Tơrŭm môi tuăn “Tơdroăng eăng bâ dêi rêm rơxông, troăng hơlâ pêi pro tung plâ tơdroăng cheăng dêi Đảng

“Tơrŭm, tơrŭm, tâi tâng thế tơrŭm - Ƀlêi trâng, ƀlêi trâng, tâi tâng kô ƀlêi trâng” - Rơkong tơpui ối rak ta troh ah dêi Pôa Hồ Chí Minh-Kăn xiâm hnê ngăn tơnêi têa ki apoăng sap ing chal XX nah troh nôkố  xuân u ối ai pơxúa kal kí.  Drêng lâp tơnêi têa hiăng ƀă dế pêi pro tiô troăng hơlâ xing xoăng, pro rế lĕm rah iâ tê mơngế pêi cheăng tung khu kăn xiâm kal kí; tơ’mot tơdjuôm mâu tíu pêi cheăng ăm tơnêi têa, “rah xing xoăng nếo mơngế pêi cheăng ăm tơnêi têa’’, tơkŭm po tơdroăng vâ mơnhông tơƀrê krá rơdêi sap nah hâi chói ai.

Tung tơdroăng ton nah mơjiâng ƀă rak vế tơnêi têa Việt Nam, ing tơdroăng tơrŭm dêi rơpó, pin hiăng kâi bro ki rơ-iô chiâng tơniăn, pro chiâng ôh tá pơxúa tŭm tơdroăng ki khu ‘mêi hriăn vâ pro “tơklâ, tơ’nhiê tơnêi têa’’.

Sap ing pơxiâm mơjiâng nah, Đảng kŏng sản Việt Nam hiăng rak krá tuăn tơmiêt troăng hơlâ tơrŭm môi tuăn tâi tâng hdroâng mơngê, ngăn mê hlối cho xiâm vâ pêi hlối cho xiâm ki vâ pro rơdêi tơdroăng pơkâ kâi ƀlêi trâng tơdroăng cheăng kăch măng. Sap hơnăm 1943, Đảng hiăng pơkâ Hlá mơ-éa chêh mâu tơdroăng kal túa lĕm tro Việt Nam ƀă pái tơdroăng kal thê mơhnhôk, tung mê ai “Plâ mơdât troăng hơlâ pêi pro ăm túa lĕm tro lơ phá tơ ê xêh  tơdroăng kuăn pơlê hmâ pêi pro, ‘nâ lơ hơngế kuăn pơlê” - tŭm tơdroăng thế ai pơxúa ăm kuăn pơlê, tơkŭm hên kuăn pơlê veăng pêi.

Đảng pin hiăng tơbleăng hên tơdroăng pơkâ tung hlá mơ-éa hiăng rah chêh hdrối ‘na tơdroăng pơtối rak vế ivá rơdêi ki tơrŭm dêi rơpó. Tơdroăng pơkâ kơxô̆ 23 hơnăm 2023 rôh apoăng ai tơbleăng tơdroăng pêi pro Pơtối rak  ivá rơdêi ki tơrŭm dêi rơpó tâi tâng hdroâng mơngế xua kuăn pơlê kro mơdrŏng, tơnêi têa rơdêi, pơlê pơla tơdâng tơ’mô, kuăn pơlê môi tuăn, rơkê plĕng”. Kơ’nâi 20 hơnăm, troh hơnăm 2023, Đảng pơtối pơkâ kơxô̆ 43 ‘na mơdêk tơdroăng hmâ pêi pro ƀă rơdêi tơrŭm tung mâu hơnăm la ngiâ.

Tơnêi têa kal thế pơ’lêh nếo

Tơnêi têa pin dế pêi kơtăng troăng hơlâ pơ’lêh nếo, ‘mâi hơ’lêh rơdêi khu kăn cheăng kal kí; xing xoăng pro rế lĕm khu pêi cheăng rêm râ ƀă tơbleăng tơdroăng mơnúa pêi cheăng dêi mâu kăn kong pơlê péa râ. Ki xiâm cho vâ kơdroh mơngế pêi cheăng, mơdêk pêi cheăng tơƀrê, ai pơxúa tung rak ngăn tơnêi têa, hlối xoăng râ, xoăng hnoăng rơdêi tâ ăm kong pơlê.

