Tom brơi (lơ 30/6), ƀơi Sang jơnum prong tơring čar Gia Lai phrâo, Khua anom pơtô bruă Ping gah hăng Pơtô ba mơnuih ƀôn sang dêh čar ơi Nguyễn Trọng Nghĩa git gai hăng lăi pơthâo hơdôm tơlơi pơsit yôm mơ̆ng Kơnuk kơna hăng tơring čar bơdjơ̆ nao bruă pơmut hrŏm gong gai tơring čar Gia Lai hăng Bình Định. Pơhiăp git gai mông ngă bruă, Ơi Nguyễn Trọng Nghĩa pơsit, bruă dăp glăi anom bruă tơring čar ƀu kơnong bruă pok prong kual lŏn ƀudah mrô mơnuih đôč ôh mơ̆ ăt pok rai tơlơi gêh gal pơđĭ kyar abih bang.

Tơring čar Gia Lai phrâo amra gêh gal pơđĭ kyar kjăp kơtang hloh amăng djŏp bruă kah hăng măi mok, ngă hmua hăng boh thâo phrâo, apui lơtrik hơdjă, bơwih bơwang, tơdrun ia rơsĭ, logistics hăng tuai čuă ngui. Bruă pơmut hrŏm tơring čar Gia Lai hăng Bình Định hăng anăn phrâo lĕ Gia Lai ƀu kơnong pơjing anih bơwih ƀong hăng kơđi čar phrâo đôč ôh, ăt pok rai tơlơi gêh gal kiăng tơring čar Gia Lai đĭ kyar abih bang hloh. Hăng tơlơi gơñăm nao prong pơ anăp wơ̆t hăng tơlơi git gai khut khăt, tơring čar Gia Lai hơmâo čang rơmang amra jing sa kual ngă gru, pơgôp prong kơ bruă đĭ kyar hrŏm mơ̆ng kual wơ̆t hăng amăng lŏn ia ta./.