor Wat saong dom inem mek sajarah. Min, dalam bilan 6 tapa, dom tuai damuai dunya trun labaih 19%. Tui Kapul rah rivang Campuchia, tuai damuai dunya trun kayua bruk mbuan rah tabiak mesuh metak di tapen negar Campuchia – Thai Lan, ngak kan kandah biak praong tal bruk nao mai di tuai damuai. Dalam tuk nan Thai Lan lac darak pasar rah rivang dunya praong abih di Campuchia.

Di Prang, labaih sa ribau sang bac kareik pabah mbang  kayua langik pandiak. Anak bruk ban Paris dui atah tukvak kakei pakat glong meriak kayua pandiak. Rilo taneh ia daok tapen  Địa Trung Hải, jeng daok dang anak kan kandah kayua langik pandiak dui atah rilo harei tapa, ngak meda kan kandah tal prein yawa bhap bini saong mbuan apui khuah glai. Bruk langik salih karei kayua manuac sia ngak ba tal langik rilo mbang pandiak catang, rilo jang./.