Túa pêi cheăng mê ôh tá xê to tah râ ki tơdế ôh tá kal, mê tơdroăng ki kal tâ cho tơkŭm po nếo tơdroăng pêi cheăng ăm mơnhông krá ton, vâ mâu kăn achê kuăn pơlê, ƀă vâ kuăn pơlê tâ, xua kuăn pơlê, pêi cheăng vâ pơxúa ăm kuăn pơlê lĕm tro tâ; Tíu xiâm xuân tối nhên hnoăng ƀă pơcháu hnoăng hên tâ ăm mâu kăn kong pơlê vâ rêm tíu rơkê ƀeăn, hriĕn plĕng ki nếo, mơnhông tơtro khât.

Laga, tơdroăng rah iâ mơngế cheăng tung khu cheăng kal kí; pro rế lĕm nếo tíu pêi cheăng pro hlá mơ-éa xuăn tơdjâk hên troh mâu kăn ƀô̆, đảng viên, mâu kăn pơkuâ... Tơdroăng mê kal thế pro tơdâng nhên rak ki tro, môi tuăn ƀă mơ eăm khât tơdroăng kal kí  malối cho chiu pôu pá xua tơdroăng tơdroăng ki pơxúa tơná. Xua mê, tơrŭm tung tâi tâng khu cheăng kal kí cho khuă vâ lôu ki châ tơƀrê dêi tơdroăng ‘mâi hơ’lêh mê.

Drêng tơ’mot tơdjuôm kong pơlê, mâu tơdroăng tô tuăn ‘na inâi krếo ki nếo, Tíu pêi cheăng, lơ tơdroăng xoăng mơngế pêi cheăng tơ’lêi pro tuăn  ngôa  chiâng  ai tuăn tơmiât pơchông ngăn ki lâi pơxúa ki lâi lŭp tâ. Tơ’nôm amê nếo, ki phá ‘na túa vêa vong, túa tơná rêh ối cheăng kâ ƀă tơdroăng hriâm hên hlê plĕng tâ pơla mâu tíu pêi cheăng pro hlá mơ-éa xuân pơkâ pơloăng mơnúa kân. Tơdroăng tơ’mot tơdjuôm pơla kong pơlê kong ngo ƀă kong pơlê tơbăng , lơ pơla mâu kong pơlê “kro mơdrŏng”  ƀă kong pơlê “kơtiê’’ kal thế mâu kăn pơkuâ ai hiâm mơno tơdrăng khât ngăn nhên, vâ tơniăn tơdâng ƀă mơngế ki pêi cheăng ƀă tơtro ki pơxúa vâ mơnhông tơƀrê.

Tâng ôh tá tơrŭm, ôh tá môi tuăn dêi rơpó kô chiâng pá ôh tá tro troăng ‘nâ hía chiâng mơgât tơdroăng vâ pêi cheăng tơƀrê dêi khu kăn pơkuâ.  Xua mê, rak ki tơrŭm cho tơdroăng cheăng pêi ki kal má môi - cho tơdroăng pơkâ vâ tŭm tơdroăng cheăng ‘mâi hơ’lêh ki ê pêi pro tơ’lêi hlâu. Vâ rak vế ƀă ‘mâi mơnhông ki tơrŭm dêi rơpó  tung tơdroăng cheăng mơnhông tơƀrê nếo, kal thế tơbleăng tơdrêng mâu troăng hơlâ pêi ki kal kơ’nâi kố:

Má môi cho, mơdêk hnoăng pơkuâ dêi mâu kăn ƀă hnê mơhno môi tuăn. Tŭm troăng hơlâ, luât pơkâ tŏng gum drêng mơjiâng ƀă pêi pro xuân thế ai pơơxúa dêi kuăn pơlê pro xiâm, rơtế tơrŭm krá pơla Đảng ƀă kuăn pơlê, pro ti lâi vâ kuăn pơlê hlê, loi khât, môi tuăn ƀă vâ môi tuăn veăng pêi.

