Mò Ka Brêt nam do neh rlau 80 sơnam ơm tàm sàh Đinh Trang Hòa, kơnoàl Di Linh, càr Lâm Đồng chờ hờp đơs: “Añ kờñ ngan iat jơnau đơs dà K’Ho bơh Anih jơnau đơs Việt Nam dê. Lài do añ sùm pơnđiang kòn mờ jơnau pơnđik, ală jơnau pơnđiang kòn mờ dà đơs kòn cau he dê ƀuơn ngan pơnđiang kòn bic lơhă, uă jơnau pơnđik geh gơtha niam ngan mờ ală kòn sau kờñ ngan iat añ đơs pơnđiang. Añ kơp kờñ ngan jơnau đơs dà K’Ho lơh niam broă sền gàr mờ bơtàu tơnguh dà đơs kòn cau he dê”.

Gơ wèt mờ cau iat rơdiô kơnòm să, bơyô Ka Duch ơm tàm sàh Đinh Trang Hòa, kơnhoàl Di Linh, càr Lâm Đồng den kơp kờñ: “Oh kờñ ngan sền gàr dà đơs cau K’Ho he dê. Tŭ do, rơnàng kơnòm să ngui uă dà yoan den yàng ờ gam git tai dà đơs kòn cau he dê, geh uă tŭ tơm boh bơr ờ gam mìng dà kòn cau he dê tai. Bè hơ̆ den tàng oh kơp kờñ ală bi lơh jơnau đơs dà K’Ho bơh VOV dê dong bol ih git jơnau đơs dà kòn cau he bơh jơnau pơnđik, jơnau đơs crih nàng cau kơnòm să in git mờ bal mờ gơp sền gàr mờ bơtàu tơnguh jơnau đơs kòn cau he dê.

Ùr pơgru Ka Mhởn bơto tàm Hìu bơsram kâp 2 sàh Tân Thượng, kơnhoàl Di Linh tam pà bal ală kal ke tàm broă đơs mờ dà kòn cau tàm tŭ bơto bơtê. Bè hơ̆ den tàng, bơh broă iat jơnau đơs dà K’Ho bơh Anih jơnau đơs VN dê neh dong pơgru Ka Mhờn sơlơ geh tai jơnau git wă bè dà đơs kòn cau he dê:  “Niam să jơnau đơs dà K’Ho bơh Anih jơnau đơs Việt Nam dê. Añ iat mờ kờñ ngan jơnau đơs dà K’Ho bơh Anih jơnau đơs Việt Nam dê. Tàm hìu bơsram, bol hi bơto kơnòm bơsram mờ dà kòn cau he dê nàng cau kơnòm să in git mờ bal mờ gơp sền gàr mờ bơtàu tơnguh jơnau đơs kòn cau he dê”.

Gơ wèt mờ ồng Kơ Să Ha Nhiếu ơm tàm sàh Phú Hội, kơnhoàl Đức Trọng, càr Lâm Đồng, là bơyô iat rơdiô đềt mềr bơh jơnau đơs dà K’Ho VOV Tây Nguyên dê. Pa do, ồng neh hòi điện thoại ală cau lơh gơs jơnau đơs dà K’Ho in mờ kơp kờñ: “Niam să jơnau đơs dà K’Ho, añ kờñ ngan iat cau chài đơs jơnau pơnđik mờ añ kờñ. Cau chài đơs pơnđik geh jơnau đơs bè do “Ding mơi bing bàp dài”. Añ kờñ ngan iat ală jơnau pơnđik bè hơ̆. Dan nting sap jơnau đơs dà K’Ho geh uă pràn kơldang să jan yơ”.

Mờr 25 nam neh lòt gan, jơnau đơs dà K’Ho bơh anih jơnau đơs VN dê pơn yờ să ngan là rbàng tơrbŏ đah jơnau đơs Đảng mờ nùs nhơm làng bol dê, là bơyô đềt mềr ngan bơh cau K’Ho dê tàm làm gùt ù tiah dà lơgar mờ tàm dunia.