Mơguah lơ 25/6, ƀơi Quảng Bình, Khua git gai Ping gah dêh čar ơi Tô Lâm hăng grup hyu mă bruă mơng gơnong glông hơmâo mông mă bruă hăng Khul apăn bruă Ping gah tơring čar Quảng Bình hăng Khul apăn bruă Ping gah tơring čar Quảng Trị kơ boh than pok pơhai ngă tui hơdôm tơlơi pơtrun, tơlơi klah čun mơng gơnong glông hăng sa, dua bruă jao phun pơđĭ kyar bơwih ƀong huă-mơnuih mơnam, pơhlôm hơđong amăng tơring čar Quảng Bình, Quảng Trị.

Mông mă bruă pơphun lơm dua boh tơring čar Quảng Bình hăng Quảng Trị glăk pok pơhai hơdră pơmut hrŏm kiăng akŏ pơjing  anih anom mă bruă phrâo pơanăn tơring čar Quảng Trị. Tui rơkâo, tơring čar Quảng Trị tơdơi kơ pơmut hrŏm amra hơmâo 78 anih anom gưl să. Anom mă bruă phun pơdong ƀơi plơi prong Đồng Hới. Amăng mông mă bruă, Khua git gai Ping gah dêh čar ơi Tô Lâm hrŏm hăng grup hyu mă bruă gơnong glông hmư̆ khua mua hơdôm boh ƀon lan lăi pơthâo kơ bruă pok pơhai hơdôm tơlơi pơtrun, tơlơi klah čun mơng gơnong glông; bruă dưm dăp anih anom mă bruă amăng ƀon lan tơdơi kơ pơmut hrŏm; hrŏm hăng hơdôm tơlơi rơkâo kiăng pơsir hĭ tơnap tap, pơhlôm tŭ yua hăng hơđong amăng hrơi blan pok pơhai.