Má péa cho, mơdêk hnoăng cheăng pêi tối tơdroăng ki lĕm dêi kăn ƀô̆, đảng viên, malối kăn ƀô̆ pơkuâ hnê mơhno. Rêm ngế đảng viên thế cho ngế ki mơhno troăng lĕm ahdrối ‘na rak ki tơrŭm tơrá tung mâu kăn, đi đo pơkâ ki pơxúa tơdjuôm mê kơpêng ki pơxúa dêi tơná.

Má pái, pơtối pê klêi luât pơkâ tŏng gum, luât vâ rak tơniăn tơtro ki pơxúa ƀă tơdâng pơlê pơla. Kal pơtối mơjiâng, pơkâ ƀă pêi pro mâu luât tŏng gum ăm tơtro, ai pơxúa ƀă mâu cheăm bêng, kong pơlê ƀă kăn ƀô̆ chiu tơdjâk; ing mâu luât pơkâ tŏng gum tơtro troh tơdroăng cheăng kâ rêh ối pơlê pơla, ‘no liăn mơjiâng tơmeăm khoăng ăm mâu kong pơlê nếo tơ’mot.

Má pŭn, Mơdêk tơdroăng cheăng ‘na tuăn tơmiât, hnê trâu rơdâ tung mâu kăn ƀô̆, đảng viên ƀă rêm râ kuăn pơlê ‘na ki pơxúa, ai pơxúa dêi tơdroăng xing xoăng pro rế lĕm mâu kăn pêi cheăng ăm tơnêi têa, kum rêm ngế hlê nhên kố cho troăng hơlâ ki tro, kal khât ƀă ai pơxúa vâ mơnhông ton xŏn dêi tơnêi têa, ing mê, môi tuăn, pêi xêh tơdroăng cheăng pơcháu.

Má pơtăm, Pơtối rak ki rơdêi “troăng dêi Đảng’’ ƀă tuăn ngôa chân krá tơdroăng kal kí tung rêm khu tơrŭm cheăng Đảng ƀă tơrêm ngế đảng viên . Bú drêng lâi môi tuăn ‘na tuăn tơmiât ƀă pêi pro ing kơpêng troh pá xôp, pro xiâm ki rơdêi tung Đảng ƀă tâi tâng kuăn pơlê mê nếo krá kak, pro xiâm ki rơdêi vâ pê klêi tơdroăng cheăng pơcháu xing xoăng pro rế lĕm mâu kăn pêi cheăng, mơnhông tơnêi têa mot tung mâu hơnăm mơnhông tơƀrê nếo.

Ing hnoăng pơkuâ hnê mơhno rơkê plĕng dêi Đảng, ai tuăn rơkê chân ƀă tuăn rơkê pú hên rơtế ƀă tơdroăng ki tơrŭm dêi rơpó tâi tâng hdroâng mơngế krá kak, tơdroăng rah iâ mơngế pro rế lĕm khu kăn cheăng ăm tơnêi têa dêi khu xiâm kal kí;  xing xoăng nếo tíu pêi cheăng ƀă tơdroăng pêi cheăng pro hlá mơ-éa dêi mâu kăn cheăm bêng kong pơlê péa râ kô pêi cheăng rơhéa, tơniăn lĕm, pro  xiâm dja tơnêi têa mot tung mâu hơnăm mơnhông tơƀrê nếo môi tiah Pơkâ hneăng Hôp má 13 dêi Đảng hiăng pơkâ. Ivá rơdêi ki tơrŭm môi tuăn pá môi hdroh nếo kô gum pin kâi tơkâ luâ tŭm tơdroăng pá, pro pơloăng mơnúa chiâng rôh vâ mơnhông djâ tơnêi têa krá rơdêi mot tung rơxông nếo, rơxông mơnhông kro hên, hơniâp ro, tơrŭm tơrôa ƀă mơnhông krá kak xua tơdroăng rêh ối phâi tơtô, hơniâp dêi kuăn pơlê.