Kơ-iăng Khua dêh čar ơi Nguyễn Hòa Bình hơ-ưč hmưi hơdôm khul grŭp Ping gah, Grŭp apăn bruă Ping gah 2 gưl hăng ƀing khua git gai dưi ruah, apăn bruă hăng pơmin sit ñu ƀing gơñu amra ngă tui klă bruă mă, bruă gơgrong, lăp djơ̆ hăng bruă gơgrong prong hmâo jao, djru mơnuih ƀôn sang, djru pơjing plơi pla pơđĭ kyar hrŏm hăng đơ đam dêh čar amăng rơnuk phrâo hrưn đĭ pô.

Kơ-iăng Khua dêh čar ơi Nguyễn Hòa Bình ăt rơkâo mơn khul mơnuih apăn bruă, mơnuih mă bruă čar tơring čar Lâm Đồng tañ pơphun bruă mă, pok pơhai ba glăi bôh tơhnal hơdôm bruă jao. Rơkâo ƀing khua mua dưi pơpha bruă, apăn bruă khom ngă tui pran jua, bruă gơgrong pơphun mơtăm amăng bruă mă.

Ơi Y Thanh Hà Niê Kdăm, Khua git gai Ping gah tơring čar Lâm Đồng, mơ-it nao tơlơi pơpŭ bơni kơ Ding jum kơđi čar hơmâo đăo gơnang ruah ñu mut hrŏm Khul apăn bruă hăng ruah ngă Khua git gai Ping gah tơring čar. Khua git gai Ping gah tơring čar Lâm Đồng phrâo ƀuăn amra tŏ tui pran gum pơgôp, gum hrŏm kjăp hăng khul apăn bruă, khul djru bruă Ping gah tơring čar phrâo hăng khua mua hơdôm boh ƀon lan tơdơi kơ pơmut hrŏm, kiăng kơ ba tơring čar phrâo pơđĭ kyar djơ̆ hăng tơlơi gal glăk hơmâo, djơ̆ tơlơi čang rơmang mơng Ping gah, kơnuk kơna hăng mơnuih ƀôn sang.

Tui anun, tơring čar amra tŭ mă hơdôm tơlơi gal mơng lŏn mơnai, hơmâo kual gah kơdư, ter hang ia rơsĭ hăng hơdôm tơlơi yôm mơng gru grua mơng tơring čar, kiăng pơjing jơlan gah pơđĭ kyar bơwih ƀong huă-mơnuih mơnam sui pơ anăp. Pơdah pran đăo gơnang nao tơlơi anai, ơi Điểu Minh dŏ ƀơi să Đức An, tơring čar Lâm Đồng brơi thâo:

 “Lơ 1/7 amra akŏ pơjing tơring čar phrâo, amra hơmâo lu djuai ania dŏ hơdip hrŏm, anun lĕ M’nông, Yuăn, Êđê, Jarai, K’ho, Nùng, Tày hăng lu djuai ania pơkŏn dong. Kơ gru grua mơng rĭm djuai ania hơmâo anŏ phara mơn, anun lĕ tơlơi adôh, er čing hơgor, tơlơi ngă yang rơbang ăt hơmâo anŏ hrup. Kiăng pơphun pơbưp ngui ngor hrŏm djop djuai ania amăng tơring čar Lâm Đồng kiăng abih bang thâo krăn nao rai, kiăng tơring čar pơkŏn thâo gru grua mơng ƀing gơmơi”.