Jat jơnau kơlôi sơnơng bơh kòn cau Jarai dê, tơnơ̆ tŭ chơt, huềng kung gam ơm gùt dar, đah cau chơt mờ cau kis kung gam bơta gơ rềng. Bè hơ̆ den tàng, pah ngai cau kis kung gam lòt còp ƀồc cau tờm pròc mhàm dê, pơs wàs sàng goh mờ cèng biap piang cau neh sang rài in. Tơnơ̆ dùl tŭ tơngai, broă do mìng tơn jơh tơnơ̆ tŭ cau bơyai lơh Bơthi. Nàng bơka să jan gơ gơs cà bŏ tàm dơ̆ bơyai lơh ñô sa bơthi ƀồc, ndrờm mờ ală huềng cà, cau rơ wah ală bŏ rơhền, niam mờ bong jơh să jan. Bơka să jan sơlơ ờ niam, sơlơ sền gơ lơh rơngòt, sơlơ gơ lơh bè cà den sơlơ niam.

Tàm dơ̆ bơyai lơh ñô sa bơthi ƀồc pal geh cà bŏ. Bi Siu Thỏi, kòn cau Jarai ơm tàm sàh Ia Mơ Nông, kơnhoàl Chư Păh, càr Gia Lai pà git: “Jat bơhiàn bơh yau cau Jarai dê tŭ bơyai lơh pơ thi pal geh cà bŏ. Ai bŏ bong tềng muh mat gơ gơs cà bŏ”.

Cau Jarai đơs là, ală Bram là ală huềng cà lơ bơn, sền gàr cau chơt bơh ală cà iơh lơh aniai, halà mpờl gŏ bơh rùp să ală cau neh sang rài dê rê wơl dunia, chờ hờp bal mờ ƀòn lơgar gùt dar tiah hìu ƀồc.

Bi Rơ Châm H’Xuyết ơm tàm sàh Ia Mơ Nông, kơnhoàl Chư Păh, càr Gia Lai pà git: “Cau bơka să jan gơ gơs cà bŏ tàm tŭ bơyai lơh ñô sa bơthi ƀồc. Tŭ lơh cà bŏ den cau pal mpồn muh mat, mpồn mat sơnđan. Muh mat bơka gơ gơs cà bŏ, bong ù bŏ tềng muh mat halà pơn phan jơm muh mat mòn bơh tờm ju nàng jơm muh mat cau lơh cà bŏ dê. Cà bŏ là rùp pơrya ai cau neh sang rài in mờ cau gam kis”.

Cau geh rơ wah lơh Bram pal là ală cau pràn kơldang, geh bơngă pin dờn. Bơka să jan pal chài, lơh bè lơi nàng ờ lời cau ndai in đal git he, dilah gơtìp đal git den hơ̆ là ală Bram ờ lơh gơs kơnòl broă mờ rơp gơtìp cà kup.

Bi Rơ Châm Hà, ơm tàm sàh Ia Mơ Nông, kơnhoàl Chư Păh, càr Gia Lai pà git: “Cà bŏ sùm geh mat tàm dơ̆ bơyai lơh bơthi ƀồc, ai ngai ờs den ờ geh. Mìng geh cau klau hơ̆ sồng bơka să jan gơs cà bŏ, ai cau ùr den ờ geh lơh pơgap. Sùm den geh cau dờng mờ kòn se lơh pơgap cà bŏ, gơ jat tàm jơnau sồr, bơta sac rơ wah bơh cau tờm bơyai lơh ñô sa bơthi ƀồc dê. Rài yau cau lơh pơgap cà bŏ pal wèr ngan. Cau lơh pơgap cà bŏ sùm pal là cau geh pơ ùr neh chơt halà cau ờ hềt geh bau”.

Ală Bram sùm geh ki ngàm, pal geh mpồl dròng cing mồng wă rò bơh tiah bơka să jan tus tiah hìu ƀồc. Tơnơ̆ tŭ lơh pơgap cà bŏ tàm tiah hìu ƀồc, ală Bram rê wơl mờ rài kis bè ờs. Ală cau lơh pơgap Bram bal mờ làng bol tàm ƀòn ñô sa, tamya, tơm boh bơr chờ hờp.

Bi H’Uyên Niê, Phó Củ tịc Mpồl cau ùr sàh Ia Mơ Nông pà git: “Bram geh mat tŭ bơyai lơh ñô sa bơthi ƀồc ai ngai ờs den ờ geh. Bram là rùp pơrya ai ală huềng cau neh sang rài in, cau rê nô sa chờ hờp dơ̆ dut ndơl. Hơ̆ là tơnơ̆ ngai hơ̆, cau ờ geh cèng piang biap tus hìu ƀồc cau chơt in tai. Bram là ală cau ngan mơya bơka să jan gơ gơs ală huềng cà. Cà bŏ gơtùi lòt tìp mat, lòt gùt dar hìu ƀồc nàng tơm boh bơr mờ ală cau tàm jơi nòi, hìu bơnhă dơ̆ dut ndơl nàng khi rê hờ dunia làng ƀồc”.

Cau Jarai đơs là, cau neh sang rài mờ cau kis kung gam bơta gơ rềng. Bơka să jan gơ gơs cà bŏ tàm dơ̆ bơyai lơh ñô sa bơthi ƀồc ai tơnggŏ bơta kah kơlôi, ki ngàm bơh cau gam kis dê gơ wèt mờ cau neh sang rài. Cau kơp kờñ huềng cau neh sang rài dê sền gàr cau gam kis in pràn kơldang, ƀòn lơgar geh rài kis ring lơngai, hờm ram, chờ hờp.