Broă jun drơng broă anih priă jền tus rềp mờ làng bol ờ gam tai là jơnau đơs mờ bơr lơm gời ờ, mờ tŭ do gam geh lơh ngan ngồn tam tơl sơnah gùng lòt tàm tiah ù pơr hê Tây Nguyên dê. Ală rơndeh anih priă jền trờn làm bă tiah, geh rcang tơl làm măi tíñ, măi in, măi kờp priă mờ gùng pờ internet pa ngan gơmut jrô tàm ală thôn, ƀòn tiah sar lơgar ngài bơh Tây Nguyên dê, pờ geh tŭ tơngai niam tus bal drơng broă anih priă jền ƀuơn rlau mờ song dơ pă ai làng bol tiah do in.

Ala tài pal lòt gĭt nđờ jơ̆t kơi sồ bè lài do, làng bol tŭ do ƀuơn ngan lơh sră pơ àr càn priă bơcri, dờp priă, tong priă cồng halà pơyoa priă tềm pềr tàm sàh he dê tơn. Tơl tiah lơh broă ntrờn làm bă tiah geh bơyai lơh niam ngan, ngui măi mok pa ngan, gàr niam bơta lơngăp lơngai lơh broă, mờ tơn lơyah tơngai bơsong sră pơ àr. Broă lơh bơh ală mpồl càn priă mờ rơndeh lơh broă trờn làm bă tiah neh ai gĭt nđờ rơbô tơmàn đông priă càn dong kờl tus mờ làng bol tiah làng bol jơi bơtiàn dồ ết nă cau, pơgồp bơnah dong kờl broă lơh sa suơn sre mờ bơtàu tơnguh lơh sa hìu bơnhă.

Tàm càr Dăk Lăk, tus ngai 30/06, Agribank lơh geh jơng kah dồs rlau 21 rơbô 700 tơmàn đong, tàm hơ̆ 2 bơnah 3 lời ai broă lơh sa suơn sre ƀòn lơgar in mờ rlau 34 rơbô nă cau càn priă. Ồng Võ Tiến Nam, Phó Kwang Lam bồ Agribank tàm càr Dăk Lăk, pà gĭt:“Tŭ bol añ ai rơndeh rơndồ măi mok càn priă tàm ală tiah ntrờn ơm kis, làng bol cau lơh broă sa rơndăp tŭ tơngai, ai càn priă ƀuơn ƀoài ngan. Mơya, kung gam kal ke tŭ mut tàm tiah sar lơgar ngài tài bơh phan bơna măi mok ờ hềt tơl bè jơnau kờñ”.

Ờ mìng tàm kấp ƀòn lơgar, halà gah ai càn priă lơm, ngui măi mok gam geh pờ ơnàng, tàm tơrbŏ ndrờm bal mờ ală gah ndai bơh rài lơh sa dê. Anih duh broă Làng bol càr Khánh Hoà tơnggơs Anih tờm Jat sền, Đơng lam lơh broă ngăc ngar, do là dùl broă lơh kwơ màng tàm broă lơh jat Jơnau lơh nền tàm pơrjum sồ 57 bơh Ƀộ Cíñ trị dê bè bơtàu tơnguh jak chài, măi mok mờ tam gơl sồ Dà lơgar, kung bè Jơnau lơh nền tàm pơrjum sồ 68 bè bơtàu tơnguh lơh sa làng bol dê lơh is.

