Mơ̆ng hrơi anai, lơ 1/7, Lâm Đồng, Bình Thuận hăng Dak Nông sit nik mut hrŏm jing sa tơring čar Lâm Đồng phrâo, đơ đam prong hloh amăng dêh čar, mrô mơnuih ƀôn sang lu hloh ƀơi kual Dơnung Tong krah hăng Dap Kơdư.

Ƀơi Dak Nông, mơnuih ƀôn sang čang rơmang biă mă tơdơi kơ pơmut hrŏm amra ngă anŏ juă hrưn đĭ kơtang kơ plơi pla pơđĭ kyar bơwih ƀong huă mơnuih mơnam, biă mă ñu bruă tuai čuă ngui yua hneč mă anŏ gêh găl ƀơi tơring plơi pla lŏn mơnai glai klô hiam pơhưč tuai hyu ngui.

Ayong Nguyễn Anh Quốc, dŏ ƀơi tơring kual Ea Tling, tơring glông Čŭ Jŭt, Dak Nông hơđăp lăi, mơ̆ng hrơi akŏ pơdong tơring čar thun 2004, ƀuh pơđĭ kyar hmar hloh, tơlơi hơdip mơda mơnuih ƀôn sang pơđĭ kyar hơđong, ñu čang rơmang biă mă lơ̆m pơmut, dưi ba yua anŏ gêh găl mơ̆ng hlâo lŏn mơnai glai klô čơkă tuai kah hăng Lâm Đồng, Bình Thuận hăng Dak Nông, jai pơđĭ tui pran kơtang ngă bruă. Bơ tha plơi ơi Điểu Nơi, djuai ania Bơnông, dŏ ƀơi ƀôn Diêng Ngaih, să Dak Rtih, tơring glông Tuy Đức hơđăp kiăng, laih pơmut 3 boh tơring čar amra ngă pran kơtang hrưn đĭ pơtrut bruă mă pơđĭ kyar ƀơi tơring plơi pla. Tơring čar phrâo, hơmâo hơnơ̆ng bơwih ƀong huă prong hloh hăng tuh pơ alin lu nao pơ kual ataih, kual asuek kah hăng ƀôn Diêng Ngaih:

“Pơmut glăi hrŏm laih, mơnuih ƀôn sang djuai ania Bơnông Dak Rtih ăt gir run mă bruă bơwih ƀong huă mơ̆n, sa pran jua kiăo tui ping gah, kơnuk kơna. Djuai ania Bơnông čang rơmang laih pơmut glăi amra pơđĭ kyar klă hloh amăng kual plơi pla djuai ƀiă, khua mua tơring čar phrâo amra đing nao tuh pơalin lu amăng kual djuai ƀiă amăng anun mơnuih ƀôn sang ƀơi Dak Rtih. Jơlan rơdêh đuăi hmar amra pok prong, mơnuih ƀôn sang nao rai amuñ hloh”.