Tàm hìu is he dê, cau chài mò Y Beo pờ tơl pang sră cih wơl ală jơnau pơnđik bơh mò tơrgùm wơl mờ geh. Mò mblàng jơnau pơnđik, hơ̆ sồng đơs pơnđik tơl nă cau in iat. Ală jơnau pơnđik bulah lơyah, gùng đơs mờng kwèng mơya tŭ iat cau chài mò Y Beo đơs, rơlĕ rơlùn, cau lơi kung gŏ gơ lơh ring lơngai ngan. Yal bè jơnau bơh tài git tus jơnau pơnđik cau Bahnar dê, mò Y Beo pà git: “Añ git đơs jơnau pơnđik Bahnar jơla rlau mờ ală bơyô ring rơh ndai. Hơ̆ là tài bơh tŭ gam dềt mè añ dê chơt gờñ, ờ geh bơta ƀuơn bè ală bơyô ndai den tàng ờ gơtùi tìp mat, lơh kwèng, bơsram uă. Ală jơnau git wă bè jơnau pơnđik halà tàñ ồi kòn cau den iat bơh cau ndai. Añ sùm kờñ geh dùl ngai rơp geh dùl nă pơgru bơto he in nền nòn, wil tơl”.

Mò Y Beo yal, bơtuah ngan là nam 12 sơnam, mò geh lòt bơsram niam chài tàm Dà Làc. Tŭ git sền sră, git cih, tìp mat uă cau neh dong mò sơlơ git mhar, bơsram git uă bơta, ngan là bè niam chài kòn cau. Tus tŭ rê wơl Kon Tum, mò mut tàm mpồl đơs crih tamya mờ geh tŭ niam tus bal đơs pơnđik uă rlau, geh bơsram tai uă rlau. Mờ bơta chài mùl geh tàm să bal mờ bơta kờñ gơboh să tờm dê, tŭ pa tòm 20 sơnam, mò Y Beo neh tiơng pơn rơ ngan tài bơta chài đơs pơnđik mờ tàñ ồi kòn cau. Mò yal: “Broă bơsram đơs pơnđik gơ wèt mờ añ ƀuơn ngan, pah tŭ iat cau kra đơs pơnđik den añ iat nàng git sap lài, jơnau pơnđik den digơlan 2, 3 dơ̆ tơnơ̆ hơ̆ sồng git. Tơnơ̆ bơh 3 tus 4 dơ̆ iat ndang, đơs ndang den añ neh chài ngan đơs ală jơnau pơnđik lơyah. Añ cih wơl jơh ală jơnau pơnđik pah tŭ bơsram đơs, tŭ ru den sền wơl nàng đơs”.

Jat mò Y Beo, jơnau pơnđik Bahnar cèng dùl bơta is ồn pơndrờm mờ ală jơi bơtiàn ndai tàm bơta chài đơs, sap đơs mờ jơnau đơs. Tŭ đơs pơnđiang kòn den ờ mìng mờ jơnau đơs mờ gam wañ să jan rơlĕ rơlùn bè ai lơh pơn yơu jơnau đơs pơnđik in.

Kềng bơdìh hìu dờng niam, cau chài mò Y Beo cèng bơrnơ̆ tàñ biài bal mờ ală blah ồi gam tàñ nàng yal nac lòt nhơl in. Tàñ ndang, mò đơs ndang ală jơnau pơnđik chờ hờp. Mò pà git, neh gơ gơs mờng kwèng, pah tŭ tàñ ồi den mò sùm đơs jơh jơnau pơnđik do tus jơnau pơnđik ndai. Gơ lơh gơlik mò in bơta kờñ, hô hơng rlau tŭ lơh broă.

Sap ntas mờng kwèng bơrbơ̆ tàñ ồi dê ntas, mò Y Beo lơh rơlĕ rơlùn tàm tơl bơnah broă: “Cau Bahnar mùl lơbơn niam, kis gơ tàm sòr tàm ƀòn lơgar, brê bơnơm den tàng ală rùp bơka tàm blah ồi kòn cau Bahnar dê kung lơbơn mờ niam ngan sơl, mờng ngui ală dà trum tờm ngan bè jù, pơrhê, rơmit ờs mờng. Ồi kòn cau bơh cau Bahnar dê bơdìh mờ soh tàm ală dơ̆ lơh chờ, lơh yàng, gam gơtùi mòn ală phan ngui tàm hìu, tàm ală dơ̆ lap klau tam bau ùr”.

Kờñ niam chài bơh yau, mò sùm bơto wơl kòn sau in bè broă lơh tàñ ồi kòn cau mờ đơs pơnđik. Jat mò den bơsram tàñ ồi pal sơn đờm bơh bơta triăng sền mờ git gŏ, tŭ neh gŏ geh tơl bơta kờñ gơboh mờ kờñ bơsram den hơ̆ sồng lơh gơtùi. Tàñ ồi pal lơh uă bơnah broă, mơya kal ke ngan rlau jơh là dang che brài nàng mòn gơs ală blah ồi niam.

Cau chài mò Y Beo neh bơto wơl niam chài kòn cau Bahnar ai uă cau in, mờ geh uă cau bơsram tơnơ̆ do neh gơs ală cau chài tiơng pơn rơ. Tŭ do bulah neh dờng sơnam, mơya mò kung gam gàr huềng bơta kờñ gơboh bè niam chài bơh yau, tŭ lơi kung kờñ tus bal ală dơ̆ lơh chờ mờ pờ ơdŭ bơto đơs pơnđik, tàñ ồi kòn cau. Cau chài mò Y Beo: “Tŭ bơto wơl cau kơnòm să in, bơta kal ke ngan rlau jơh là bơta kờñ gơboh ală oh dê gơ wèt mờ niam chài bơh yau là ờ hềt tơl. Ală oh tơnơ̆ tŭ jơh bơsram den ờ huan geh lơh ngan ngồn, gơ mut tàm ală bơta nhơl ñŏ pa den tàng ờ gơtùi lơh gơlik bơta bơceh pa, bơta chài ngan ngồn ală oh dê. Añ kung kơlôi rơcang ngan tàm tơnơ̆ do, ală bơta kuơ niam chài rơp gơtìp roh huĭ hời rơhời”.

Tềng đap bơta tam gơl bơh rài kis pa dê, cau chài mò Y Beo kung tam tàñ ồi kòn cau nàng drơng rài kis hìu bơnhă, jơi nòi in. Mò kung gam kơ̆ nùs gàr huềng broă lơh bơh yau do, mờ tàm pơn jat tai ală jơnau pơnđik lơbơn niam kòn cau dê.