Drim ngai 02/07 tàm Anih tờm sră pơ àr gơnoar ătbồ dà lơgar sàh Tân Hà Lâm Hà, càr Lâm Đồng, gĭt nđờ jơ̆ nă cau nggui lơh ală sră nggal, sră pơ àr, mìng gơrềng tus broă ù tiah lơm. Ồng Phạm Duy Lâm, ơm tàm thôn Đức Bình tus ndo hơ̆ sồng gĭt ờ gam kâp kơnhoàl, lơh sră nggal pà tam gơl Sră cơng tàng gơnoar ngui ù rơ̆p bơh kâp sàh dê lơh. Geh kwang bàng jơh nùs jơh tồr ngan bơto pơlam, ồng Lâm chờ hờp mờ pin dờn sră nggal rơ̆p gờn geh bơsong niam.

“Ngai do lòt lơh den gŏ kwang bàng jơh nùs jơh tồr bơto pơlam, bơta lơi ờ hềt bơsong geh den khi pơrgon. Bè hơ̆ den kung di sơl, kung gơn kơnờm là sră nggal mhar niam”.

Kung lòt lơh sră nggal gơrềng tus ù tiah sơl, mò Hoàng Thị Thanh Nhàn ơm tàm ƀòn B’Srê B, sàh Tà Đùng, càr Lâm Đồng ai lơh niam nùs ngan mờ bơta tam gơl pa, broă lơh mờng chài mờ gĭt jơnau ngan bơh gơnoar ătbồ sàh pa dê. Mò Nhàn kơ̆p kờñ làng bol tus lơh sră nggal rơ̆p geh đơs bơta niam drơng broă tàm anih lơh broă sồ sră pơ àr gơnoar ătbồ dà lơgar.

“Pal lam lơh gờñ, nàng làng bol in geh ală jơnau đơs wơl, jơh nùs halà ờ jơh nùs, 5 sơrmañ là jơh nùs, 4 sơrmañ là jơnùr dồ êt rlau pơnyơu là bè hơ̆. Broă ai điềm kung gơ jăt tàm nùs nhơm mơya tŭ kwang bàng drơng niam ai làng bol in den nùs nhơm làng bol dê pal niam ngan gơ”.

Tơnơ̆ dùl poh lơh jăt tơmŭt bal, gơnoar ătbồ kâp sàh tàm càr Lâm Đồng neh mŭt lơh broă, bơh sơnrờp kung pà gŏ gam kal ke sơl bè phan bơna anih lơh broă, măy mŏk phan ngui, ngan là ală Anih tờm sră pơ àr gơnoar ătbồ dà lơgar. Nàng bơsong, đơng lam ală ƀòn lơgar gĭt nền lơh jơh broă ờ gŏ di là pal jơh jiơ, gam làng bol là gam drơng broă. Ồng Nguyễn Minh Toàn, Phó Củ tịc Anih duh broă Làng bol mơkung là Kwang Lam bồ Anih tờm sră pơ àr gơnoar ătbồ dà lơgar sàh Tân Hà Lâm Hà, càr Lâm Đồng pà gĭt, tàm bàr pe ngai sơnrờp, sàh neh dờp bơsong mờ bơto pơlam mờr 160 sră nggal. Geh uă broă gơ wèt gơnăp gơnoar kâp kơnhoàl lài do. Mơya mờ bơta rơcăng nền nòn mờ tam gơl nùs nhơm lơh broă jăt gùng dà drơng broă, kâp sàh pa neh sền bal lơh geh jơnau kờñ broă lơh làng bol dê. Ồng Nguyễn Minh Toàn, đơs nền: “Bol hi neh gĭt nền lài, broă lơh sàh pa kơn jơ̆ kơn jŭt ngan, tŭ do mờr bè 100% bơnah broă bơh kâp kơnhoàl lài do dê jàu rê ai kâp sàh pa in, den tàng là bol hi neh rơcăng lài bơh sơnrờp tơn, sồr kwang bàng niam ngan rlau jơh nàng drơng broă làng bol in. Mờ nùs nhơm sră pơ àr gơnoar ătbồ dà lơgar drơng broă den bol hi rơ̆p cèng tus ai làng bol in dồ bă niam ngan rlau jơh, ală sră nggal rơ̆p ƀươn soh ngan rlau jơh”.

Gĭt nền rài sră pơ àr gơnoar ătbồ pa là drơng broă làng bol in, tàm uă sàh, sơnah ƀòn càr Lâm Đồng dê neh mờ gam tam gơl pa nùs nhơm lơh broă, tam gơl bơta ờ rơcăng lài tus rơcăng lài. Uă sră nggal neh geh lam lơh tàm tơrbŏ bal ờ jăt nhàr ù tiah. Bal dùl sră nggal, làng bol, mpồl lơh sa kă bro gơtùi săc rwah lơh tàm sàh, sơnah ƀòn do halà sàh, sơnah ƀòn ndai den tàng gơnoar ătbồ tàm uă sàh, sơnah ƀòn neh rơcăng lài jòi tus làng bol, mpồl lơh sa kă bro mờ sền khi bè cau năc nàng drơng broă.

Jăt ồng Trần Nam Thuần, Củ tịc Anih duh broă Làng bol sàh Tà Đùng, càr Lâm Đồng, dilah bơta niam drơng broă ờ niam lơh uă làng bol pal lòt tus sàh ndai lơh sră nggal den mpồl lơh broă sră pơ àr gơnoar ătbồ sàh dê digơlan gơtìp đơs là ờ hềt niam. Den tàng bè hơ̆, gơnoar ătbồ sàh gam mblàng yal nàng mpồl lơh broă pa lơh broă jăt gùng dà drơng broă, neh sền làng bol, mpồl lơh sa kă bro bè là cau năc.

“Tam gơl dờng ngan rlau jơh bơh gơnoar ătbồ ƀòn lơgar 2 kâp dê là tơrgùm nàng drơng broă làng bol mờ mpồl lơh sa kă bro. Gơlik bơh bơta hơ̆ den bơh ală ngai sơnrờp tơn, Anih duh broă Làng bol sàh Tà Đùng neh pơrjum, mblàng yal jơh ală kwang bàng, kông cưk in nàng tam gơl bơta sơnơng, broă lơh. Jăt tàm bơta yal tơnggĭt jơnau, mblàng yal nàng làng bol in gĭt geh ală sră nggal sră pơ àr gơnoar ătbồ den hơ̆ kung là gùng dà lơh broă nàng hoài jà làng bol tàm broă bơsong sră nggal gơnoar ătbồ”.

Tơnơ̆ dùl poh lơh broă jăt broă lơh gơnoar ătbồ ƀòn lơgar 2 kâp pa tàm càr Lâm Đồng gam pà gŏ ală bơta tam gơl pa jơh nùs ngan. Ờ gam ờ rơcăng lài, sră pơ àr gơnoar ătbồ jăt nùs nhơm lơh broă lài do mờ neh geh bơta tam gơl jăt di jơnau kờñ, pơlam gùng bơh Dà lơgar dê sồr lơh, hơ̆ là rềp làng bol, wă wờng làng bol mờ drơng broă làng bol in niam rlau.