Di dơ̆ tus bal Pơrjum kwang bàng kấp dờng BRICS rề ơnàng mờ lơh jat ală broă lơh đah 2 gah tàm lơgar Brazil, Thủ tướng ồng Phạm Minh Chính neh wă đơng lam bồ Kông ty Granja Fujikura – Anih lơh sa suơn dờng broă lơh sa suơn sre măi mok pa tàm lơgar Brazil gơwèt ală kông ty Granja Fujikura bơh lơgar Nhờk dê. Thủ tướng ồng Phạm Minh Chính pà gĭt, Việt Nam gam sơlơ tơnguh tai kă bro phan, bơcri priă mờ lơgar Brazil, den tàng jờng rơ ngan ală Tập đoàn, mpồl lơh sa kă bro lơgar Brazil sơlơ tơnguh tai bơta gĭt gơ̆p do bơtàu tơnguh.

Thủ tướng kơ̆p kờñ ală mpồl lơh sa kă bro geh jơnau đơs sơlơ tơnguh tai Việt Nam kĭ hơ FTA mờ Mpồl Mercosur mờ Jơnau kĭ hơ kal ke sền gàr dong kờl bơcri priă. Mơkung kơ̆p kờñ Kông ty pơn jat tai tàm tơrbŏ ală mpồl lơh sa kă bro Việt Nam mờ ală mpồl lơh sa kă bro Brazil. Thủ tướng đơs nền, broă Kông ty Fujikura Quail Genetics lơh broă bal mờ Kông ty Trọng Khôi cèng wơl bơta kwơ ai jơh bal 2 gah in tài Kông ty Trọng Khôi geh bơta pràn bè gen mờ rơ̆p ngan ngồn mờ lơh sa mờ măi mok gah ròng phan, tàm rài tơnơ̆ do, 2 mpồl lơh sa kă bro rơ̆p ai geh drà kă bro tàm jơh bal 2 lơgar, cèng wơl uă bơta kwơ rlau tai.