Ƀòn lòt nhơl mpồl bơtiàn Ta Lang, sàh Avương, ƀòn dờng Đà Nẵng ơm jat kềng gah gùng Hồ Chí Minh kah yau. Năc lòt nhơl tus tàm do geh sền gĭt bal mờ làng bol mut tàm brê pĭc biăp, pơ̆ ƀang, mù tàm dà croh kŭp ka, gơm is ală phan sa ờs mờng mờ sền ală dơ̆ bơyai lơh ràng tơlik đơs crih, đơs pơn đick tam ya Kơtu dê tềng hơđơm hìu Gươl.

Bi A Lăng Mít, ơm tàm sàh Avương pà gĭt: Làng bol kòn cau Kơtu ală nam lài do mìng gĭt lơh sre mìr, bơta rƀah, bơta jơ gloh ting jat sùm. Bơh tŭ ƀòn lòt nhơl mpồl bơtiàn Ta Lang lơh geh, hìu bơnhă bi Mít kung bè làng bol tàm thôn sơnđờm tus bal. Nam 2018, bi Mít geh Dà lơgar dong kờl 40 tơlak đong, hìu bơnhă càn tai lơh niam wơl hìu ơm lơh lòt nhơl homestay. Năc tus sền sền gĭt dilah geh jơnau kờñ, hìu bơnhă bi A Lăng Mít geh drơng broă trŭ gơm phan sa, hìu ơm rlô trồ mang tàm homestay mờ giă 100 rơbô đông dùl nă cau. Bi A Lăng Mít pà gĭt: “Tơngai geh năc lòt nhơl làng bol chờ hờp ngan, hìu añ geh tăc tus ơm rao. Ngai sơlơ bơtàu tơnguh lòt nhơl mpồl bơtiàn làng bol geh priă jền đau. Năc tus den geh trŭ gơm phan sa ai năc in, làng bol tàm ƀòn kung geh tai priă jền đau. Lài do lơh sre mìr mờ ờ geh tơnhào den ờ geh phan sa, tŭ do lơh lòt nhơl rài kis geh priă jền đau”.

 Ƀòn lòt nhơl mpồl bơtiàn Ta Lang, sàh Avương geh Viện Bơtàu tơnguh câu Á, Rơndăp broă lơh Trường Sơn Xanh bơh anih lơh broă bơtàu tơnguh lơgar Mỹ dong kờl mờ Mpồl Lòt nhơl Việt Nam dong kờl ngan ngồn geh tàm jàu ai mpồl bơtiàn in ngui mờ drơng broă năc lòt nhơl nam 2019. Bơh tŭ sơnđờm lơh lòt nhơl, làng bol kòn cau Kơtu tiah do gĭt wă rlau tai broă sền gàr tiah ơm kis nàng lơh geh tiah rềp mềr mờ năc lòt nhơl. Tiah do neh lơh wơl hìu Gươl, pơlam tàp sàng goh phan ngui sa, tơnggơs ală mpồl drơng broă trŭ gơm phan sa mìng gơm ală phan sa ờs mờng bơh kòn cau Kơtu  dê, lơh niam wơl broă tàñ phan, tàñ ồi kòn cau... Ală dơ̆ bơyai lơh tam ya tân tung, da dá, đơs lý, ràng tơlik đờng gòng kòn cau bơh làng bol dê geh tơmŭt tàm drơng broă geh năc lòt nhơl kờñ ngan sền. Năc lòt nhơl gam geh sền gĭt mpồl brê Pơ Mu, brê lim, brê đỗ Quyên yau gam cèng bè ờs bơta barah barài bơh brê bơnơm dê. Ồng Mạc Như Phương, Củ tịc Anih duh broă Làng bol sàh Avương pà gĭt: “Lòt nhơl tàm ù tiah do dê sơnđờm pa geh lơh, tàm tŭ lam lơh tơnguh uă bơta gĭt wă bơh làng bol dê. Bơh hơ̆, rài kis làng bol lơh lòt nhơl tơnguh rlau, pơgồp bơnah bal tàm bơta bơtàu tơnguh lơh sa tơn jơh jơgloh tơrmù rƀah tàm ù tiah do dê”.

 Ƀòn lòt nhơl mpồl bơtiàn ĐhRôồng, ơm tàm sàh Đông Giang geh 35 hìu bơnhă  tus bal mờ 82 nă cau lơh broă sùm. Bi Briu Thị Hạnh, cau tàm mpồl tàñ ồi kòn cau,  ƀòn lòt nhơl mpồl bơtiàn ĐhRôồng pà gĭt, lài do, ồi kòn cau geh tàñ ồi mìng ngui tàm hìu bơnhă lơm, tŭ do phan bơna lơh geh drơng broă ai năc lòt nhơl in blơi lơh phan pà den tàng rài kis bơh làng bol kòn cau dê neh tam gơl. Jat bi Hạnh, dùl pang ồi tàñ tăc tàm drà geh giă bơh 800 rơbô đông tus 1 tơlak đong, pang ồi lơyah 500 rơbô đông, ồi nggoăc 1 tơlak 200 rơbô đông. Bơdìh mờ tus bal mờ mpồl tàñ ồi kòn cau, bi Hạnh gam là cau tàm mpồl trŭ gơm phan sa mờ mpồl đơs crih tam ya drơng năc lòt nhơl in: “Năc lòt nhơl tus lùp blơi phan den he tăc, cau lơi kờñ blơi ồi mpơn, ào soh khi mut tàm hìu he mờ khi blơi. Mpồl geh 35 nă oh mi. Pơn yơu chèo pơn ngko he tăc 250 rơbô đông 1 nơm, phan bơna do geh dờp là phan bơna OCOP, he kung tàñ ală phan ndai lơh phan lời kir bè kơldung ià, kơldung ơn điện thoại, kơldung ơn gai cih, đơs bal là geh uă phan bơna”.

Neh geh gĭt nđờ jơ̆t ƀòn tàm ală sàh tiah kơh bơnơm tàm ƀòn dờng Đà Nẵng bơtàu tơnguh broă lơh lòt nhơl mpồl bơtiàn, lòt nhơl ƀòn brê bơnơm, lòt nhơl ƀòn lơh broă. Ƀòn dờng Đà Nẵng geh uă broă lơh dong kờl ală ƀòn lòt nhơl in, bè: sơlơ tơnguh lơh bal ală mpồl lơh sa kă bro, kông ty drơng năc lòt nhơl, bơto pơlam cau lơh broă lòt nhơl, lơh pràn broă lơh gơ hòi gơ jà yal tơngĭt uă tàm ală gah mblàng yal jơnau, internet nàng gơ hòi gơ jà năc tus sền, lòt nhơl pơgồp bơnah lơh geh broă lơh ai làng bol in, tơnguh tai uă priă lơh geh bè ờs wơl rài kis, tơrmù rƀah kơ̆ kơl jăp jŏ jòng.