Tui hăng tơlơi pơmin mơ̆ng djuai ania Jarai, tơdơi kơ djai, bơngăt atâo ăt dŏ jê̆ ƀing ta đôč, pô djai hăng mơnuih hơdip ăt ƀuh nao rai mơn. Yua hnun, rim hrơi mơnuih hơdip ăt nao pơ pơsat mơn, kih rơmet, ba nao asơi ia kơ pô djai. Tơdơi kơ anun, bruă anai arăng pơđut hĭ mơn lơ̆m arăng huă pơthi. Kiăng pơhrup ngă bram, hrup hăng bơngăt atâo, arăng juăt mă hlŭ hiam, rơ-un, pik djŏp drơi jăn. Pơhrup jai sat, jai hŭi, ƀă hăng atâo mơtăm klă hloh.

Amăng tơlơi phiăn huă pơthi khŏm hơmâo bram. Amai Siu Thỏi, djuai ania Jarai hơdip pơ să Ia Mơ Nông, tơring glông Čư̆ Păh, tơring čar Gia Lai brơi thâo:“Tui hăng tơlơi phiăn mơ̆ng djuai ania Jarai, mơ̆ng huă pơthi khŏm hơmâo bram. Mă hlŭ pik ƀơi ƀô̆ mơta drơi jăn kiăng ngă atâo”.

Mơnuih djuai ania Jarai lăi bram lĕ atâo rơmuih, pơgang ba mơnuih djai hŭi atâo tưp djơ̆ ngă, ƀudah bram lĕ bơngăt atâo glăi pơ dêh ta, ngui ngor mơ-ak hrŏm hăng ană plơi jum dar pơsat.

Amai Rơ Châm Xuyết, djuai ania Jarai hơdip pơ să Ia Mơ Nông, tơring glông Čư̆ Păh, tơring čar Gia Lai brơi thâo: “Arăng pik hlŭ amăng drơi jăn ngă atâo lơ̆m huă pơthi. Lơ̆m ngă atâo bram arăng khŏm pơdop, ƀu brơi arăng krăn ôh. Ƀô̆ mơta ngă bram arăng pik hlŭ ƀơi ƀô̆, ƀudah arăng truă hơmôk kyâo, kơđuh pơtơi či gôm mơta pô ngă bram. Bram pơ ala brơi mơnuih djai hăng mơnuih hơdip”.

Mơnuih hơmâo ruah ngă bram lĕ mơnuih hơmâo pran jua, hơmâo tơlơi pơhiăp arăng hmư̆ tui. Pơhrup khŏm thâo mơn, ngă hiư̆m pă ƀu brơi arăng krăn, tơdah arăng krăn lĕ ƀing bram ngă bruă ƀu giong laih anun atâo mă mơtăm yơh.

Amai Rơ Châm Hà, djuai ania Jarai, dŏ pơ să Ia Mơ Nông, tơring glông Čư̆ Păh, tơring čar Gia Lai brơi thâo:“Bram juăt hơmâo amăng hrơi huă pơthi đôč, bơ hrơi pơkŏn ƀu hơmâo ôh. Kơnong kơ ƀing đah rơkơi đôč dưi ngă bram, đah kơmơi ƀu dưi ngă ôh. Juăt hơmâo tha wơ̆t hăng ƀing čơđai ngă bram, tui hluai kơ pô sang kiăng mơn. Đưm adih pô ngă bram khŏm kŏm byŏm. Pô ngă bram juăt ñu mơnuih djai bơnai ƀudah aka ƀu dŏ bơnai”.

Ƀing bram hơmâo ană plơi pơpŭ, khŏm hơmâo grup atông čing čơkă mơ̆ng anih pik hlŭ truh pơ pơsat. Tơdơi kơ ngă bram pơ pơsat, bram pơwơ̆t glăi tơlơi hơdip rim hrơi laih. Mơnuih ngă bram hrŏm hăng ană plơi ƀong mơñum, ayun suang, ră ruai puăi tlao.

Amai H’Uyên Niê, Kơ-iăng khua Khul đah kơmơi să Ia Mơ Nông brơi thâo: "Bram juăt hơmâo lơ̆m huă pơthi đôč, bơ hrơi pơkŏn ƀu hơmâo ôh. Bram pơ ala brơi bơngăt atâo, arăng glăi mơñum ƀong hlâo či glăi pơ dêh atâo. Jing tơdơi kơ anun, pô sang ƀu hơmâo nao dưm asơi ia pơ pơsat dong tah. Bram jing mơnuih pơhrup ngă bơngăt atâo. Bram dưi nao rai, nao jum dar pơsat či ngui hrŏm hăng neh met wa, sang anŏ tal rơnuč hlâo či nao pơ dêh atâo”.

Mơnuih djuai ania Jarai lăi pô djai hăng hơdip ăt dŏ hrŏm mơn. pơhrup ngă bram amăng hrơi huă pơthi pơdah pran jua hning rơngôt, thâo pơpŭ mơ̆ng ƀing dŏ hơdip hăng mơnuih djai. Arăng kiăng bơngăt bơnguai atâo lăng ba mơnuih dŏ hơdip hiam drơi jăn pran jua, plơi pla hơdip trơi pơđao yâo mơ-ak./.