Ngai 06/07, Tàm Brasil, Thủ tướng Cíñ phủ ồng Phạm Minh Chính neh tus bal Pơrjum Kâp dờng BRICS rề ơnàng nam 2025 mờ geh jơnau đơs kwơmàng tàm Dar cribơyai kâp dờng BRICS rề ơnàng bè “Tơngguh tai nùs nhơm uă gah, ală broă lơh sa- priă jền mờ bồ tơngoh jak kòn bơnus dê lơh”. Dar cribơyai mờ bơta tus bal bơh 35 nă Kwang đơng lam mờ ala măt ală lơgar tàm mpồl, ală lơgar lơh broă bal mờ cau năc jà bơh BRICS dê, bal mờ đơng lam ală mpồl ală lơgar bè Liên hợp quốc, Mpồl Kă bro phan dunia (WTO), Mpồl Lơh sơnơm Dunia (WHO), ală mpồl priă jền bơtàu tơngguh ală lơgar mờ kơnhoàl ù tiah do dê.

Đơs tàm pơrjum, Thủ tướng ồng Phạm Minh Chính đơs sùm gơnoar broă mờ tă pơgồp bơh ală lơgar tiah đah jum plai ù dê tàm ătbồ broă gùt plai ù. Thủ tướng geh pe jơnau sồr kwơmàng, geh kwơ ngan tàm lơh broă bal uă gah jăt tàm bơta pal jăt tờm ngan bơh Sơnoa boh lam Liên hợp quốc dê mờ adăt boh lam ală lơgar dê, chồl tơngguh lơh khăt gơboh kă bro phan, ki ngàm gơnoar mờ bơta kwơ di mờ kơrnoăt boh lam, dipal ngan bơh ală dà lơgar dê; ngui niam bơta pràn bơh bồ tơngoh jak kòn bơnus dê lơh gam geh hòi là AI nàng drơng kòn bơnus in.