Nam do bulah neh mờr 70 sơnam, mơya ồng K’Keo sùm lơh krơh lài tàm tơl broă, đơs gơ jat bal mờ lơh. Bè bơtàu tơnguh lơh sa hìu bơnhă, hìu bơnhă ồng dê geh 2 lồ ù mìr tam kơphe, pah nam tơnhàu geh rlau 8 tấn kơphe gar; 8 sàu sre lơh kòi 2 kàl, pah nam tơnhàu geh mờr 8 tấn kòi. Bơdìh hơ̆ tai, hìu bơnhă ồng gam tam bơrlŭ ală bơta chi tam ndai tàm suơn kơphe bè sầu riêng, mắc ca, ƀơ, pơnat… Kơnờm bơh hơ̆, hìu bơnhă ồng K’Keo ờ mìng geh phan sa, phan prap ơn mờ gam dong kờl làng bol tàm thôn tai. Ồng pà git: “Lài do làng bol tàm thôn ờ hềt git ngui bơta chài măi mok tàm broă lơh sa, tam kòi, tam kơphe ờ hềt git bơta chài ơn phơng, sơngka sền gàr. Hìu bơnhă añ dê là cau lơh lài ngan, tŭ să tờm, hìu bơnhă lơh geh cồng nha den làng bol tus lùp, bơsram mờ đòm jat, bơh mờng chài lơh gơtùi, añ ndrờm yal jơh làng bol in, kơp kờñ làng bol kung lơh gơtùi bè he sơl”.

Thôn Hàng Làng geh 384 hìu bơnhă làng bol (uă ngan là cau K’Ho), tŭ do mìng gam 4 hìu bơnhă rƀah. Rài kis phan bơna ngai sơlơ bơtàu tơnguh, bơta niam chài nùs nhơm làng bol dê ngai sơlơ li la. Mò Ka Lèm, ơm tàm sàh Di Linh pà git, kơnờm ală tă pơgồp bơh ồng K’Keo dê mờ thôn Hàng Làng neh geh uă tam gơl niam: “Ồng K’Keo là cau geh bơngă pin dờn, geh jơnau đơs tàm ƀòn lơgar tàm bơtàu tơnguh lơh sa mpồl bơtiàn, sền gàr niam chài bơh yau kòn cau. Ồng sùm jơh nùs tàm broă lơh mblàng yal gùng dà, broă lơh bơh Đảng, adat boh lam bơh dà lơgar dê tus làng bol, pơlam làng bol git lơh sa geh cồng nha, hòi jà làng bol tam klac bal, gàr niam lơngăp lơngai tàm ƀòn lơgar”.

Jat bơta hòi jà bơh ồng K’Keo dê, uă hìu bơnhă làng bol neh sang tĕ ală bơhiàn ờ niam bơh yau, bal mờ gơp bơt bơtàu rài kis gơguh jak, tam gơl pa. Ồng pà git: “Bal mờ mpồl duh broă cau kra ƀòn, cau geh bơngă pin dờn bơh thôn dê, añ sùm tơngkah hìu bơnhă, jơi nòi, lam sồr kòn sau bơsram bơta niam, bơta di, bơta pa nàng bơtàu tơnguh, ờ gŏ di lơh broă ờ niam lơh aniai tus ƀòn lơgar. Gam pràn den añ gam lơh, pơgồp bal bơta pràn mờ Đảng, dà lơgar, bal mờ ƀòn lơgar tơngkah oh kòn lơh bè lơi nàng bơtàu tơnguh lơh sa hìu bơnhă, sền gàr niam chài bơh yau kòn cau, thôn ƀòn ring lơngai, jơh nùs jat Đảng, jat dà lơgar”.

Ồng K’Keo gam là cau wă wờng jrô ơnàng bè niam chài bơh yau kòn cau K’Ho dê. Tàm ală broă lơh niam chài tàm tiah làng bol jơi bơtiàn dồ êt nă cau tàm Lâm Đồng, ồng sùm lam mpồl cau chài tus bal mờ ai geh uă khà jờng. Să tờm ồng K’Keo neh bơto tơn 5 ơdŭ cing mồng ai kơnòm dềt mờ ơruh pơnu tàm ƀòn lơgar in.

Ồng Phạm Văn Linh, kwang đơng lam sàh Gung Reh lài do, tŭ do là sàh Di Linh, càr Lâm Đồng pà git, ồng K’Keo neh pơgồp bơnah kuơmàng ngan tàm broă lơh bơt bơtàu rài kis pa tàm tiah jơi bơtiàn dồ êt nă cau tàm sàh: “Ồng là cau geh bơta chài, git tơm boh bơr kung bè hòi jà làng bol tàm ƀòn tàm broă Đảng mờ Dà lơgar kờñ mblàng yal, hòi jà làng bol bè sang tĕ bơhiàn ờ niam bơh yau ờ gam dipal mờ rài kis pa tai halà ngui niam ală bơhiàn bơh yau niam chài cau K’Ho dê. Ồng K’Keo neh lơh niam ngan broă do”.