Amăng hơdôm boh eng ao phrâo hloh hăng anăn “Sắc màu Tây Nguyên”, pô čoh eng ao Nguyễn Việt Hùng hơmâo pơlir hrŏm bruă tuăi hrĕ mrai kiăng pơƀuh glăi hơdôm anŏ hiam phara mơng eng ao anun lĕ ia iom hăng rup mơñam. Rĭm blah eng ao lĕ anŏ yôm phara, hơmâo jŭ, mriah, kô̆ phara, ba glăi tơlơi tơkuh nao rai gru grua djuai ania Yuăn hăng djuai ania Êđê. Ñu brơi thâo, rơbêh 20 thun čoh eng ao djuai ania, ñu pô hơmâo hơdôm rơtuh blah eng ao čoh phara, hơdôm rơbâo eng ao yua bơnal mơrai, samơ̆ hơdôm blah eng ao hăng anăn “Sắc màu Tây Nguyên” hơmâo čoh pơplih phrâo ƀiă anun lĕ pran khăp mơ̆ ñu pô kiăng pơƀuh brơi djuai ania Êđê ƀơi Dak Lak.

“Gru grua djuai ania Êđê lu hloh amăng hơdôm blah eng ao kâo čoh. Amăng pran jua kâo, mơnuih djuai ania ƀiă blung a mơ̆ kâo thâo anun lĕ djuai ania Êđê. Hăng bơnga kơphê bluh kô̆ pôh amăng bơyan rơnuč thun, akŏ thun yôm biă mă hăng kâo, yua mơng dŏ anet, lơm rơdêh por plĕ trun pơ Dak Lak, lăng hyu đang hmua kô̆ pôh kar hăng pler, bơnga bluh kô̆ amăng hơdôm kơčong čư̆ ƀơi kual Dap kơdư, kâo lăng kar hăng tơlơi čang rơmang mơng dŏ anet”.

Hơdôm thun giăm anai, lu mơnuih čoh eng ao ƀơi Việt Nam hơmâo ngă hăng glăk yua bơnal mơrai čoh hơdôm blah eng ao, pơgôp bơnal mơrai buh amăng hơdôm hrơi ngui ngor pơƀuh eng ao hiam amăng lŏn ia hăng jar kmar. Bơnal mrai hơmâo mă yua kiăng čoh hơdôm eng ao juăt yua rĭm hrơi truh pơ hơdôm blah eng ao yôm, hrơi ngui buh eng ao hiam ƀudah ngui buh ao adai. Pô čoh eng ao Ngọc Bích, Khua sang bruă čoh eng ao djuai ania Bigally brơi thâo, pơhmu hăng hơdôm eng ao hơdôm djuai ania kual pơkŏn, eng ao djuai ania kual Dap kơdư dưi mă yua lu ƀiă yua kơ buh lăp hăng ngă hiam drơi jăn brơi mơnuih buh.

“Eng ao mơng hơdôm djuai ania ƀơi kual Dap kơdư, kâo ƀuh dưi mă yua hloh. Hlâo adih ƀuh arăng buh hơdôm eng ao djuai ania pô amăng hơdôm hrơi ngui ngor, amăng hơdôm jơlan hơdră adôh suang amăng hơdôm boh tơring čar đôč. Samơ̆ ră anai, kâo ƀuh bruă mă yua mơng eng ao kual Dap kơdư lu ƀiă yơh, lơm ƀing gơmơi čoh mơñam eng ao kual Dap kơdư, ƀing gơmơi ăt hơmâo lu eng ao phara, mơng tui gru grua đưm hlâo truh pơ pơplih phrâo hăng dưi mă yua amăng tơlơi hơdip rĭm hrơi ăt hơmâo lu mơn”.

Amăng bruă pơčeh phrâo lơm čoh eng ao hơmâo tơlơi gum hrŏm, tơlơi gum djru mơnuih ƀing thâo mơñam abăn ao amăng djop plơi pla. Anai lĕ hơdôm blah bơnal mơñam rai mơng ƀing rơgơi kơhnâo, bơnal mrai hơmâo čoh lu eng ao hăng tơlơi pơplih phrâo, djă pioh gru grua yôm phara mơng rĭm djuai ania. Yă H’Yam BKrông, dŏ amăng ƀuôn Tơng Jŭ, să Ea Kao, plơi prong Buôn Ma Thuột, tơring čar Dak Lak brơi thâo, bruă yua bơnai mrai amăng tơlơi hơdip phrâo amra pơjing rai jơlan gah hơđong kjăp amăng djă pioh hăng pơđĭ kyar gru grua anai.