Anih tờm do tơrgùm 7 phần mềm, 15 drơng broă mờ 22 ală broă jàu, ai gơnoar tàm tơrbŏ dồ ròt bal đah làng bol, mpồl lơh sa kă bro mờ gơnoar atbồ ală kấp. Ală jơnau yal tơngĭt bè rơndăp ù tiah, ù tiah, rơndap broă lơh hòi jà bơcri priă geh yal loh làng song dơ pă, dong mpồl lơh sa kă bro sền gĭt jơnau yal dồ bă ƀuơn ngan mờ mhar ngan. Ồng Nguyễn Tấn Tuân, lài do là Củ tịc Anih duh broă Làng bol càr Khánh Hoà pà gĭt, broă tam gơl sồ atbồ ờ mìng pơgồp bơnah tam gơl niam sră pơ àr gơnoar atbồ lơm mờ gam là bơnàng jă nàng tơnguh uă bơta song dơ pă tàm bơcri priă, lơh geh tiah lơh sa kă bro ring bal: “Loh làng bol añ rơ̆p ờ tus rềp is tơl mpồl lơh sa kă bro lơm mờ tus rềp tàm ală bơta tàm internet, den tàng, pleh geh broă kwèng mờ do cau ne halà geh ală broă do, broă ne. Bol añ gŏ do là ală broă lơh song dơ pă ngan ai ală mpồl lơh sa kă bro in, tơl mpồl lơh sa kă bro ndrờm ring bal tŭ tus bal bơcri priă tàm ù tiah càr Khánh Hoà dê”.

Nam 2025 là nam “gơguh mhar, tam gơl pràn lơh sir broă lơh” bơh broă rơndăp lơh bơtàu tơnguh lơh sa- mpồl bơtiàn 5 nam bơh nam 2021–2025, gah anih priă jền geh dờp kơnòl broă 2 dơ̆: gàr niam lơh sa dờng, mờ lơh geh bơta pràn càn priă ai gơguh lơh sa in. Tŭ do, ală càr tiah đah Jum tàm gùl lơgar mờ Tây Nguyên gam geh jàu kơnòl broă gơguh GRDP bơh 8-13%. Anih priă jền Dà lơgar neh gờñ lam lơh dồ ròt bal uă broă lơh kwơ màng. Anih priă jền Dà lơgar pơlam gùng dà tơrmù priă cồng đơng lam, mơkung sồr ală anih priă jền kă bro phan tơrmù priă tă nàng tơrmù priă cồng ai càn dồ bă geh ngan ngồn. Ală priă ai càn kung geh rơndăp tăp sèng wơl, ai lài ai gah kwơ màng bè lơh sa, tăc phan mờ lơgar ndai, lơh sa mờ măi mok dong kờl mờ mpồl lơh sa kă bro dềt mờ dimơ. Bal mờ hơ̆ là lam lơh ală broă lơh ai càn priă dong kờl ờ sa priă cồng uă jat broă lơh Dà lơgar dê, wèt tus ală gah ai lài bè bơtàu tơnguh broă lơh sa suơn sre mờ ƀòn lơgar.

 Ồng Đào Minh Tú, Phó Kwang ătbồ Anih priă jền Dà lơgar pà gĭt, gah anih priă jền sền gĭt loh gơnoar broă tờm tàm bè ờs lơh sa dờng, gròi sền roh giă priă mờ lơh geh bơta gơn kơnờm gơguh lơh sa. Mờ bơta pơgồp bal đah măi mok, broă lơh di pal mờ nùs nhơm rcang lài, ală anih priă jền rơ̆p pơn jat tai lòt bal mờ làng bol bal mờ mpồl lơh sa kă bro, pơgồp bơnah lam Dà lơgar cơn đoà kơ̆ mut tàm rài bơtàu tơnguh sồ, pa ngan mờ kơ̆ kơl jăp jŏ jòng. Ồng Đào Minh Tú pà gĭt tai:“Lơh pràn ngui măi mok tàm drơng broă anih priă jền- dùl gùng dà broă lơh ờ gơtùi pleh klàs bơh tơngai pa dê, do là broă lơh sồr pal geh bơta kràñ cê jơh nùs. Gah anih priă jền sơlơ pal sền gŏ loh bơta hơ̆. Anih priă jền neh mờ gam lam lơh ngui măi mok bè lơi sơlơ niam uă, ƀuơn ngan rơ̆p sơlơ tơrmù geh priă jền ờ duh pal tă ai mpồl lơh sa kă bro in. Hơ̆ là priă jền lòt rê, priă lơh sră pơ àr.. geh gơrềng ală bơnah càn priă, rơ̆p dong drơng ală broă lơh geh kwơ ngan, priă tă lơh ờ uă”.