Amăng anun, 10 boh să, phường lông ngă lăng 2 mơta hơdră pơsir hră pơar pơkă glăi jơlan guai, pơčlah hăng rek glăi ling guai lŏn sang đang hmua laih anun pơsir hră rơkâo pơblih rĭ nao rai ling guai lŏn sang đang hmua kơ mơnuih ƀôn sang hơmâo hră yua lŏn.

Mông mă bruă lông ngă lăng tŭ yua hăng čang rơmang hrơi blan pơ anăp amra gêh găl, djru mơnuih ƀôn sang huăi rơngiă mông, prăk rô nao rai lu wơ̆t. Sang bruă Jơnum min mơnuih ƀôn sang dua tơring čar Gia Lai hăng Bình Định ngă hrŏm tong ten pioh dăp hơdră, pơphun bruă mă, pok anih pơtô brơi khua mua apăn bruă să, phường hrăm glăi bruă či ngă laih anun ĕp lăng gơnam yua anŏ gêh găl brơi kơ bruă mă, pơhlom hruaih hrĕ dăng kông mơ-it tơlơi pơhing, hră pơar, sem lăng măi mok, gơnam yua mă bruă, kĭ boh hră mrô bơwih brơi bruă tŭ mă hră pơar pơsir giong glăi mơ-it glăi pơ anih tŭ mă blung a, jao glăi kơ mơnuih nao ngă hră pơar. Abih bang jơlan hơdră, bruă mă ngă hră pơar, pơsir amăng glông măi komputer soh, tla prăk apah ngă hră pơar ăt amăng mrô online soh mơ̆n, djop mơta boh tơhnal pơdưm amăng mrô, truh kơ ngă giong hră pơar, mơ-it amăng glông điện tử amuñ ngă, amuñ thâo hluh hăng pơsir bruă mă.