“Kâo lĕ mơnuih mơñam mrai yua anun kâo čang rơmang abăn ao djuai ania Êđê plơi prong Buôn Ma Thuột lăi phara hăng tơring čar Dak Lak hnun mơna, wŏt eng ao djop djuai ania kual Dap kơdư dưi pơđĭ kyar kơtang ƀiă dong, kiăo tui jơlan pơplih phrâo samơ̆ ăt dŏ djă pioh gru grua hơđăp mơn. Mơng rup rap tui gru grua djuai ania amra pơđĭ kyar kiăng kơ abăn ao kual Dap kơdư hơmâo lu djop mơta hăng dưi pơđĭ kyar kơtang, hơmâo lu bruă mă brơi kơ adơi amai mơñam mrai”.

Ƀơi Dak Lak ră anai, abăn ao djuai ania glăk jing sa gơnam gru grua sĭ mơdrô amăng hơdôm hơbô̆ bruă pơđĭ kyar plơi pla. Lu grup mơñam abăn ao hơmâo pơlir hăng hơdôm anom bơwih ƀong sĭ mơdrô, anom bơwih ƀong hrŏm ƀudah ƀing hlăk ai pơphun bơwih ƀong kiăng ba gơnam tam sĭ mơdrô: Mơng hơdôm gơnam sĭ brơi tuai čuă ngui, gơnam tol yôl, gơnam yua truh pơ hơdôm eng ao ngui adôh suang. Hơdôm bruă mă ba ƀing čơđai sang hră ba tơl plơi pla kiăng kơ lăng arăng mơñum mrai ăt pơgôp pơplih phrâo amăng bruă črâo ba ƀing hlăk ai čơđai.

Phrâo anai hloh, jơlan hơdră ngui buh eng ao djuai ania hơmâo pơphun ƀơi tơring čar tum pơƀut ƀing dra hiam hăng ƀing čoh eng ao hiam hloh amăng lŏn ia, hơmâo pok rai jơlan gah phrâo amăng lăi pơthâo hăng ngă lar hyu gru grua anai, pơgôp pơpŭ bruă mơñam mrai gru grua amăng ƀon lan. Tui yă Nguyễn Thụy Phương Hiếu, kơ-iăng Khua gơnong bruă gru grua, bơrơguăt drơi jăn hăng tuai čuă ngui Dak Lak, tơdah dưi pơphun tui tơđar jơlan hơdră amra jing tơlơi gal prong amăng bruă pơlir hơbit hăng sĭ mơdrô gơnam tam pơkra mơng hơdôm bơnal mrai.

“Gơnong bruă hăng anom bruă pơphun čang rơmang amra dưi pơphun tui tơđar jơlan hơdră anai rĭm thun. Rĭm wŏt pơphun bruă mă amra hơmâo hơdôm anăn apăn, anih pơphun phara, kiăng pơgôp pơpŭ plơi pla mơñam mrai, djru sĭ mơdrô gơnam tam brơi ƀing mơñam mrai, kiăng ƀing čoh eng ao rĭm hrơi amra hơmâo lu eng ao phrâo hăng mă yua bơnal mrai ƀu djơ̆ kơnong čoh eng ao đôč ôh mơ̆ ăt hơmâo lu gơnam pơkŏn kiăng dưi ba sĭ mơdrô brơi kơ neh wa hăng pơpŭ abăn ao mơñam rai mơng neh wa”.

Bruă mă yua bơnal mrai pioh čoh hơdôm eng ao amra pơgôp djru brơi hơdôm bơnal mrai anai pơƀuh brơi abih bang mơnuih ƀiă dong, hơmâo lu anih djă pioh hăng pơđĭ kyar gru grua mơng abăn ao, pơpŭ kơ bruă mơñam mrai hăng ƀing rơgơi kơhnâo. Hrŏm hăng anun, kiăng kơ eng ao dưi pơđĭ kyar hơđong kjăp, kiăng tuh pơ alin ha amăng plĕ, pơjing hơdră bruă tong ten mơng mơñam, pơčeh rai eng ao phrâo, pơjing anăn apăn truh pơ bruă wai lăng, črâo brơi anih mơñam eng ao amăng ƀon lan./.