Amăng anun, rĭm djuai ania ƀơi Dap Kơdư hơmâo lu phung djuai pơkŏn dong, pơjing rai gru grua ia iŏm hơmâo lu boh pơhiăp, er pơhiăp phara mơn.

Kơnong hăng djuai ania Jarai, ră anai glăk hơmâo lu tơlơi čih, boh pơhiăp anun lĕ Jarai, Jrai, Jơrai, Grai ƀudah Drai…

Tui hăng tơlơi jŭ yap sem lăng mơ̆ng jơlan hơdră pôr pơhiăp hăng tơlơi Jarai mơ̆ng GPJPVN, anăn Jrai lĕ tơlơi pơhiăp djơ̆ hăng kiăo tui tơlơi Jarai kual Cheo Reo hăng hơdôm phung djuai Jrai Chor hăng Mơthur. Bơ phung djuai pơkŏn kah hăng Jarai Hơdrung, Tơbuăn hăng Arap gơñu pơhiăp lĕ Grai, iâu glăi pô gơñu lĕ Grai; hơmâo mơn đa dong iâu Jơrai, Drai...

Tui pel ĕp mơng ƀing gơmơi, čih Jrai ăt jê̆ giăm hăng hơdôm tơlơi čih Jrai ia, Drai ia, Grai ia (tui hơdôm grup djuai) lêng kơ rơđah lĕ drai ia. Tui anun amăng boh pơhiăp mơng djuai ania ta hơmâo bơdjơ̆ nao kjăp kơplah wah Jrai hăng Drai ƀudah Grai ?

Kơ bruă anai, ơi Kpă Pual, Kơ-iăng khua gơnong bruă pơtô pơjuăt tơring glông Krông Pa, tơring čar Gia Lai brơi thâo:

“Anăn čih djuai ania Jrai hơmâo mơng đưm đă ră hlâo lah, neh met wa ta juăt iâu lĕ Jrai. Samơ̆ tui tơlơi čih J.R.A.I hơmâo mơng rơnuk Prang, ƀing gơñu kiăng djơ̆ hăng tơlơi čih jar kmar yua anun ƀing gơñu čih Jarai jing dua boh pơđok. Truh ră anai, Kơnuk kơna ăt hơmâo pơplih kiăng amuñ pơđok lĕ Gia Rai. Samơ̆ anăn čih sit nik mơng djuai ania Jrai lĕ Jrai, yua ruah boh pơhiăp mơng Jrai Chor lĕ phun. Ƀing rơgơi kơhnâo, ƀing kơsem min boh pơhiăp mơng rơnuk Prang wai pơgang, ƀing gơñu ăt ruah pơhiăp mơng Jrai Chor lĕ phun, yua ƀiă bơdjơ̆ nao boh pơhiăp hăng djuai ania pơkŏn dong. Kơnuk kơna ră anai ăt hluai tui Jrai Chor ngă boh pơhiăp phun brơi kơ hơdôm djuai Jrai phara”.

Neh met wa kiăng khăp! Ơi Rmah Wau-Thạc sĩ gơnong bruă wai lăng pơtô pơjuăt ăt tŭ ư hăng tơlơi bơrơđah kơ bruă čih, boh pơhiăp Jrai. Hlâo anun ñu lĕ mơnuih čih pơkra tơlơi Jrai mơng gơnong bruă pơtô pơjuăt tơring čar Gia Lai, ră anai ñu ăt mut hrŏm pơtô tơlơi Jrai, anai lĕ nai pơtô sang gưl prong Sư Phạm ƀôn prong Hồ Chí Minh, sang hră pơdong ƀơi Pleiku. Ơi Rmah Wau brơi thâo:

“Hăng djuai ania pơkŏn, ƀing gơñu ƀu dưi pơhiăp Jrai yua anun hơmâo čih jing dua boh pơhiăp kiăng amuñ pơđok. Yua anun tui kâo pơmĭn tơlơi čih Jr (Jrai) ƀing gơñu ƀu pơđok joh jơlah ôh anun pơčlah jing Jarai, dua boh pơhiăp phrâo, laih anun hơmâo Gia Rai dong. Tơdơi anai ƀing rơgơi kơhnâo djuai ania Jrai anun lĕ wa Rmah Der, Siu Pơi hơmâo pơkra glăi hăng hơmâo lu mơnuih tŭ ư lĕ yua Jrai đôč”.

Tơbiă mơ̆ng tơlơi tơnap, tơlơi iâu phara, tơlơi pơhiăp phara mơ̆ng djuai ania Jarai pơ lu plơi pla, kiăng hơmâo boh hră čih sit nik, tơlơi anai hơmâo čih jing dua yŭ, lơm čih pơblang tơlơi Yuan lĕ ta čih Gia Rai, laih anun anăn Gia Lai yua arăng pơhiăp ƀu rơđah, pơhiăp pleh hĭ.

Ƀing gơmơi pơmin, tơlơi phara anai ngă brơi tơlơi pơhiăp mơ̆ng djuai ania Jarai ñu hơmâo lu hloh, yua dah ta pơhiăp Jrai ƀudah Jarai hai, ƀing ta ăt jing sa djuai ania ƀơi Dap Kơdư đôč mơn, hơmâo tơlơi pơhiăp phara, hơmâo gru grua hiam phara.

Hăng ƀing pơblang hăng pôr pơhing tơlơi Jarai yua anun mơn čih Jarai kiăng lăp djơ̆ hăng dua boh pơhiăp hăng pơđok jing tơlơi yuăn lĕ Gia Rai tui hăng hơdôm djuai ania pơkŏn, kiăng kơ amuñ pơđok.

Neh met wa hmư̆ glông pôr pơhing hăng tơlơi Jarai, dưi sem lăng hăng pơgôp hiăp hăng ƀing gơmơi, kiăng djru djă pioh boh pơhiăp mơng djuai ania Jarai brơi lăp djơ̆ hăng djă pioh gru grua.

Hăng amăng jơlan hơdră tŏ tui, ƀing gơmơi čang rơmang hơmâo lu tơlơi pơgôp hiăp mơng ƀing gơyut, kiăng pel ĕp dong tơlơi Jarai, sit biă ñu lĕ hơdôm tơlơi pơtưh pơtô pơjuăt hăng tơlơi pơtă hiam klă amăng tơlơi hơdip mơda.